Нема ниту мрежичка, ниту обрач од најавениот голем комплекс од кошаркарски игралишта, наречен „Петарленд“ што кошаркарот Петар Наумовски требаше да го изгради на Водно. Наместо тоа, со неговиот партнер Зоран Азманов направија резиденцијални објекти во кои продаваат станови по 1.538 евра за квадрат

Наместо тапкања од кошаркарски топки, играње баскет, навивање за подобрите, изминативе пет-шест години на земјиштето на Водно, со површина од 9.400 квадрати, непосредно до поранешниот хотел „Панорама“ се слуша брмчење на градежни машини и чукања на алатки. Овој простор, Петар Пеце Наумовски, поранешен репрезентативец во кошарка и пратеник во Собранието, го доби од државата за само 20 евра од квадрат. Сега на местото на кое Наумовски најавуваше дека ќе направи голем кошаркарски тренинг-центар, наместо да се развиваат млади таленти во една од најпопуларните игри во земјава и во светот, новопечени чорбаџии, дојденци, кои сонуваат да живеат на Водно, се вселуваат во суперлуксузните и прескапи станови со фантастичен поглед на градот.

Комплексот „Петарленд“, како што познатиот спортист го нарекуваше својот проект, го заменија згради со приземје, три или повеќе ката и потпокрив. Во секоја зграда има по 50 станови, а вниманието на минувачите го привлекуваат блескавите и убави луксузни жолти фасади, со кована ограда на секој прозорец. Од спортските терени почна да се гради само едно тениско игралиште, кое сега е опколено со три големи објекти. Жителите кои можеле да си дозволат да одвојат по 1.538 евра за квадрат станбена површина, никната врз несудените кошаркарски терени, велат дека комплексот е премногу убав, но им пречи тоа што по цели денови мајстори им тропаат „на глава“. Ама сé ќе се заборави за некоја година кога ќе се направат објектите со тениското игралиште. За тоа вреди и да се издржи некоја година олкава бучава, објаснуваат станарите. Свежиот водњански воздух ќе остане привилегија само за оние што може да го платат, а љубителите на кошарката ќе мора и понатаму да се задоволуваат со кошаркарски игралишта среде градскиот смог.


ОД ЗЕЛЕНИ ПОВРШИНИ ДО ТРИ ЗГРАДИ


Долг е патот што популарниот Пеце Наумовски мораше да го помине за да успее заедно со својот партнер во овој проект, познатиот бизнисмен Зоран Азманов, да го изгради ексклузивниот станбен комплекс на Водно. Особено, ако се знае дека во 2002 година, кога ја купи парцелата од поранешниот премиер Љубчо Георгиевски, тоа место, кое се нарекува Големо Курило, според сите урбанистички планови е планирано за зеленило, а така требало и да остане.

Тој почнал подготовки за градење, но веднаш запрел, бидејќи не му се усогласувале плановите. Но токму во 2002 година привршуваше изработката и се усвојуваше новиот и сé уште важечки Генерален урбанистички план за Скопје. Тогашното Јавно претпријатие за изработка на урбанистички пласнови, а сега Агенција за планирање на просторот, чиј тим експерти го изработи планот, на оваа зелена локација вметна маркичка наменета за спортски комплекс, на што остро реагираше поранешниот градоначалник Ристо Пенов. Тогашното раководство на Агенцијата објаснуваше дека спортската намена може да се однесува и на пешачки патеки и на шеталишта, односно дека не е неопходно таму да се градат спортски објекти.

Потоа, врз основа на Генералниот план општината Центар два пати го менува Деталниот урбанистички план за локалитетот Тасино чешмиче 1, кој го опфаќа и овој простор. Првата измена е направена во 2002 година, кога на локацијата се вметнуваат спортски терени, а во 2003 година се направени нови, но делумни измени, со кои парцелата станала резиденцијален комплекс со угостителско-туристички објекти.

И антикорупциската комисија се интересираше за случајот и бараше од Виолета Аларова, тогашната градоначалничка на Центар, да објасни зошто се правеле толку измени во плановите за кратко време. Но Аларова не одговори, ниту пак, антикорупционерите настојуваа овој случај да се расветли.


ЧЕТИРИ МИЛИОНИ ЕВРА ЗИЈАН ЗА ДРЖАВАТА


Ако плацот што Наумовски го купи за одвај 200.000 евра, се продаде по реална пазарна цена државата би можела да заработи околу четири милиони евра. А сега ќе го собира кајмакот, заедно со партнерот Зоран Азманов.

Наумовски не сака да коментира ништо за неговите бизниси, бидејќи, како што вели, ниту тој се мешал во нечии приватни работи, ниту сакал да му се мешаат. Азманов, пак, вели дека си платил регуларно за да учествува во изградбата на објектите, која е легална и со целосна градежна документација.

- Зградите се едни од најлуксузните во градот и се опремени со сé што е потребно. Имаат и двор и паркиралишта, а наскоро ќе направиме и спортски терени. Не знам што се случувало пред јас да влезам во овој проект и што се предвидувало со урбанистичките планови. Но сега, сé се прави законски. Ако не беше така, немаше ни да вложам толку многу пари за нешто што може во секој момент да биде запрено - додава Азманов.

Трипати неуспешно се нуди на продажба земјиштето во близина на селото Здуње, покрај езерото Козјак, кое се смета за главен адут за развој на еден од најсиромашните и најзаостанати краишта во Македонија