Бензински пумпи

„Лукоил“ и „Макоил“ во војна за земјиште платено половина милион евра

Од „Макоил“ се убедени дека станува збор за криминал, а од руската компанија демантираат

Деспина Трајковска

Нафтените компании „Лукоил“ и „Макоил“ влегоа во војна за земјиште за изградба на бензинска пумпа. И двете, наводно, се сопственици на локацијата за која платиле околу половина милион евра. Земјиштето, кое ги скара нафтените конкуренти , е со површина од околу 2.000 квадратни метри веднаш до просториите на „Македонски фолклор“ во Автокоманда. Од „Лукоил“ уште пред дваесетина дена почнале да го оградуваат теренот за изградба, но по реакциите од „Макоил“, работите ги прекинале. Сепак, убедени дека се во право, градежните работници ангажирани од руската компанија вчера повторно започнаа со организација на градилиштето.

Според тврдењето на Мите Јовановски, сопственик на „Макоил“, вчераутро приватното обезбедување на „Лукоил“ насилно ги отстранило работниците и механизацијата на „Макоил“ кои се подготвувале да почнат со работа. Според верзијата на Јовановски, тој на приватен сопственик платил 230 евра за квадрат и целосно го исплатил земјиштето, по што го завел во катастар. Но, кога побарал да добие сопственост, државните органи му посочиле дека со земјиштето стопанисува руската нафтена компанија. Според газдата на „Макоил“, во целиот случај е направен голем криминал, а тоа го тврди и неговиот адвокат Игњат Панчески.

„Во моментов не можам да посочам дека учесник во овие нечисти работи е Владата, иако се повикуваат дека таа им одобрила. Не можам да посочам некое конкретно лице од Катастарот, не можам да посочам конкретен нотар, бидејќи сите тие се камуфлирани во моментов. Меѓутоа, ветувам дека многу брзо ќе се одмота клопчето“, изјави вчера Панчевски и додаде дека за случајот веќе е поведен судски спор.

Од „Лукоил“, пак, вчера демантираа дека постои проблем околу сопственоста на локацијата. Велат дека тие се единствени сопственици на градежната парцела. Поседуваат имотен лист, договорот за купопродажба го завеле во Катастар, а Министерството за транспорт и врски пред четириесетина дена им издало одобрение за градење. Од Министерството вчера ги демантираа обвинувањата од „Макоил“ дека, наводно, тие го блокирале издавањето на градежната дозвола на македонската компанија.

„Заклучно со 25 јуни до Министерството за транспорт и врски воопшто не е поднесено барање за издавање одобрение за градба на наведената локација од страна на ‘Макоил‘“, рекоа вчера од Министерството за транспорт и врски.