Груевски го дотерува Груев


Не е во ред да се води политика преку уметниците, да се врши супервизија и корекција на првонаградени творби на јавни конкурси, кои ги оценувала стручна комисија, вели скулпторот Жарко Башески, автор на спомениците на Даме Груев и Гоце Делчев
Изработката на спомениците на македонските херои влезе во критична фаза по која тешко ќе се утврди чие дело ќе види јавноста - на авторот, на супервизорите или на политичарите.

Академик Томе Серафимовски, ангажиран да ги прегледа делата и да направи завршни корекции, завчера за телевизија „Алфа“ изјави дека видел многу грешки на спомениците и смета дека тоа е зашто ги работат „почетници, кои си мислат дека се генијални вајари“. На тоа се надоврза и градоначалникот на Центар, Владимир Тодоровиќ, кој откри дека „коњот на кој јава Даме Груев е нешто пократок од неговата висина“. Коментарите ги револтираа авторите на спомениците.

- Не е во ред да се води политика преку уметниците, да се врши супервизија и корекција на првонаградени творби на јавни конкурси, кои ги оценувала стручна комисија. Поминале кај моите колеги, но кај мене не дојде никој. Сега скулптурата на Груев е на доработка во Фиренца, со другите дела. Како може Серафимовски да зборува дека се просечни, кога не ги видел и досега нема направено ниту еден коњ - вели скулпторот Жарко Башески, автор на спомениците на Даме Груев и Гоце Делчев, кои ќе бидат поставени од обете страни на Камениот мост во Скопје.

Во обиколката на ателјеата, освен Серафимовски, биле и академиците Петар Хаџи Бошков и Цветан Грозданов, премиерот Никола Груевски и министерката за култура Елизабета Канческа-Милевска.

Хаџи Бошков вели дека за спомениците требало да се реагира навреме.

- Во МАНУ имавме состанок со премиерот и министерката во врска со скулптурите. Јас само потенцирав дека требаше да бидеме повикани уште кога се работеа скиците. Сега е доцна. Прашањето е што избрале да прават, а не колку добро моделираат скулпторите. Јас се повлеков и нагласив дека не се работи за современи обележја - потенцира Хаџи Бошков.

Министерката за култура одговорноста и' ја префрли на Општината Центар.

- Оваа Општина ја спроведува целата постапка за изградба и за поставување на спомениците, а Министерството за култура нема надлежност - истакна Милевска.

Во Центар вчера не одговорија зошто е ангажирана супервизија, зошто дозволија да се омаловажуваат трудовите на наградените автори и зошто се поправаат речиси готови скулптури. Општината во центарот на Скопје ќе постави споменици на Александар Македонски, Даме Груев, Гоце Делчев, Никола Карев, Цар Самоил, Методија Андонов Ченто, четири лава на Мостот Гоце Делчев и други. Дел од овие скулптури веќе се леат во Фиренца, за што Општината ќе плати 10 милиони евра. Поради финансиската криза во мирување се ставени спомениците на Свети Кирил и Методиј, Свети Климент и Наум Охридски, Цар Јустинијан, гемиџиите, на Карпош, основачите на Македонската револуционерна организација, на Првото заседание на АСНОМ, на бранителите и паднатите херои за Македонија.

Анела Петрова

Премиерот призна дека има врска со спомениците

Премиерот Никола Груевски вчера потврди дека ангажирале надворешни консултанти за спомениците, иако, според него, авторите не се просечни.

- Не би рекол дека се просечни вајари. Колку што можам да видам, луѓето си ја вршат добро работата, ангажиравме и надворешни консултанти, нивните совети се прифатени, така што дојде до мошне добра реализација. Не гледаме причина зошто ангажирањето авторитети во финалната фаза од вајањето на спомениците би било нешто негативно. Во практиката на уметноста, вајарството, дизајнот, па и во други области, во финалната фаза се практикува супервизија на сработеното, во насока на подобрување на визуелниот впечаток - изјави Груевски.

Претходно, премиерот негираше дека е во каква било врска со поставувањето споменици и постојано тврдеше дека за тоа прашање исклучиво е надлежна Општина Центар.