Црква на Плоштад Македонија

Црквата на плоштад на Уставен суд

ДО УСТАВНИОТ СУД
НА РЕПУБЛИКА МАКЕДОНИЈА
СКОПЈЕ


Врз основa на член 12 од Деловникот на Уставниот суд на Република Македонија ( “Службен весник на РМ“ бр.70/92) поднесувам

И Н И Ц И Ј А Т И В А

за поведување постапка за оценување на уставноста и законитоста на Одлуката за изменување и дополнување на Детален урбанистички план за централно градско подрачје на Град Скопје „Мал Ринг“ дел од Блок Б1, Блок Б6 и Блок Б7 Општина Центар – Скопје (“Службен гласник на Општина Центар“ бр.07/08), донесена од Советот на Општина Центар.

Образложение

I. Со член 117 став 1 од Уставот на Република Македонија, се утврдува дека Градот Скопје е посебна единица на локална самоуправа, чија организација се уредува со закон.
Уставот на Република Македонија со амандманот XVII, утврдува гаранција дека во градот Скопје граѓаните непосредно и преку претставници учествуваат во одлучувањето за прашања од значење на градот Скопје, а особено во областите на јавните служби, урбанизмот и руралното планирање, заштита на околината, локален економски развој, локалното финансирање, комуналните дејности, културата, спортот, социјалната и детската заштита, образованието, здравствената заштита и во други области утврдени со закон.
Поаѓајќи од тоа со член 10 став 1 точка 1 алинеа 3 од Законот за Градот Скопје (“Службен весник на РМ“ бр. 55/04), е утврдено дека Градот Скопје е надлежен да дава мислења за предлогот на деталните урбанистички планови, урбанистички проекти и урбанистички планови за населените места што ги донесуваат општините во Градот Скопје.
Со членот 15 став 2 од истиот закон, е утврдено дека општините во Градот Скопје, деталните урбанистички планови, урбанистички проекти и урбанистички планови за населените места, ги донесуваат по претходно добиено позитивно мислење од Град Скопје и согласност од органот на државната управа надлежен за работите на уредување на просторот.
Законот за просторно и урбанистичко планирање (“Службен весник на РМ“ бр. 24/08) ја уредува постапката за изготвување и донесување на плановите. Според член 10 став 1 од Законот, градот Скопје донесува генерален урбанистички план, а според член 11 став 1 од Законот, деталниот урбанистички план се донесува за плански опфат за кој е донесен генерален урбанистички план. Во истиот член во став 7 се утврдува дека деталниот урбанистички план, како план од пониско ниво, мора да биде усогласен со генералниот урбанистички план.
Воедно, со член 16 став 3 од Законот, е регулирано дека за изработување на плановите односно, генералниот урбанистички план, деталниот урбанистички план, урбанистички план за село и урбанистички план вон населено место и за урбанистички проекти за остварување инвестиции од значење за Републиката, Владата на Република Македонија донесува програма за приоритетна изработка на урбанистички планови на предлог на органот на државната управа надлежен за вршење на работите од областа на уредување на просторот и на предлог на единиците на локалната самоуправа и градот Скопје. Во став 4 од истиот член е предвидено дека предлозите на програмите пред нивното донесување се доставуваат до општините, општините во градот Скопје и градот Скопје, кои се опфатени со предлогот на програмата заради давање мислење за прифаќање на програмата во делот кој се однесува за секоја општина или градот Скопје. Мислењето се дава во рок од седум дена по приемот на програмата, а доколку не се даде во пропишаниот рок се смета дека е дадено позитивно мислење.
Според член 21 став 1 на нацртот на плановите се врши стручна ревизија со која се утврдува дека плановите се изработени во согласност со одредбите на овој закон, прописите донесени врз основа на овој закон и друг закон. Во став 5 од истиот член е утврдена обврската забелешките од стручната ревизија да се вградат во нацрт планот, а изработувачот на планот задолжително дава извештај за постапувањето по забелешките на стручната ревизија, до органот надлежен за донесување на планот. Стручната ревизија и извештајот за постапувањето по забелешките од стручната ревизија се составен дел на планот.
Во член 26 став 9 е регулирано дека, општините во градот Скопје, урбанистичките планови ги донесуваат по претходно добиено мислење од градоначалникот на градот Скопје. Мислењето од градоначалникот на градот Скопје се издава во рок од 15 дена од денот на поднесувањето на барањето од страна на доносителот на планот, а доколку не се издаде во определениот рок ќе се смета дека мислењето е дадено.

II. Врз основа на горенаведените одредби произлегува дека при донесување на Одлуката за изменување и дополнување на Детален урбанистички план за централно градско подрачје на Град Скопје, “Мал Ринг“ дел од Блок Б1, Блок Б6 и Блок Б7 Општина Центар – Скопје ( “Службен гласник на Општина Центар “ бр. 07/08 ), се направени низа пропусти со кои се прекршуваат истите.

1. Имено, на ден 05.06.2008 година, до Градот Скопје е поднесен Предлог-изменување и дополнување на ДУП за ЦГП “Мал Ринг“(Б1, Б6 и Б7) заради давање мислење за истиот, согласно предвидената законска обврска во член 10 точка 1 алинеа 3 и член 15 од Законот за Град Скопје, при што Град Скопје по неговото разгледување, констатира дека Предлогот не е усогласен со Генералниот урбанистички план на Град Скопје од 2002 година, со што дава негативно мислење за истиот.
2. Во образложението за донесување Одлуката (што не е објавено во службениот гласник), Општината центар наведува дека правен основ за предложената одлука е Програмата на Владата на РМ за приоритетна изработка на урбанистички планови во Република Македонија за 2008 година (бр.19-843/1 од 05.02.2008 година). Тој факт не ја исклучува обврската на општината донесувањето на измените и дополнувањата на деталниот урбанистички план да бидат во согласност со Генералниот урбанистички план, што јасно произлегува од член 11 став 7 на Законот за просторно и урбанистичко планирање.
   Особено треба да се има предвид дека пред донесување на Одлуката, од страна на Владата на РМ не е испочитувана и обврската која произлегува од член 16 став 4 од Законот за просторно и урбанистичко планирање, односно предлогот на програмата за приоритетна изработка на урбанистички планови на Владата на РМ не е доставена до Град Скопје заради давање мислење за прифаќање на програмата во делот кој се однесува за Градот Скопје. Според тоа таа не може да биде основ за донесување на спорната одлука за општината Центар, бидејќи се однесува и на Градот Скопје.
3. Според Законот за просторно и урбанистичко планирање, при донесување на деталниот урбанистички план е предвидена обврска за стручна ревизија. Истото делумо е испочитувано од страна на општината Центар. Имено, стручната ревизија е извршена од страна на Друштвото за планирање, проектирање и инжинеринг Простор ДОО Куманово, кое во Заклучокот на ревизијата, наведува дека е потребно целосно усогласување на деталниот урбанистички план со законската регулатива и подзаконските акти, што подразбира усогласување и со Генераниот урбанистички план, а по вградување на забелешките и препораките на стручната ревизија, да се продолжи со постапката предвидена со закон.
   Во врска со ова Општината Центар како образложение наведува дека планираните површини за градба-градежни парцели со дефинираните висини од кои произлегуваат урбанистичките проекти се преземени од Програмата за приоритетна изработка на урбанистички планови во РМ во 2008 година. Од тоа може да се заклучи дека Програмата на Владата претставува единствен основ за донесување на Деталниот урбанистички план, без притоа да се води сметка за законските обврски, а особено не се водело сметка за фактот дека и Програмата мора да е во согласност со Генералниот урбанистички план, односно во него утврдените намени на просторот.
   Имено, Градот Скопје во Генералниот урбанистички план 2001-2020 година (Книга 3), во основните параметри од аспект на организацијата на просторот, прецизно ја регулира обврската дека општините во градот Скопје, заради доследно спроведување на Генералниот урбанистички план на Град Скопје, сите Детални урбанистички планови на територијата на градот Скопје ( нови, и измени и дополнувања) треба пред усвојувањето да добијат согласност од нарачателите на Генералниот урбанистички план, надлежното министерство и градот Скопје.
   Исто така, се има впечаток дека, при донесување на Деталниот урбанистички план се настојува да се изиграат одредбите кои ги предвидува Генералниот урбанистички план во Книга 3, бидејќи се предвидуваат измени и дополнувања, кои гледајќи ги поединечно претставуваат измени и дополнувања од помал обем, но доколку се гледаат во нивната севкупност, претставуваат измени и дополнувања од поголем обем. Ова од причини што во Книга 3 за планирањето на просторот од поголем обем ( промени во урбанистичкиот концепт и планиметријата, како и промени кои опфаќаат значителен дел од површината на урбаниот опфат), обврска на донoсителот на Деталниот урбанистички план е во соработка со градот и државата, да спроведе државен или меѓународен јавен анонимен конкурс од што ќе произлезат просторните решенија.

III. Од овие причини се предлага Уставниот суд на Република Македонија да поведе постапка за оценување на уставноста и законитоста на Одлуката за изменување и дополнување на Детален урбанистички план за централно градско подрачје на Град Скопје, “Мал Ринг“ дел од Блок Б1 Блок Б6 и Блок Б7 Општина Центар – Скопје (“Службен гласник на Општина Центар “ бр.07/08 ) и да донесе одлука за укинување на истата.

IV. Имајќи ги предвид последиците што би можеле да настанат со донесената Одлука, предлагам до донесувањето на конечната одлука Уставниот суд, да донесе решение за запирање на извршувањето на Одлуката за изменување и дополнување на Детален урбанистички план за централно градско подрачје на Град Скопје, “Мал Ринг“ дел од Блок Б1, Блок Б6 и Блок Б7 Општина Центар – Скопје.


Прилози: Службен гласник на Општината Центар бр. 07/08.
Образложение од материјалот за седница
Стручна ревизија
Одговор на стручната ревизија
Мислење на Градот Скопје
Одговор на мислењето на Град Скопје

Подносител:
Градоначалник на Град Скопје 
Трифун Костовски

Уставниот суд укина неколку законски одредби

Уставниот суд по летниот одмор на првата седница со неколку укинувања на законски одредби. Интервенција во Законот за урбанистичко и просторно планирање.

Уставен пресече, не може да се менува детален урбанистички план ако урбанистистички проект во него кој од претходно бил утврден и впишан да одстапува од зацртаните пропорции.

Таквата градба нема да се и легализира ниту пак поради неа ќе смее да се менува утврдениот ДУП.

Поништена одредба и во Законот за пензиско и инвалидско осигурување.

Уставниот суд забележал според напишаното, законот како да налагал жените да мора да одат со 62 години во пензија.

Уставен реагира во законот попрецизно да се напише дека на 62 годишна старост на жените им се остава можност да бираат дали сакаат да одат во пензија или да работат уште следните две години.

Поништена и дел од одредбата во Законот за судови која предвидува обврска за работа во време на штрајк.

Неопходно е, смета Уставниот суд, да се утврдат точно и прецизно кои се нужните работи и предмети кои вработените во судовите треба да ги извршуваат кога се во штрајк.

Токму оваа одредба за време на штрајковите на судската администрација претседателите на судовите ја користеа како форма на притисок штрајкот за поголеми плати и подобри услови да биде прекинат.