Веро Центар

По три години откако го купи плацот, „Веро“ конечно почна да гради

Од компанијата не даваат информации, а Министерството без увид дали се испочитувани роковите

Деспина Трајковска

Грчки „Веро“, конечно, почна да гради на плацот спроти Народна банка, иако земјиштето го купи пред три години. Градежни машини и десетици работници од неодамна секојдневно се на терен, каде што веќе се видливи темелите на објектот. На градилиштето, иако е обврзан со закон, инвеститорот се' уште нема поставено информативна табла за тоа што треба да никне на плацот од 10.934 квадратни метри што го купија Грците на лицитација за 510 евра квадрат. Индикативно е што изградбата не беше официјализирана, како што е случај со речиси сите поголеми објекти што почнуваат да се градат, особено на најатрактивните локации и од странски инвеститори.

„Нема никој што би можел да зборува на таа тема. Сите се на службени патувања. Ќе ве побараме“, е одговор што го слушаме од „Веропулос“ повеќе месеци. Ништо официјално и речиси идентичен одговор даваат и од агенцијата „Публицис“, преку која грчката компанија комуницира со јавноста.

И во Министерството за транспорт и врски немаат увид кога почнало да се гради, точно што се гради и до кога, иако во договорот за отуѓување на земјиштето точно е наведен рокот до кој инвеститорот има обврска да го изгради објектот. Веќе неколку дена од Министерството, наводно, го бараат купопродажниот договор за да информираат дали инвеститорот досега воопшто ги има испочитувано роковите за изградба на објектот.

Единствено од Општина Центар потврдуваат дека инвеститорот поседува одобрение за градба кое му било издадено на 23 јуни, според кое се предвидува изградба на јавен комерцијален објект - продажен центар -супермаркет со придружни содржини. Општинарите додаваат дека инвеститорот еднаш се обидел да почне да гради без довола.

„По наш редовен инспекциски надзор утврдивме дека изградбата започнала без одобрение. Веднаш, на 7 декември 2007 година издадовме решение за стопирање на изградбата, што беше испочитувано“, велат од Центар.

Инаку, општината го усвои Детаљниот урбанистички план за реонот пред повеќе од две години, кога „Веро“ веќе и официјално беше сопственик на парцелата. Кусо време по донесувањето на ДУП-от, плацот беше делумно подготвен за градба, оттаму се дислоцираа четири автосервиси. Останаа неколку куќи на староседелци со кои грчката компанија требаше да договори откупување на нивните имот, за да се дооформи градежната парцела. Според планот, маркичката има трговско-деловно намена, со вкупна површина од 15.442 квадратни метри и површина за градба од 10.934 квадрати. Урбанистичката рамка дозволува објектот да има приземје, три ката и потпокрив.

Пред три години, кога на повторена лицитација, откако првата пропадна поради неправилности, Грците станаа сопственици на земјиштето, претседателот на групацијата „Веропулос“ најави инвестиција која ќе достигне до 20 милиони евра. Само за да станат газди на парцелата, тие на државата и' уплатија 5,5 милиони евра.

http://www.utrinski.com.mk/?ItemID=1303171303AE784B89F94199B644FF31