Споменици и скулптури (општо)

Центар не ни покажува како ќе изгледа плоштадот со спомениците

Анимацијата за тоа како ќе изгледаат спомениците што ги работи Општина Центар се изработува и наскоро ќе биде промовирана, велат од Општина Центар. Градоначалникот Владимир Тодоровиќ пролетва вети дека ќе изработи 3Д-анимација за да ги увери скопјани дека спомениците нема да го нагрдат, туку ќе го разубават Скопје, но во меѓувреме, како да заборави на ветувањето. Оттогаш од Општината упорно повторуваат дека анимацијата е при крај, но не прецизираат кога јавноста ќе ја види.

- Не знаеме кога точно 3Д-анимацијата ќе и' биде презентирана на јавноста, но тоа ќе се случи набргу - велат во Општина Центар.

Јавноста пролетва бурно реагираше на најавата дека Општина Центар ќе постави 19 споменици на својата територија. Реакцијата беше особено жестока за споменикот на античкиот војсководец Александар Македонски, кој сосе постаментот ќе биде висок 22 метра. Тој ќе биде поставен на плоштадот, каде што се предвидени уште десетина споменици, меѓу кои и коњаниците Гоце Делчев и Даме Груев кај Камениот мост.

Дел од спомениците што ги поставува Општина Центар се изработуваат, а дел се ставени во мирување, меѓу кои и споменикот на Александар. Се очекува први да бидат поставени скулптурите на четири лава од двете страни на Мостот Гоце Делчев.

Советот на Општина Центар има донесено одлуки за подигање на следниве споменици: Крсте Петров Мисирков, на македонскиот ајдутски арамбаша Карпош, Гоце Делчев, Даме Груев, на загинатите припадници на МВР, на Цар Самоил, Методија Андонов-Ченто, гемиџиите, цар Јустинијан Први, скулптура на воин, Кирил и Методиј, Климент и Наум Охридски, на македонските бранители, на паднатите херои за Македонија, на основачите на македонската револуционерна организација, на првото заседание на АСНОМ, на украинскиот писател Тарас Шевченко и на Александар Македонски. Во минатата недела Советот изгласа одлука за поставување на уште едно спомен-обележје на свети Климент Охридски, кој ќе биде поставен пред Универзитетската библиотека.

Уште 3,16 милиони евра за споменици во Центар

Општина Центар вчера усвои нов ребаланс на својот буџет, кој е зголемен за околу 193 милиони денари, односно за 3,16 милиони евра, наменети за изградба на споменици. Овие пари во општинската сметка се префрлени од Владата. Општината планира да изгради уште три спомен-обележја, посветени на Блаже Коневски, Крсте Петков Мисирков и на Славко Јаневски, но не е јасно дали префрлените пари се наменети за нив или за довршување на некои од спомениците што веќе се во изработка.

Советот вчера не ја изгласа програмата за одбележување значајни личности и настани, која требаше да биде дополнета со новите обележја. Со 11 гласови „против“ и десет „за“, советниците на СДСМ ја надгласаа коалицијата ВМРО -ДПМНЕ.

Членовите коментираа дека одлуката не поминала оти во писмените образложенија имало куп печатни грешки.

Дел од советниците дебатираа и за тоа зошто во време кога социјалните случаи во земјава плачат за покрив над главата, се подигаат и по два споменика за исти историски личности и се трошат милионски суми.

- Не сме против подигањето споменици или спомен-обележја. Личностите за кои тоа се прави се наша историја и гордост, но во време кога голем дел од граѓаните одвај се прехрануваат, Владата троши милиони за споменици. Споменик за Крсте Петков Мисирков има на плоштадот Пела, зошто да се гради уште еден? Тоа се залудно потрошени пари - вели Благородна К. Мојсовска, советничка на СДСМ. (М.Д.Т.)

Скулптура „риба“ на улицата Македонија

Скулптурата „Риба“ од завчеравечер им измамува погледи на минувачите по улицата Македонија. Делото на авторката Грозданка Каникова е поставено во зеленилото спроти хотелот „Бристол“. Просторот околу рибата наскоро ќе биде поплочен и уреден.

Ова уметничко дело е дел од проектот на Министерството за култура за поставување на 35 скулптури во центарот на Скопје. Од Министерството велат дека проектот е речиси исцрпен, односно остануваат да се постават уште две скулптури, „Врба“ и „Порта“, во текот на следната година.

Сандански ќе дојава кај „Пулевски“

Општината Аеродром одвоила 100 илјади евра за изградбата на споменикот, а Владата и' понудила уште 100 илјади евра во случај општинските пари да не се доволни

Споменикот на револуционерот Јане Сандански, кој ќе го постави Општина Аеродром на својата територија, ќе го изработи скулпторот Гоце Давидов од Кавадарци, кој победи на конкурсот. Обележјето ќе биде високо 8,5 метри сосе постаментот, а ќе биде поставено во тревникот кој се протега од основното училиште „Ѓорѓија Пулевски“ до булеварот Србија. Не се знае точно колку ќе чини, односно Општината од својот буџет за изработката издвоила 100 илјади евра, а уште толку пари понудила и Владата.

На последната седница на Советот беа соопштени петте наградени труда, кои како макети стасале во Општината. Општината го известила добитникот на првонаградениот труд, а деновиве треба да се усогласат поединостите околу исплатата на авторот, по што тој во најбрзо време ќе почне со изработката на споменикот.

Според договорот што ќе му биде понуден на Давидов, Општината за изработка на делото ќе му исплати 60 илјади евра, а споменикот треба да биде готов во гипс во рок од девет месеци, по што ќе се лие.

Споменикот ќе биде направен од бронза, а Јане Сандански ќе биде претставен како коњаник. Скулптурата ќе биде висока пет метри, а постаментот најмногу до 3,5 метри.

- Околината на споменикот ќе биде уредена со канделабри и зеленило, а по исклучителни поводи, како државни и општински празници, таму ќе се положува цвеќе. За одржувањето на споменикот ќе се грижат сезонските работници ангажирани од општината - велат во одделението за односи со јавноста.

Градоначалникот на Аеродром, Ивица Коневски, изјави дека со нетрпение ја очекува изградбата. Тој смета дека споменикот ќе биде центар на општината, односно собиралиште на граѓаните од сите делови на Аеродром.

- Општината одвои 100 илјади евра за изградбата на споменикот, но мора да напоменам дека и Владата ни понуди помош од дополнителни 100 илјади евра, во случај ако не можеме сами да ги покриеме трошоците. Од сите пристигнати макети, сметам дека комисијата го одбра најубавото решение. Наградивме три труда, а откупивме два - изјави Коневски.

Тој додава дека е можно и да се промени локацијата на која ќе биде поставено обележјето, ако такво нешто побараат граѓаните.

Советниците од СДСМ негодуваа околу штурите информации кои им беа презентирани на седницата. Тие изјавија дека начелно не се против подигање споменици, но пред се' им е важно домаќинското работење на општината и транспарентноста.

- Подобро е за тие пари што ги вложуваме во спомениците да се варосаат училиштата и да се сменат азбестните покриви. Парите може многу подобро да се искористат - изјави Диме Велковски, советник од СДСМ.

Марија Тасев