Црква на Плоштад Македонија

Антикорупционерите влегоа во Мал ринг

Плоштадот е центар на главниот град и за него не може самоволно, не почитувајќи ги законите, да решаваат општински советници колкаво мнозинство и да имаат, велат во антикорупциската комисија

Антикорупциска ќе испитува како е донесен
Детаљниот урбанистички план за Мал ринг

Поради сомневање дека законите биле прекршени, а процедурата неиспочитувана, антикорупциската комисија ќе испитува како е донесен Детаљниот урбанистички план за Мал ринг.  Измените во ДУП-от што ги донесе Советот на Општина Центар се спротивни на Генералниот урбанистички план. Овој случај ни е од посебен интерес бидејќи станува збор за средиштето на метрополата. Општина Центар не е изолиран дел, туку е центар на главниот град на државата - велат во антикорупциската комисија. Членовите на Комисијата се сомневаат дека советниците не ја испочитувале процедурата при носењето на ДУП-от бидејќи граѓаните воопшто не биле консултирани, односно за него немало јавна расправа на која тие би се изјасниле за предложената промена на планот, како што налага законот.Веднаш по изгласувањето градските власти најавија дека ДУП-от, поради начинот на кој бил донесен, ќе биде оспорен пред Уставниот суд. Ако Судот не поведе постапка за оценка на планот, ќе биде распишан референдум, на кој граѓаните би се изјасниле за предвидените измени. Ние не го гледаме овој, како ни сите други предмети, низ партиска, верска, етничка или низ друга призма. Не сме против градење верски објекти, но мораме да водиме сметка дали се кршат законите и дали има усогласеност со волјата на граѓаните. За нас е битно да се зачува хуманиот начин на живеење. Со измените на ДУП-от го губиме плоштадот, а од еколошки аспект ќе се изгуби и циркулацијата на воздухот. За тоа не може да решаваат советници, колку и да имаат мнозинство. Ваквото однесување не зборува во прилог на доброто владеење и водење политика. Законите мора да се почитуваат и да се изградат вредносни, а не парцијални или партиски критериуми. Со вакво постапување им се праќа лоша порака на другите единици на локална самоуправа дека законите не мора да се почитуваат и дека може да се работи клановски. Постапувајќи по предмети во врска со работата на општините веќе добивме сознание дека тие ја разбираат децентрализацијата како моќ да прават што сакаат, кршејќи ги прописите и генералните документи - велат во Комисијата.

Според измените на ДУП-от за Мал ринг, на плоштадот Македонија помеѓу стоковната куќа „Сити галери“ и ресторанот „Дал мет фу“ ќе се гради црква, токму врз трасата за подземна сообраќајница, која беше испланирана со претходно донесениот ГУП. Помеѓу плоштадот и зградата на телекомот ќе се градат трговски центар, хотел и градска куќа, која всушност ќе биде подигната на местото на Офицерскиот дом. Зад „Сити галери“ ќе се гради уште еден трговски центар, а од другата страна на Вардар, пред „Комерцијална банка“ два деловни објекта од кои едниот ќе биде наменет за Архивот. Двата брега на Вардар ќе бидат поврзани со нов пешачки мост, кој ќе се наоѓа помеѓу Камениот и Железничкиот мост. Предвидено е и подигнување споменици на мостовите, фонтани во Вардар... Максималната височина на објектите ќе биде 29 метри, а камбанеријата на црквата ќе биде висока 50 метри. Неколку дена по усвојување на планот за Мал ринг градоначалникот на Скопје, Трифун Костовски, достави информација до Советот на Скопје дека Општина Центар ги прекршила Уставот, законите и прописите за уредување и хуманизација на просторот и за заштита и унапредување на животната средина и на природата. Измените на планот биле усвоени без позитивно мислење на градот Скопје. Според партиципативното тело за урбанизам, решенијата во планот не ги исполнуваат сообраќајните критериуми.