Пешачки зони и помали плоштади (општо)

НА УЛИЦАТА МАКЕДОНИЈА ЌЕ СЕ МЕНУВААТ ГРАНИТНИТЕ ПЛОЧКИ

Нема веќе кршење штикли



Најрепрезентативното шеталиште во државава, улицата "Македонија" со месеци е опасна пешачка зона поради откорнатите и искршени гранитни плочки. Особено помалите деца и пензионерите, родителите со колички или инвалидите мора многу внимателно да се движат по улицата бидејќи од сите страни демнат дупки или поткренати плочки. Скопјанките пак, се жалат дека искршените плочки се кобни и за нивните потпетици кои лесно заглавуваат во отворите. Една банкарска службеничка ни се пожали дека досега има искршено две-три штикли и само среќа било што поминала само со шината нога. "Се кинат и чевли, се виткаат нозе, се паѓа. Само застанете отстрана да видите на колку минувачи за кратко време им се случува тоа, вели нашата соговорничка.
Поплаките на граѓаните стигнале и до ушите на надлежните институции, па од вчера екипи ангажирани од Општина Центар почнаа со реконструкција и замена на гранитните плочки на улицата.
- Санацијата се состои во нивелирање на пропаднатите гранитни плочки и замена на истите кои се оштетени. Активностите отпочнаа од плоштадот Македонија, ќе ја опфати улицата Македонија и тротоарите до хотелот Бристол, информираат општинарите.
Предвидено е работите да завршат за 15 дена.

Стопирани градежните работи на новиот плоштад во Шутка

Мери Јордановска	Коментари (0)

Стопирани градежните работи на плоштадот во Шуто Оризари. Откако А1 објави дека плоштадот во Шутка наголемо се гради уште пред да заврши тендерот за избор на градежна фирма, општината се повлече, и покрај тоа што претходно тврдеше дека ситуацијата е чиста и законска.

Во Шутка денес е мирно. Ги нема градежните работници кои вчера признаа дека биле ангажирани од пратеникот Амди Бајрам и од градоначалникот Елвис Бајрам, да вршат градежни работи на плоштадот во Шуто Оризари и покрај тоа што тендерот сеуште не бил завршен.

Градоначалникот Елвис Бајрам и неговиот татко, пратеникот Амди Бајрам се затворија за јавноста. Одбиваат да образложат пред јавноста - зошто ангажирале работници да го градат плоштадот во Шутка пред да заврши тендерот и дали градежните работи ги вршат нивни блиски фирми.

Реагираат дел од советниците од општината Шуто Оризари, бараат да се свика вонредна седница и да се поништи тендерот.

„Ние како советничка група се оградуваме од таквите дејствија и остануваме на ставот на она дека во Советот за извршување на било какви состојби, градоначалникот е само извршител, а одлуки треба да носи Советот. Во овој дел, Советот нема донесено одлука“, вели Сејфо Кадри, координатор на советничка група.

За случајот се известени обвинителството, полицијата и антикорупциската комисија. Во претставката до нив, се вели дека фирмата Блокара Орашец, инаку блиска до градоначалникот Бајрам, веќе завршила половина од градежните работи на плоштадот, иако тендерот се уште не бил затворен. Работниците пак велат, не станува збор за фирма, туку бевме ангажирани од приватно лице.

„Амди Бајрам не викна да работиме, со градоначалникот“, рече вчера еден работник.

Во тендерот стои дека фирмата што ќе биде избрана треба да ја демонтира постоечката ограда - од снимките се гледа дека тоа е веќе сторено.

Слично е и со набавката на црвениот релјефен блок - тендерот заврши вчера, а релјефниот блок е веќе на плоштадот. Кој ги завршил овие градежни работи, останува неизвесно. Надлежните институции се уште молчат.