Когенеративни електрани (Термоелектрани-Топлани)

Кризата не му може ништо на „Те-То“

Објектот во април ќе биде приклучен на домашниот систем и има моќност од 200 мегавати електрична енергија

Александрија Стевковска

Кризата не влијае на изградбата на комбинираната гасна централа „Те-То“.

Изградбата се одвива според планот, а централата ќе почне со работа, според најавата, во април наредната година. Според инвеститорите, кризата не успеала да влијае врз забавувањето на реализацијата на проектот тежок 150 милиони евра, со кој треба барем малку да се поправи лошата енергетска слика на Македонија.

„Овој објект има капацитет да произведува 30 отсто од денешното производство на енергија во Македонија, а 50 отсто од производството на топлинска енергија на ’Топлификација‘, така што станува збор за сериозен, голем проект. Инвестицијата ќе овозможи дополнително производство на електрична енергија, која е многу битна за државата. Ова е пазарен проект, што значи ќе работи врз основа на пазарни принципи и се надеваме дека ќе немаме никакви други проблеми“, изјави вчера Димитар Хаџимишев, првиот човек на „Топлификација“, по средбата со вицепремиерот за економски прашања, Владимир Пешевски.

„Не сме премногу вознемирени од кризата, бидејќи ги обезбедивме сите финансии за овој проект претходно, така што сме олабавени и чекаме кога централата ќе биде подготвена за работа“, вели Андреј Портнов, од „Синтез груп“, кои се поголем инвеститор во овој проект.

Во инвестицијата за изградба на комбинираната централа, која на гас ќе произведува струја и топлинска енергија, руската компанија „Синтез груп“ учествува со 80 проценти од средствата, а скопска „Топлификација“ со 20 проценти. „Те-То“ е прва централа во земјава што ќе произведува комбинирано топлинска и електрична енергија на природен гас. Таа треба да ја намали увозната зависност од струја. Произведената енергија ќе биде понудена на домашниот пазар, но и ќе се извозува.

Во април објектот ќе биде приклучен на домашниот електроенергетски систем и ќе биде со инсталирана моќност од 200 мегавати електрична енергија и 160 мегавати топлинска енергија.

Новиот вицепремиер за економски прашања, Владимир Пешевски, вчера најави дека ќе ја посети локацијата на која се гради „Те-То“, со цел да се запознае со текот на оваа инвестиција, но непосредно пред посетата се премисли. Но, инвеститорите, сепак, не се откажаа од средба со него, па сами му отидоа на гости во неговиот кабинет во Владата.

Очигледно, реализацијата на еден од ретките проекти што во време на криза се градат во земјава, не беше доволен предизвик за Пешевски да излезе на терен и да се запознае со активностите на тоа поле. Згора на се', неговиот кабинет не најде за потребно да излезе со издржан изговор за откажување на посетата на местото каде што се гради новата инвестиција, па наместо тоа, на луѓето кои требаше да ги посети, им била сервирана информација оти откажувањето на посетата го предизвикало топлото време, за потоа инвеститорите да се соберат и да одат на гости кај Пешевски во Владата. По средбата, пак, Пешевски не даде изјава за медиумите, па тие се сомневаат дека нивното заобиколување веројатно било и главна причина за откажување на првично најавената посета и личното запознавање со градбените активности на централата. Од неговиот кабинет вчера не беа достапни за каков било коментар.