Рамстор на државата и должи над милион евра!

Компанијата Рамстор Македонија ДОО Скопје која стопанисува со истоимениот трговски центар, ќе мора во рок од 15 дена на сметката на Министерството за транспорт и врски да уплати 70 милиони денари (1,13 милиони евра). Вака одлучи Комисијата за заштита на конкуренцијата, која откако пред една година повела истрага за оценка на државната помош која на Рамстор Македонија во 2004 година му ја додели Министерството за транспорт и врски за купување на државно земјиште за изградба на трговскиот центар Рамстор

Се урива доградбата на станот на Станинов

Наголемо се гради зградата на „Платник“

Жителите од соседната зграда, чиј премин се користи за пренесување на градежниот материјал, протестираат дека инвеститорот не ги почитува одлуките на инспекторатот, ја продолжува градбата и им ја загрозува безбедноста

Градежните работи на зградата на улицата Киро Крстевски-Платник во центарот на градот не престануваат и покрај протестите на жителите од соседната зграда и забраната за градба издадена од Државниот инспекторат за градежништво. Градбата нормално се одвива и веќе е стасано до плочата на која треба да се издигне вториот кат. Инвеститор на спорната зграда е компанијата „Вајт енд сол“, а ја гради „Квадрат инженеринг“.

Жителите од зградата со број 11 со месеци негодуваат што инвеститорот незаконски го користи пасажот на нивната зграда за пренесување на градежниот материјал и за влез на градежните машини. Велат дека биле изиграни од претходната градоначалничка на Центар, Виолета Аларова, која пред локалните избори наместо предвидениот деловен објект на два ката и паркинг, дозволила на слободниот простор, кој се наоѓа сред четири згради, да се нацрта маркичка за петкатница од 18 метри височина.

- Државниот инспекторат за градежништво на 17 јули со решение му нареди на „Вајт енд сол“ да ја прекине градбата, бидејќи претходно не прибавил одобрение за подготвителни работи. Во решението стои и дека изградбата на објектот ја врши правно лице без лиценца. Во меѓувреме, на 20 јули на инвеститорот му беше доставена лиценца Ц за изведувач на градба, а Општина Центар му изработи одобрение за подготвителни работи - велат станарите.

Тие објаснуваат дека државните инспектори за градежништво констатирале дека постојниот пасаж, кој инвеститорот го користи за влез во градежната парцела, не е идентичен со предвидениот пасаж според најновите измени во детаљниот урбанистички план. Поентата е во тоа што станарите го изградиле пасажот според стариот детален план, а Општина Центар во новиот план нацртала поинаков пасаж, кој не одговара на фактичката состојба на теренот, но одговара за издавање дозвола низ него да се транспортираат градежни машини и материјал. Станарите за ова имаат и геодетски елаборат.

- Ние сме сопственици на пасажот. За тоа поседуваме и имотни листови. Не е дозволено да се минува низ приватен имот. Законот за градење не дозволува да се гради објект доколку претходно не е обезбеден пристап до парцелата. А во овој случај инвеститорот тоа си го дозволува - велат станарите од зградата 11.

Тие се плашат за својата безбедност затоа што пасажот не може да го издржи товарот од багерите и од натоварените камиони, бидејќи под него има гаражи.

- Од Институтот за земјотресно инженерство добивме писмена потврда дека пасажот може да издржи само лесни моторни возила. Исто така, овој премин не е толку висок за да може низ него да минат противпожарните возила. Што ако некогаш се запали зградата што ќе биде изградена внатре - се прашуваат станарите.

Тие потенцираат дека не се почитувани условите за градба кои предвидуваат 1,2 паркинг-место за еден стан. Во подземните гаражи имаат само 13 паркинг-места, а им недостасуваат уште 40. Токму дел од слободната површина на која сега се гради била наменети за паркинг.

Според Драган Стефановски, вработен во „Квадрат инженеринг“, тие ја исполниле обврската наложена од Државниот градежен инспекторат и извадиле лиценца за изведувач и одобрение за подготвителни работи.

- Нема ништо спорно за понатаму да не градиме. Ја испочитувавме забелешката на инспекторатот и ги доставивме потребните документи. Нема ништо спорно. А за детаљниот план, нека одат во ИНПУМА и нека го сменат. Зградата постои во плановите неколку години, а станарите кажуваат тоа што им оди во прилог. Јас не сум виновен што тие потпишаа согласност кај нотар за да се гради објектот. Тие си добија станови, еден од нив и стан и дуќан и 25.000 евра во готово. Сите се обештетени - тврди Стефановски.

Инвеститорот „Вајт енд соул“ вчера беше недостапен за изјава. Тие го смениле седиштето на фирмата, кое до скоро беше на истата улица Киро Крстевски- Платник, а со тоа и телефонските броеви.

Жителите велат дека се врши секојдневен притисок врз нив, со тоа што им се поднесувани прекршочни пријави за нарушување на јавниот ред и мир во времето кога протестираа и се обидуваа да ги спречат багерите. И покрај тоа, тие не се откажуваат од правдата и поднеле иницијатива до Уставниот суд затоа што сметаат дека на најгруб начин им се скратува правото на сопственост.

Од Општина Центар се оградуваат од одговорноста за случајот.

- Овој предмет сега е во надлежност на Државниот инспекторат за градежништво. Ние повеќе немаме ништо со тоа - изјави Милан Пижула, општински градежен инспектор во Центар.

Од Државниот инспекторат објаснуваат дека до градоначалникот на Општина Центар издале барање за поништување на издаденото решение за локациски услови, бидејќи е утврдено дека е спротивно на Законот за просторно и урбанистичко планирање.

- Инспекторатот до градоначалникот достави налог за повторување на постапката за издавање одобрение за градење, поради новооткриени факти и докази. И Општината Центар како надлежна мора да ја повтори постапката за издавање на одобрението на градба - вели Сашо Дуковски, директор на Државниот инспекторат за градежништво и урбанизам.

Станарите од зградата 11 во мај со жив ѕид почнаа да го бранат својот пасаж од багерите. Тие секојдневно се менуваа пред пасажот и не дозволуваа влез на градежните машини. Инвеститорот тогаш нарача обезбедување од „Комета“ за да ги спречи жителите во намерите.

Анела Петрова

Шара подиве од дивоградби

Од локалната власт во Тетово велат дека политичари и други функционери градат нелегални викендички на Попова Шапка и дека овој бисер на Шар Планина подолг период е оставен на милост и немилост на урбаната мафија, која гради без никаков критериум или документација

Урбанистички хаос владее во зимско-рекреативниот центар Попова Шапка на Шар Планина. Попова Шапка повеќе личи на големо градилиште отколку на простор кој треба да биде дел или да се граничи со планираниот национален парк. Се градат куќи наместо викендички. Насекаде има песок, цемент, дрвена граѓа и луѓе што работат на довршување на почнатите градби. Ваква слика може да се види на Попова Шапка каде што интензивно се градат 15 куќи, за кои од локалната самоуправа велат дека се дивоградби и ги посочуваат како најсвеж пример за урбанистичкиот хаос што владее таму.

Работниците што ги затекнавме велат дека не знаат за кого градат ниту чии се објектите. Само им било кажано да градат и ништо повеќе. Не откриваат ниту од која или преку која компанија се најмени. Од Општина Тетово велат дека политичари и функционери градат нелегални викендички на Попова Шапка.


КУЌИ НАМЕСТО ВИКЕНДИЧКИ

Во викенд-населбата има околу 500 викендички и куќи. Од поранешната месна заедница Попова Шапка, а сега здружение на граѓани, велат дека само годинава забележале околу 20 дивоградби во викенд-населбата. Покрај дивоградбите има и други незаконски зафати во викенд-населбата. Најчесто се доградува или оградува просторот околу објектите, што е незаконски.

- Долг период немаше никаква контрола. Голем е бројот на дивоградби или пречекорувања на законскиот габарит на објектите. Имаме мало влијание врз целиот процес. Не можеме да ги спречиме ниту да вршиме контрола. Имаме информации дека најчесто се узурпира повеќе простор од купениот. Сме пријавиле во повеќе наврати во Општината - рече претседателот на Здружението на граѓани, Авзија Ризвани.

Тој, како најчест прекршок го посочува оградувањето на дворното место пред викендичките, што е незаконски. Според законот, објектите на Попова Шапка не треба да имаат огради, бидејќи како туристичко место луѓето имаат право да се движат насекаде.

- Најчесто има проблеми со плацовите што беа купени преку Министерството за транспорт и врски. Сопствениците немаат одобрение за градба, а веќе се прават објекти, кои најчесто го надминуваат дозволениот габарит од 60 квадратни метри. На двапати лани беа продадени околу 250 плаца од по 60 квадратни метри за кои почетната цена изнесуваше 250 евра. Друг проблем е што нема доволно инфраструктура за толку нагло урбанизирање на тој простор, како што е канализација, вода, електрична енергија и пристапни патови, а се гради наголемо. За ова некој треба да одговара - смета Ризвани.

Градоначалникот на Тетово, Сади Беџети, завчера обвини дека политичари и видни функционери градат нелегални викендици на Попова Шапка. Тој не сака да ги откри по име, но вели дека во тек е градба на објекти без дозвола. Одговорниот на Секторот за инспекциски надзор при локалната самоуправа, Неритан Ферати, посочува дека на Попова Шапка владее урбанистички хаос и дека викенд-населбата изминативе 10 години била сосема запоставена и оставена на грижа и негрижа на локалните моќници.

- Најчесто има прекршување на габаритот на објектите по висина и по ширина. Се знае дека со тоа одобрението за градба станува ништожно и објектот е дивоградба. Бисерот на Шара подолг период е оставен на милост и немилост на урбаната мафија, која гради без никаков критериум или документација - рече Ферати.


И ЗА КОМАНДАНТИТЕ ВАЖИ ЗАКОНОТ

Тој посочи дека иако во повеќе наврати се обиделе да извршат контрола, полицијата не им асистирала. Досега инспекциските служби утврдиле 62 дивоизградени објекта, но се сомневаат дека тој број е многу поголем.

- Досега имаме околу 10 правосилни решенија за уривање на дивоградбите, но не можеме да ги спроведеме без полициска асистенција, а исто така голем проблем е тоа што не можеме да утврдиме кој е сопственик на тие објекти - рече Ферати.

Градоначалникот Беџети обвини дека токму тие што треба да ја промовираат акцијата на Владата за прогласување на Шар Планина за национален парк, прават злоупотреби. Во борбата против дивоградбите тој најави дека на Попова Шапка постојано ќе има инспектор за да ја контролира состојбата.

- Ако некој бил командант, не значи дека може да гради без дозвола. Се знае како оди процедурата и кој е законот. Едниот е од Шипковица, а другиот е од Бродец. Кога ќе имаме сигурни докази ќе ги кажеме и со име и презиме иако и сега знаеме за кои станува збор, бидејќи постојано се покрај објектите - рече градоначалникот Беџети.

Тој неодамна донесе одлука на одреден период да се прекине со издавање одобрение за градба за Попова Шапка. Имало несовпаѓање на податоците на агенцијата за катастар, приватните геодетски куќи и детаљниот урбанистички план за Попова Шапка. Да се прекине постапката за издавање одобрение за градење додека да се донесе нов детален урбанистички план. На иста парцела, која се поклопува кај двајца сопственици, треба да се градат две викендици или пак на простор кој е предвиден за пат, според постојните податоци, треба да се изгради викендичка, се жалат сопствениците на геодетски фирми од Тетово. Изминатиот викенд на Попова Шапка се одржа трибина за заштита и за промовирање на Шар Планина. Дел од заклучоците беа дека треба да прекине узурпирањето на природните богатства. Министерот за животна средина, Неџати Јакупи, најави дека е во тек подготвувањето на границите на националниот парк.

Национален парк со 25 планински очи

Со прогласување на Шар Планина за национален парк, развој на алтернативниот туризам и инвестиции во зимско-рекреативниот центар Попова Шапка, може да се врати некогашниот сјај на оваа планинска убавица. Со околу 200 ендемски растенија и повеќе од 40 видови дивеч, Шар Планина е непроценливо богатство. Експертите велат кога деловите на Шара во Македонија и Албанија би се заштитиле заедно со националниот парк Маврово би сочинувале целина од 150.000 хектари, која би била најголемо заштитено подрачје во Европа.

На Шара има 25 планински езера, повеќе од 200 извори на чиста вода, околу 25 врвови над 2.500 метри од кои највисок е Титов Врв со 2.747 метри. Повеќе од 4 месеци во текот на година снежната покривка изнесува околу еден метар, што е идеално за развој на зимскиот туризам.

Илчо Цветаноски

„Езерце“ почестено со дозвола

Наместо да го поништи договорот со закупецот поради бесправна доградба, Општина Центар на „Вени, види, вици“ и' издала нова дозвола со која може објектот да го реконструира како што сака

Општина Центар повторно го прекрши зборот кога станува збор за кафеаната „Езерце“ во Градски парк, односно наместо да го прекинат договорот за закуп со фирмата „Вени, види, вици“ како што најавуваа, тие и' издале нова дозвола за враќање на објектот во првобитна состојба. Договорот за закуп требаше да биде раскинат затоа што закупците пред една година на своја рака и без соодветни одобренија направија доградба на стариот објект, која подоцна беше урната.

- Договорот за закуп не е прекинат. Објектот се' уште е во сопственост на Општина Центар. Одобрението за градба е издадено во мај, а објектот треба да биде изграден во рок од шест месеци од конечноста на решението. Објектот по реконструкцијата ќе биде идентичен како што бил во првобитната состојба. Договорот со закупецот не е раскинат, бидејќи се испочитувани барањата на Општина Центар - велат во општината.

Повеќе од една година од кафеаната во Градскиот парк има само еден ѕид, кој гледа кон езерцето. Нема работници, нема изградба и не е познато до кога атрактивната локација во паркот ќе изгледа како руина.

Општина Центар е сопственик на објектот „Езерце“ од 2000 година, а пред година и пол го даде под закуп со лицитација. На наддавањето победи фирмата „Вени, види, вици“, сопственик и на ресторанот „Ања“, која понуди 10.000 евра за месечна кирија.

Пред да го урне, закупецот побарал од Општината дозвола да го смени покривот, бидејќи бил оштетен од прекланскиот снег, а побарал и дозвола за реновирање на кујната и на внатрешноста. Тогаш во Општината тврдеа дека објектот „Езерце“ е под заштита и дека не смее да се урне, ниту пак може да се менува неговиот надворешен изглед. При реконструкцијата сопственикот не смееше да излегува од постоечкиот габарит, а освен промената на ентериерот и на кујната, нему не му беше дозволено ни да доградува ни да го надградува објектот.

Наместо да постапи како што и' било дозволено, односно да интервенира само во внатрешноста, фирмата изгради уште еден полукат над објектот. Тогаш градежната инспекција на Центар ја урна бесправната доградба под притисок на јавноста.

- Наемопримателот по своја иницијатива и без никакво одобрение почна со градежните зафати - изјави тогаш Лидија Неделковска, шеф на кабинетот на поранешната градоначалничка на Центар, Виолета Аларова.

Кираџиите изјавуваа дека поседуваат одобрение за реконструкција на покривот и на други делови од објектот и тврдеа дека не постапуваат надвор од дозволеното. Сепак, тогаш за случајот се заинтересира и Антикорупциската комисија, но до денеска нема ниту глас за случајот.

Ќе се обновува езерцето

Езерото кај кафеаната "Езерце" ќе се реконструира, со цел да се подобри водостојот. Градските власти распишаа тендер за овој канал со вода, но не даваат детали колку ќе чини обновата и што се' ќе опфати. Не одговорија ни како дошло до проблеми со водостојот во езерскиот систем во паркот, со оглед на тоа дека тој беше темелно исчистен во март годинава.

- Поради малиот испуст на вода, кој се појави летово, Град Скопје презема мерки за санација на езерцето и распиша јавна набавка за избор на изведувач. Штом ќе одбереме изведувач ќе почне санацијата на езерцето - изјавија од одделението за односи со јавност во Градот Скопје.

Во распишаниот јавен повик може да се види дека закажан датум за отворање на понудите бил 29 септември. Од Градот не соопштија колку понуди пристигнале. Ова езеро, но и останатите во паркот, во март беа порибени со 400 килограми риба.