Административно раководење на Скопје

ГРАДСКИТЕ ВЛАСТИ РАЗРАБОТУВААТ НОВИ ЗАКОНСКИ ВАРИЈАНТИ ЗА УПРАВУВАЊЕ СО ГЛАВНИОТ ГРАД

За Скопје е најдобро да биде една општина

Кога градот би бил една општина, сите буџети би биле на едно место и локалната самоуправа би располагала со 150 до 200 милиони евра годишно

Градските власти ќе и' предложат на Владата, односно на вицепремиерот Зоран Ставревски, три варијанти за нов закон за Град Скопје, најави скопскиот градоначалник Трифун Костовски. Целта е да се најде најдобриот законски модел што ќе овозможи Градот конечно да почне ефикасно да функционира.Во Градот веќе работи експертска група, составена од проф. Гордана Силјановска од Правниот, проф. Благоја Марковски од Природно-математичкиот и проф. Илија Ацевски од Филозофскиот факултет, кои работат на варијантите на законот. Тие ќе предложат измени и во другите закони што се однесуваат на локалната самоуправа, како законите за територијална организација и за финансирање на општините.

ГРАДОТ  НЕМА ВЛАСТ

- Ќе понудиме три варијанти на законот, од мека до радикална. Со најтврдата варијанта ќе предложиме да се укинат општините, односно Скопје да биде една единица на локалната самоуправа. Втората варијанта е да се зголемат надлежностите на Координативното тело на градоначалници, односно тоа тело да добие извршна моќ. Тоа значи дека одлуките ќе се носат во интерес на целиот град и ќе мора да се спроведуваат. Најмеката варијанта е да се зголемат надлежностите на Градот Скопје во однос на општините и строго да се дефинира што е во градска, а што во општинска надлежност - вели Антони Малинов од правниот сектор во Градот.Тој додава дека со овие предлози сакаат конечно да се расчисти со дуализмот, паралелизмот и со нејасното дефинирање на ингеренциите. Градоначалникот Трифун Костовски вели дека со сегашните законски решенија вистинската локална власт е во рацете на општините, а Градот функционира како нивен сервисер. Нема одлучување на едно ниво. На пример, ние сега ќе го менуваме јавното осветление на градските улици со поевтини светилки, но за да се направат вистински заштеди, и општините треба паралелно со нас да ги сменат светилките. Затоа, јас ќе се залагам за варијантата Скопје да биде една општина, а не како сега 10 општини плус Градот. Со сегашните решенија во Скопје има 11 сектори за урбанизам, за финансии, за екологија итн. Поради тоа во локалната администрација има голем број луѓе, а за нивните плати се одлева значаен процент од општинските буџети. Локалната самоуправа не смее да биде скапа. Кога Скопје би било една општина, сите буџети би биле на едно место и Градот би располагал со 150 до 200 милиони евра годишно. Со тие пари може многу да се направи - вели Костовски.

ГРАЃАНИ ОД ВТОР РЕД

Според градските власти, сегашните законски решенија од скопјани прават граѓани од втор ред. Тие се во подредена положба во однос на жителите на Охрид, Тетово и на другите градови. На пример, за да изградат куќа, наместо на еден шалтер, документите мора да ги прибираат најмалку на два шалтера, во соодветната општина и во Градот. Комуналиите се плаќаат на две места, за различни изводи и потврди мора да одат или во општината или во Градот. Честопати и самите скопјани се револтирани и понижени поради тоа - вели Аљоша Шопар, раководител на секторот за уредување на просторот.Тој додава дека наместо едношалтерски систем, со ваквите законски решенија скопјани на својата кожа чувствуваат што значи „десетшалтерски“ систем.

Соња Христовска
Фото: Маја Златевскa