Гасификација

Оваа година завршува изградбата на магистралните гасоводи Скопје-Гостивар и Неготино- Битола

Годинава ќе заврши изградбата на магистралните гасоводи од Скопје до Гостивар и од Неготино до Битола, со што ќе се поврземе на преносниот систем на гас. Следат нови проекти за интерконекциско поврзување со Грција, Косово и Србија.

Ова денеска го истакнаа министерот за транспорт и врски Благој Бочварски и директорот на Национални Енергетски Ресурси, Бајрам Реџепи.

Тие, заедно со заменик министерот за транспорт и врски Беким Реџепи извршија увид во изградба на магистралниот гасовод Скопје-Тетово-Гостивар.

Оваа делница е инвестиција од 29 милиони евра, досега изградени се околу 80 проценти од трасата или заварени се 53 километри цевки од вкупно 86 километри колку што изнесува вкупната должина на овој проект.

Министерот Бочварски потенцираше за огромното значење на гасификацијата на државата од аспект на заздравување на економијата, намалување на аерозагадувањето, како и поевтин енергенс за граѓаните и компаниите.

„Ги користиме сите технички и човечки ресурси за да може што поскоро да ги завршиме започнатите магистрални делници а воедно да отпочнеме и нови проекти за гасификација на цела територија на државата. Значењето на гасот е силно потенцирано и од граѓаните и од бизнис секторот и затоа ги охрабрувам, ние цврсто стоиме на нашите определби гасот да го доведеме до сите корисници. Очекувам оваа делница да биде завршена годинава, имаме чист терен за работа а изградбата се одвива со добра динамика. Исто така и магистралниот гасовод од Неготино до Битола е во завршна фаза и тој ќе биде оперативен оваа година. Во однос на новите проекти, за оваа година планираме да отпочнеме постaпки за изгрaдба на делницата од Неготино до Гевгелија и да се поврземе со конекторот со Грција, а веќе слeдната да отпочнеме со два нови магистрални делници од Велес до Свети Николе и од Гостивар до Кичево”, изјави Бочварски.

Директорот на Национални Енергетски Ресурси, Бајрам Реџепи истакна дека со завршување на овој проект оваа година, цел Полошки регион и западниот дел од Скопје ќе имаат пристап до преносниот систем на гас.

„Надминати се сите состојби со експропријација на земјиштето, најтешките предели се изградени, добрата вест е дека полесниот дел од трасата оваа година ќе се заврши вклучувајќи ги двете мерно регулациони станици и седумте блок станици. Со тоа ќе се овозможи пристап до преносниот систем на гас и заедно со дистрибутивниот систем да се опслужуваат корисниците. Оваа година започнуваме и постапка за изградба на интеконекторот со Грција, исто така оваа година завршуваме со физибилити студија за поврзување со интеконекторот со Косово и очекувам наредната година да проектираме и конечно нашиот преносен систем да го користеме за да пренесеме гас до нашите северни соседи. Исто е и со конекторот со Србија, заеднички ќе аплицираме до Инвестицискиот фонд на Западен Балкан за физибилити студија и проектирање”, изјави Реџепи.

https://meta.mk/ovaa-godina-zavrshuva-izgradbata-na-magistralnite-gasovodi-skopje-gostivar-i-negotino-bitola/

Македонија се вклучува во изградбата на терминалот за течен природен гас во Александрополис во Грција во близина на границата со Турција. 31 март 2021, 15:41 Со официјалното потпишување на меморандум со Грција за приклучување на Македонија во транс атланскиот гасовод попознат уште како ТАБ практично досегашниот единствени извор Рускиот гас за рок од 2,5 години ќе добие конкуренција и земјава ќе има алтернативен извор на снабдување а со тоа и поголема енергетска сигурност и стабилност. Македонија се вклучува во изградбата на терминалот за течен природен гас во Александрополис во Грција во близина на границата со Турција. Овој терминал е нова независна точка за снабување со природен гас кој доаѓа од Азербејџан единстеваната земја на каспиското море која не е под Руско Влијание, како и течен гас од САД и од многу други земји по конкурентни цени. Владините анализи покажале дека е добро како држава да инвестираме и да имаме сопствеништво на меѓународен гасен терминал и во гасна централа со локација во Грција особено што последниве седум години интензивно се работи на поврзување на голем број стопански објекти и домаќинства на гас а значајно е и учеството во гасната електрана која е своевидна замената за нуклераката Белене. Учеството од 25% во гасната централа која ќе биде со моќност од 800 мегавати е 380 милиони евра а за учествуво од 10% во терминалот за течен гас земјава ќе инвестира 370 милиони евра со подршка на европски проекти. Со овој проект за земјава се создава можност за трајно и стабилно снабдување со природен гас од две страни но исто времено со идното поврзување со гасоводи кон Косово, Албанија и Србија, Македонија со својата позиција ќе прерасне во стратешки важна транзициска рута. https://kanal5.com.mk/makedonija-oficijalno-se-vkluchuva-vo-proektot-aleksandrupoli/a468042

Не знам дали при вас се води дискусия за ползването на гаста за домакински цели , но треба да се знае ,дека колкото да е по-евтина ,исто е и опасна. Гледам при вас сакате да се приклучите во масова гасификациа на домакинствата, а во Виена от неколко години върви обратна тенденция и тренд. Преди 2-3 години неколко кооперации експлоадираха и парламентот взе решение новото жилищно строителство да не биде повеке гасифицирано а свързано към централно отопление и топла вода а в старите сгради инсталациите ке се обноват ,а некаде и демонтират, Аз долги години съм живел во станове с гас и честно казано не сум бил никогаш доволен. Сека година треба на шест месеци да правиш профилактика и ремонт на гасовиот бойлер ,кой чини около 80-100Е., еднаж у годината идват коминочистачи ,кои чистат комините и инсталациите и исто чини 80-100Е.
Секогаш ме беше страв от изтичане на газ ,бев инсталирал во целиот стан индикатори и датчици.
А и илюзия е дека е по-евтино ... не е.
Сега от 2 години во новото жилище съм на централно отопление и топла вода и съм предоволен и спокоен.

ГАСИФИКАЦИЈА НА СКОПЈЕ



Две турски компании се во трка, која од нив ќе ја гради дистрибутивната мрежа за природен гас низ државата. Ќе се избере во јуни, а предност ќе и се даде на таа што ќе понуди приклучок поевтин од 100 евра, за разлика од сегашните 500 евра.

„Ќе започне тендерирањето од 100 евра и тоа ќе претставува придобивка, пред се за домаќинствата коишто ќе имаат низок трошок за приклучување. Исто така очекуваме од новиот приватен партнер да обезбеди соодветни евтини кредити коишто ќе овозможат и на домаќинствата кои што ќе се приклучат на мрежата на природен гас да ја земенат својата инсталација во домовите на рати на повеќе години.“ - изјави Марко Бислимоски, претседател на Регулаторната комисија за енергетика.

Но, кога гасот ќе стигне до домаќинствата? Според планот, најпрво ќе почне да се гради во периферијата на Скопје, онаму каде што сега нема централно греење. Општините и селата ќе можат да се надеваат на гас во 2023 година.

Нема да се чека мрежата да биде изградена во цел град, туку ќе се приклучува, како ќе се гради. Освен за греење гасот ќе користи и за шпорети, бољери, а енергетичарите велат дека на електрична енергија ќе бидат приклучени само светилките и телевизорот во домот. Потрошувачката на струја треба да паднат за 40%.

Гасот во државата ќе биде добредојден и зашто не очекува се поскапа струја. Со либерализацијата на пазарот ЕСМ, како државен производител, годинава обезбедува 70% од потребите, и овој процент до 2025 ќе се намали на 30%.

Тоа ќе повлече поголемо купување на струја на берзите, по повисоки цени, зашто ќе се набавува од трговци, а не од производители. За граѓаните тоа ќе значи повисоки сметки.

https://24.mk/details/gasifikacija-na-skopje

ПО НЕКОЛКУ ГОДИНИ НАЈАВА, ПОЧНА ГАСИФИКАЦИЈАТА НА СТРУМИЧКАТА БОЛНИЦА

Струмичката болница од средина на октомври ќе почне да се грее на гас. По неколку години најави и ветувања, конечно почнаа изградба на котларница и приклучување на овој здравствен комплекс на гасоводната мрежа. Според директорот на ЈП „Струмица гас“, Благој Миловановиќ, на гасоводната мрежа ќе бидат приклучени стариот и новиот дел од болницата, зградата на инфективното одделение, управната зграда и објектот на Здравствен дом Струмица.

„Во првата фаза нема да биде опфатена само зградата на Центарот за јавно здравје. Сите други објекти од овој комплекс ќе бидат приклучени на гасоводната мрежа. Очекувам за месец и половина да биде готова котларницата“, кажа Миловановиќ.

Струмичката болница, која се грееше на нафта, се сметаше за еден од поголемите загадувачи на амбиенталниот воздух, на што реагираа граѓаните. Градоначалникот Коста Јаневски соопшти дека средствата во висина од 6,9 милиони денари биле обезбедени од Владата.

„Болницата беше посочувана како еден од загадувачите и верувам дека со гасификацијата на овие објекти ќе се подобри амбиентланиот воздух во нашиот град“, кажа Јаневски.

Струмица десетина години е гасифицирана со гас кој во компресирана форма се увезува од Бугарија. Досега се изградени околу 41 километар секундарна дистрибутивна мрежа, на која се приклучени околу 330 домаќинства и сите локални јавни институции, но не и најголем дел државни, кои и следната грејна сезона ќе се греат на нафта

https://sdk.mk/index.php/dopisna-mrezha/po-nekolku-godini-najava-pochna-gasifikatsijata-na-strumichkata-bolnitsa/

Порталб: Сопственикот го урна објектот што ја попречуваше гасификацијата на Тетово

Конечно е урнат објектот што ја попречуваше гасификацијата на Тетово неколку месеци, за Порталб.мк потврди Бајрам Реџепи, директор на „Национални енергетски ресурси АД – Скопје“ (НЕР).

Оваа бесправна градба се наоѓаше во близина од само три метри до гасоводот, нешто што е забрането со закон. НЕР претходно побара од Општина Тетово да се урне градбата, меѓутоа не добија одговор. Општина Тетово не одговори ниту на новинарските прашања од Порталб.мк пат за овој случај, и тоа два пати.

Директорот на НЕР потврди дека објектот е урнат од самите сопственици.

„Ние сме операторот што врши пренос на гасот. Дистрибуцијата не ја вршиме ние, значи ние не дистрибуираме низ градот, ниту во Тетово, ниту во другите градови. Тоа ќе биде партнерска компанија на Владата, а постапката за избор на субјектот што во јавно-приватно партнерство ќе треба да го изгради гасоводот е во тек и би требало да заврши некаде околу почетокот на следната година. Потоа, избраната компанија ќе има обврска да ја изгради мрежата за дистрибуција низ сите градови, според спецификациите што се претходно утврдени“, објасни Реџепи за Порталб.мк.

Порталб.мк денеска беше на терен и се уверивме дека се работи.

НЕР АД – Скопје во јуни побара од Општина Тетово да го урне објектот, но оттаму немаше одговор во врска со барањето. Проектот за гасоводот не може да добие одобрение за користење доколку околу него се наоѓаат бесправни градби.

„Проектот за гасоводот нема никогаш да добие одобрение за користење доколку се наоѓаат бесправни градби околу него. Овој објект што ни создава проблеми се наоѓа на 3 метри од гасоводот. Ние првин побаравме од општина Тетово информација дали има градежна дозвола за тој објект, откако нѐ информираа дека нема, побаравме негово уривање, бидејќи само тие имаат надлежност, но сѐ уште не сме добиле одговор“ рече Реџепи во јуни.

Изградбата на гасоводната мрежа за Тетово и Гостивар не е завршена, а како ветување постои од 2017 година. Од Општина Тетово не одговорија на прашањето на Порталб.мк, иако ветија одговор.

Општина Тетово не исполни уште една задача од овој процес, а тоа е основање јавно претпријатие за снабдување со гас.

Инаку, од Владата на РСМ се обезбедени 90 милиони евра за 204 километри мрежа на гасоводот. Еколошките активисти постојано повикуваа да се донесе природниот гас во Полошкиот регион, со оглед дека тој беше еден од најзагадените региони во земјата.

https://meta.mk/portalb-sopstvenikot-go-urna-objektot-shto-ja-poprechuvashe-gasifikacijata-na-tetovo/

За 5 години се гасифицираа само две болници

За 5 години се гасифицираа само две болници и тоа со големо задоцнување. Наместо во 2019-та, гинекологија во Чаир се префрли на гас во септември 2020, а општата болница во Струмица дури месецов, ноември 2021.

– Венко Филипче пред три години изјави дека гасификацијата на општата болница во Куманово е приоритет за Министерство за здравство, но еве и во 2022 година ќе се грее на мазут. Болницата уште во 2017 година има изготвено проект за гасификација, а изградена е и цевка за довод на гас до болницата. За промена на начинот на греење се потребни околу 200 илјади евра – информираат од О2 Иницијатива.

Оттаму потсетуваат дека Владата вети до 2024 година ниту една државна институција нема да се грее со стари и нееколошки системи за греење.

– Што е со болниците во Битола, Тетово, Прилеп, Охрид, Гостивар, Кавадарци, Гевгелија, Велес, Штип, Струга, Кичево, Кочани, Негорци? Со Институтот по белодробни заболувања кај децата во Козле, Универзитетската клиника за физикална медицина и рехабилитација во Капиштец, болницата за геријатриска и палијативна медицина „13 Ноември“ во Ѓорче Петров, психијатриската болница во Бардовци? Да не ги набројуваме здравствените домови. Сите се греат на мазут/нафта/лесно масло – потенцираат оттаму.

https://www.vecer.press/за-5-години-се-гасифицираа-само-две-болн/

Владата ја одложи гасификацијата на земјата за една година

Владата донесе одлука за одложување на постапка за доделување на договорот за воспоставување на јавно приватно партнерство за гасификација на земјата за една година. Рокот од 24 месеци, воспоставен пред две години, сега е 36. Тоа значи дека гасификацијата во населените места требаше да започне во наредниот период, но сега на рокот му се додава уште една година.

Ваквата одлука била донесена откако на една од последните владини седници се рразговарало за продолжување на рокот за изборот на тоа која компанија како приватен партнер ќе го донесе гасот во домовите и останатите потрошувачи преку изградба и одржување на гасната мрежа.

Владата една година одбира помеѓу турските компании „Акса Догалгас Дагити А.С.“ и „Палмет Енерџи Аноним Ширкети“ за воспоставување на јавно приватно партнерство за финансирање, проектирање, изградба, управување, одржување и развивање на дистрибутивниот систем на природен гас низ Македонија, откако претходно заврши првата фаза на конкурентен дијалог за доделување на договор

- Во однос на роковите, во првата одлука рокот за завршување на постапката беше 24 месеци, со последната одлука рокот се продолжува на 36 месеци поради негативните последици од Ковид, мерките за ограничување на движењето и прогласените вондредни состојби, гласи објаснувањето кое го добивме од Министерството за економија, под чија надлежност е изборот на приватниот оператор за гасифицирање на земјата.

Инаку одбраната компанија, според условите од договорот, ќе треба да инвестира 300 милиони евра за гасификација на населените места низ земјата.

Оној што ќе го добие 35-годишниот договор ќе има право да менаџира и да остварува приход од системот со обезбедување на загревање на јавните установи, како и на комерцијалниот сектор и домаќинствата. Во најраната фаза ќе треба да ги гасифицира Аеродром, Бутел, Гази Баба, Ѓорче Петров, Карпош, Кисела Вода, Центар, Чаир, Градско, Демир Капија, Кавадарци, Крива Паланка, Куманово, Неготино, Прилеп, Свети Николе, Штип, Битола, Гостивар, Тетово, Кратово и повеќе рурални средини во непосредна близина.


Компаниите уште пред една година ја минаа фазата на евалуација на пријави за учество, односно евалуација на нивната економско- финансиска способност, како и техничка способност во согласност со критериумите кои беа наведени во тендерската документација.

Владата во декември 2019 година донесе одлука за започнување на постапка за доделување на договор на приватен партнер кој ќе го изгради и потоа ќе наплаќа од дистрибутивниот систем на природен гас во земјата, додека паралелно државниот НЕР ги гради магистралните гасоводи и интерконективните приклучоци.

Според критериумите, компаниите треба да имаат најмалку 150 милиони евра годишен приход во последните три години. Инвеститорот за четири години треба да изгради најмалку 50 отсто од мрежата во градските општини и најмалку 20 отсто во руралните општини.

Договорот ќе го добие оној кој ќе понуди најмала висината на надоместок за приклучок кај крајните корисници, а критериум ќе биде и висина на надоместок за концесија и времетраењето на изградбата. Според владината одлука, приватниот партнер ќе плаќа за договорот доделен од државата така што ќе издвојува однапред предвиден процент од годишниот приход.

https://faktor.mk/vladata-ja-odlozi-gasifikacijata-na-zemjata-za-edna-godina

ОД НОВА ГОДИНА НАД 200 ОТСТО ПОВИСОКИ СМЕТКИТЕ ЗА ГАС ВО КУМАНОВО

Домаќинствата и фирмите во Куманово кои користат гас од овој месец ќе плаќаат сметки повисоки за над 200 отсто. Наместо 25 денари за кубен метар како што беше минатата година, сега потрошениот гас ќе го плаќаат по 80 денари. Ова огромно зголемување на цената се должи на светската криза, па ЈП „Куманово-гас“ новата набавка на гас го чинеше двапати поскапо во однос на предходната година.

„Ова не е до нас и не зависи од нас, таква е состојбата во целата држава и во Европа. Досега гасот го продававме по 25 денари за метар кубен, а сега ќе биде 80 денари. Граѓаните се бунеа дека им е скапо и на предходната цена, а сега можам да замислам. Ако некој месечно трошел 100 кубика и плаќал 2.500 денари сега ќе треба да плаќа 8.000 денари. Ние ги известивме потрошувачите за поскапувањето и тие ќе одлучат дали ќе го користат или не“, изјави директорот на ЈП „Куманово-гас“ Никола Денковски.

Во Куманово има 400 физички и правни лица потрошувачи на гас, а општината и јавното претпријатие во изминатите години го субвенционираа приклучокот за граѓаните, заради финансиските и еколошките придобивки. На гасоводот се приклучени и повеќа јавни институции, училишта, градинките и други државни и општински установи, за кои зголемувањето на цената на гасот ќе биде удар по нивните буџети.

Претпријатието има обезбедно гас само за еден месец, а постоела опасност да остане и без тие количини и да ги остави потрошувачите без енергенсот, ако снабдувачот во државата не ја добиел нарачката од рускиот пазар.

„Имавме известување од фирмата ‘Пром-гас’, од 1 јануари нашите потрошувачи да си бараат алтренативно решение за затоплување, бидејќи нема да ни испорачаат ни минимални количини. Во последен момент, на 31 декември успеавме да добиеме гас само за јануари. Ние уште во септември побаравме 130.000 кубни метри гас, а добивме само 90 кубици. Според најавите на трговците, се очекува во наредниот период да се стабилизира снабдувањето на светскиот пазар и постепено да се вратат старите цени. Да се надеваме дека ќе биде така“, вели Денковски.

Тој смета дека набавените количини ќе им траат и повеќе од еден месец, бидејќи високата цена ќе ја намали потрошувачката на гас. Олеснителна околност е и тоа што училиштата не работат поради зимскиот распуст, па и тука ќе заштедат.

https://sdk.mk/index.php/dopisna-mrezha/od-nova-godina-nad-200-otsto-povisoki-smetkite-za-gas-vo-kumanovo/

ЗА 90 ОТСТО ПОСКАПЕ ГАСОТ ВО СТРУМИЦА, ОПШТИНАТА ЌЕ СУБВЕНЦИОНИРА 10 ДЕНАРИ ОД ЦЕНАТА ЗА КУБИК

Од овој месец сметките за гас во Струмица ќе бидат повисоки за речиси 90 отсто, откако цената за потрошен кубен гас од 46,5 се зголеми на 80,4 денари. Веста ја потврди и директорот на ЈП „Струмица гас“ Благој Милановиќ, кој соопшти дека зголемувањето на цената е резултат на енергетската криза и повисоките цени на пазарот.

На мрежата во Струмица на гас се греат околу 400 домакинства, фирми и јавни институции.

„Од 1 јануари цените на природниот гас и во нашата држава како и во соседството се зголемени и повеќе не е можно да ни испорачуваат компресиран природен гас по цена како во месед декември, кога ние го набавувавме од 591 евра за илјада кубни метри гас, а на пазарите достигнуваше цена од 1.300 до 2.200 евра. Од таа причина, новата цена на природен гас за месец јануари ќе биде 80,4 денари со вклучен ДДВ“, соопштија од „Струмица гас“.

Општина Струмица оваа година одлучи да ја субвенционира цената на гасот за домаќинствата во висина од 10 денар, за што во буџетот имаат предвидено 3 милиони денари. Ова значи дека за 100 кубика потрошени кубни метри гас, физичките лица ќе добиваат по илјада денари субвенции. Засега се утврдува методологијата како ќе се враќаат парите, дали директно на сметките на корисниците или пак ќе им се одбива од сметките.

Во Струмица, каде е изградена гасоводна мрежа од околу 40 километри, гасот се набавува во компресирана форма и потоа се декомпресира во станицата и се пушта до крајните корисници. Директорот Милановиќ кажа дека не постои опасност дане се обезбедат потребните количини гас, бидејќи за Струмица се набавува компресиран гас кој го има во Скопје, Бугарија, Србија, Солун.

https://sdk.mk/index.php/dopisna-mrezha/za-90-otsto-poskape-gasot-vo-strumitsa-opshtinata-ke-subventsionira-10-denari-od-tsenata-za-kubik/