Веро Центар

- Ми се чини како да беше вчера кога го поставивме првиот темел на основата на објектот и овие две години на градење, се' до последната фаза кога како краен производ го добивме овој грандиозен објект, ми поминува низ главата како забрзан филм.

Се разбира, во овој проект вложивме многу време, енергија и пари, бидејќи нашата крајна цел беше да создадеме оригинално место што ќе им ги задоволи очекувањата на сите што ќе го посетат.

Навистина станува збор за величествен, голем и импресивен проект, па затоа се чувствувам горд и со задоволството го кажувам ова, а забележувам дека истите импресии ги споделувам и со сите оние што веќе го посетиле објектот.

Што е она по што ќе се издвојува „Веро“ од другите трговски центри?

- Не би сакал да го споредувам нашиот проект со другите трговски центри бидејќи е невозможно да се спореди од повеќе причини. Како што е, на пример, неговата локација, која се наоѓа на особено важен дел од градот, лесно пристапна за сите, без разлика дали сте пешак или возач. Објектот е лесно препознатлив, преку својот впечатлив, привлечен и оригинален дизајн исполнет со модерни естетски детали кои се пријатни за очите на посетителите. Уште од првиот момент кога ќе стапнете во него веднаш ќе ја почувствувате разликата, бидејќи просторот е пријатен, со многу дневна светлина која продира низ стаклениот покрив, кој ги осветлува и двата ката на комерцијалниот дел од трговскиот центар. Ваквиот широк, простран и осветлен амбиент прави посетителите да се чувствуваат добредојдени, пријатно и удобно, што е различно од депресивните и затворени простори.

Како ќе ги придобиете потрошувачите?

- Се разбира дека покрај атрактивниот простор и естетиката, центарот е подготвен да понуди и многу содржини за кои веруваме дека ќе им го привлечат вниманието на посетителите, како што е огромниот супермаркет „Веро“ сместен на површина од речиси 5.000 квадратни метри, опремен според високи современи стандарди и со асортиман од повеќе од 15.000 производи. Тука е и пекарницата под стакло, каде што посетителите ќе може да го следат процесот на печење леб. Она што првпат како бренд ќе го донесеме во земјава е детската продавница „Џамбо“, веќе секому добро позната. Таа ќе биде на два ката, исто како и продавницата „Њу јоркер“, германски моден синџир на продавници, уште еден бренд што првпат го носиме во земјава. Понатаму, како дел од новиот трговски ќе бидат и продавниците на „Најк“, „Бети Баркли“, „Априори“, „Стоунс“, „Каприс“, продавницата за накит „Оксет“, „Монсун“ за модни додатоци, оптиката „Италијана“, „Воч поинт“, „Офис шус“ за чевли, три мобилни оператори, Стопанска банка, аптека, цвеќарница, хемиско чистење и многу други.

Уште еден значаен дел ќе биде и корнерот за храна кој, покрај „Мекдоналдс“, ќе ги понуди и производите на пицеријата „Амати“, потоа гиро-ресторан, кафетерии, како и една голема детска игротека од 300 квадратни метри, наменета за да ги усреќи најмалите.

Кој беше клучниот момент за да се одлучите токму сега да направите еден ваков голем трговски центар на македонскиот пазар?

- Не постои клучен елемент што не' натера да го изградиме овој голем трговски центар, туку ова беше само една логична прогресија на успешната приказна што ја градиме во вашата земја во последните 13,5 години, кои не' мотивираат да продолжиме по истиот пат. Па, затоа многу нормално за нас беше да се одлучиме на овој чекор и да го преземеме во свои раце овој голем и грандиозен проект - трговскиот центар „Веро“. Но, во овој контекст исто така би сакал да напоменам дека некои од нашите конкуренти што во минатото изградија слични проекти имаа комплетно поинаков третман од локалните власти во тоа време, но ова ни даде многу поголем елан и упорност за да успееме.

Дали „Веро“ за вас претставува проверен бизнис-проект? Дали правевте приспособувања кон потребите на македонските купувачи?

- Како што веќе напоменав, нашето искуство и успех го потврдуваат сето она што вие ме прашувате. Можам да кажам дека со текот на времето пазарот се приспособи кон нашиот бизнис, бидејќи бевме пионери, кои прв пат во вашата земја донесоа нов стил на пазарење, модерно и комфорно за сите корисници. Почнувајќи од лесно достапните супермаркети со простран паркинг-простор, климатизиран продажбен простор опремен со најсовремена опрема за складирање и чување на производите, така што тие нема да го изгубат својот квалитет, голем асортиман естетски класифициран, можност за плаќање на повеќе каси, промоции, попусти, различни активности... Сите овие работи создадоа нови навики на пазарење кај нашите клиенти.

Сево ова беше пред речиси 14 години, а денес можеме да заклучиме дека бизнисот и економијата воопшто се неколку скалила погоре и бележат вистински раст и подобрување.

Како се одвиваше целиот процес од идеја до негова конечна реализација? Колку Македонија беше погодна или макотрпна почва за ваков зафат?

- Нашата компанија е присутна на македонскиот пазар речиси 14 години и затоа би ја искористил поговорката што преведена на вашиот јазик би звучела вака: „Кога веќе танцуваме на главниот подиум, тогаш ќе го изведеме најдобриот танц досега“. Па така од денот кога ја добивме локацијата се' беше подготвено за да почнат градежните активности и да го изградиме архитектонски најубавиот објект во градот и навистина верувам дека успеавме во тоа. Се разбира за време на процесот патот не беше секогаш послан со рози, се соочувавме со различни тешкотии од различни аспекти, но на крајот нашата напорна работа даде резултати видливи за сите. Ние сме овде за да го водиме нашиот бизнис и за ништо друго. Но, како што сите во светот размислуваат, економијата и бизнисот ги поврзуваат луѓето и им дозволуваат тие меѓусебно да си помагаат на најдобриот можен начин, па дури и понекогаш ова да се однесува на политички прашања.

Се разбира дека за толку голем проект планирате и нови вработувања. Какво влијание ќе има отворањето на новиот трговски центар врз локалната економија?

- Во рамките на новиот проект, кој го почнуваме, само во оперативниот дел на супермаркетот „Веро“ и големата продавница за деца „Џамбо“ веќе се пополнети 270 нови работни позиции и сите и' припаѓаат на локалната популација, а во оперативниот дел кај другите закупци ќе има околу 220 до 250 нови вработени. Исто така ќе има голем број други услуги што ќе ја поддржат работата на трговскиот центар, како што се: обезбедувањето, сервисот за чистење, паркингот, техничкиот оддел и други, кои ќе бидат ангажирани за нашите потреби од редовите на локалните компании. Посебно во овој случај сакам да напоменам дека во целиот процес на изградбата 95 отсто од градежниците, техничарите и работниците исто така беа ангажирани од локалната популација. Сметам дека сите можат да го забележат и увидат влијанието што го оставивме врз локалната економија.

Се разбира дека и во понатамошната работа на трговскиот центар голем број локални работници, трговци и услуги ќе бидат дел од нашето работење.

Имате свој синџир на супермаркети низ повеќе балкански земји. Какво е искуството таму?

- Како што веќе еднаш напоменав, присутни сме во земјава речиси 14 години и имаме отворено осум големи супермаркети, а новиот ќе биде деветти едноподруго но тој ќе биде поинаков од досегашните. Чекорите што ги преземавме секогаш беа многу внимателно и детаљно анализирани бидејќи кога ќе се одлучиме за некој проект во кој сакаме да инвестираме сакаме тој да ги исполни сите потребни критериуми и да поседува корисни карактеристики кои долгорочно ќе им помогнат на луѓето и компанијата.

Нашиот почетен капитал, кој прв пат го инвестиравме овде, изнесуваше 3 милиони евра, а денес со последниот проект цифрата се искачи на повеќе од 75 милиони евра.

„Веропоулос груп“, која брои 210 продавници низ Грција, Србија и Македонија, има 6.000 вработени од кои 820 се вработени во вашата земја. Како што и порано сум кажал, ние сме навистина задоволни од нашите инвестиции во Србија и овде и до ваквите резултати не сме дошле по игра на случајност или среќа, туку со многу напорна работа, следејќи ги сите современи развојни методологии и техники и правејќи силни напори за да ги имплементираме истите во нашето поле на активност.

Груевски поканет на отворањето

На церемонијата за свеченото отворање на трговскиот центар на 31 август се поканети лица од политичката, стопанската и општествената сцена и од амбасадорскиот кор во земјава, но грчкиот премиер Јоргос Папандеру нема да биде присутен, вели Теодосијадис.

- Поканети се македонскиот премиер Никола Груевски, министрите, претставници на сите локални власти и институции, деловни партнери и пријатели. Грчката влада ќе ја претставува амбасадорката во Скопје, Александра Пападопулу. Премиерот Папандреу нема да биде на отворањето. Ако тој доаѓа од друга причина во земјава, јас не знам - вели Теодосијадис.

Марјан Блажевски

http://dnevnik.com.mk/?ItemID=FCA286A9C4F8F241A88DDC242169462D