Административно раководење на Скопје

Градот Скопје да биде една општина со повеќе квартови

Ќе се бара промена на територијалната организација, во насока на одвојување на урбаниот од руралниот дел

Градската администрација ги изработи предлог-измените на Законот за Град Скопје и очекува да добие можност деновиве да ги презентира пред Владата. Градските власти побарале средба со вицепремиерот Зоран Ставрески на кого ќе му ги образложат своите предлози за измена на законот во насока на вистинска децентрализација и успешно функционирање на Градот.

Од Републичкото собрание ќе биде побарано да даде зелено светло за промена на територијалната организација на главниот град, во насока на одвојување на урбаниот од руралниот дел. Општините Шуто Оризари, Бутел и Сарај, но и делови од Ѓорче Петров и Гази Баба учествуваат во создавањето на градскиот буџет само со 4 проценти, а бараат најмногу од градските финансии. Во нив има делови кои немаат ниту пат, ниту струја и вода, а обврска на Градот е да им ги обезбеди. За разлика од нив, општините како Центар, Карпош и Аеродром најмногу го полнат буџетот, а немаат шанса за вистински брз урбан развој. Двојазичноста, и покрај предлогот за исклучување на Сарај, не би се менувала.

Во предлог-промените, градските власти бараат и нова организација на односите меѓу Градот и општините. Се предлага Градот да има една општина која ќе биде поделена на повеќе квартови кои ќе имаат одредени одвоени служби во интерес на поедноставување на процедурите за граѓаните. Сепак, во Градот инсистираат финансиите, даноците и буџетот, како и градежното планирање на просторот да бидат под една, градска капа.

„Очекуваме деновиве да не' повикаат на средба во Владата за да ги презентираме измените, по што тие ќе и' бидат достапни и на јавноста. Градот не може да биде предлагач на измените на Законот, па очекуваме тоа да го стори Владата“, истакна градоначалникот Трифун Костовски. Тој е задоволен од неодамнешната средба со министерот за локална самоуправа, Муса Џафери, од кого добил поддршка за секоја измена што е во полза на граѓаните на главниот град. (С.Н.)

http://utrinski.com.mk/?ItemID=4F75353F3325FE4A9C51103717DF300D