Според законот градилиште, како ова овде - каде нема табла со информации за инвеститорот и дозволите, треба да биде затворено.

НОВА УЈДУРМА НА УРБАНАТА МАФИЈА

Тричлена комисија од 5 ката прави колку ќе побараш

Општинската власт само со еден потпис, преку тричлена комисија, без јавна расправа пред граѓаните и стручњаците и без одлука на советот на општината ги менуваат условите за градба и дозволуваат никнување на згра­ди монструми

По до­не­се­на­та одлука, општината има обврска за тоа да ги информира само лицето под­но­си­тел, односно инвеститорот, и општинскиот урбанистички инспектор, па да биде за­ве­де­но во архива

Тричлена комисија, на чело со градоначалникот на општината, дозволува згради од пет ката да пораснат во повеќекатници. Општинарите само со еден потпис, без согласност од совет на општина и без јавна расправа пред граѓаните и стручњаците, интервенираат во деталните урбанистички планови и дозволуваат никнување на згради монструми. Ова е дозволено лани летото, со измените на Законот за просторно и урбанистичко планирање.
Во измените стои дека со државна и локална урбанистичка планска документација може да се менуваат урбанистичките планови во делот на локациски услови и максимална површина за градење. Тоа значи дека инвеститорот може да побара промена на првичните дадени локациски услови, односно ако му било дозволено да дигне објект од 10 метри, да добие дозвола за дупло повеќе. Согласноста за одредените измени во планот ја дава тричлена комисија, која ја формира градоначалникот на општината.
Неофицијално, за една година од примената на Законот, на територија на целата држава општинските комисии направиле измени на условите за градба во 2.000 случаи. Најмногу во Скопје, и тоа на територијата на Општина Центар.
Меѓу последните примери е измена на локациски услови на две згради спроти Министерството за внатрешни работи. Според Деталниот урбанистички план кој, откако помина на јавна анкета и стручна расправа, го усвои Советот на Општина Центар, за оваа локација вцртана е маркичка за зграда од пет ката, односно 15 метри. Но, по барање на инвеститорот, градоначалникот Владимир Тодоровиќ и неговата тричлена комисија ја зголемуваат маркичката за зграда од пет на 10 ката, плус потпокрив, односно до висина од 30 метри.
Ваквиот начин за интервенција во деталните планови, според стручњаците, е неуставен и и остава отворени врати на урбаната мафија да гради згради чудовишта, кои воопшто не биле предвидени со првичниот ДУП. Токму поради тоа, пред шест месеци поведена е постапка пред Уставниот суд за укинување на ваквите измени на Законот за просторно и урбанистичко планирање.
"Неверојатен е фактот што само со еден потпис зад затворени врати, преку ноќ се овозможува да се прават измени во ДУП-от. Тој план претходно поминал на јавна и стручна анкета, и граѓаните мислат дека на одредена локација ќе има зграда на пет ката. Арно ама, градоначалникот една вечер става свој потпис и му дава можност на инвеститорот таа зграда да стане десеткатница. Па тоа го нема никаде. Со ваквата измена и се дава благослов за работа на урбаната мафија. Токму затоа, поведена е и постапка пред Уставен суд каде што, со сигурност, овие измени ќе паднат. Но Уставниот суд веќе половина година никако да ја разгледа нашата иницијатива, и се остава време градоначалниците да потпишат стотици вакви барања и насекаде низ градот да ни никнат згради монструми", вели Мирослав Грчев, подносител на иницијативата за укинување на измените на Законот за просторно и урбанистичко планирање.
Работата е толку тајна, што за новите измени никој не се информира. По донесената одлука, општината има обврска за тоа да го информира лицето подносител, односно инвеститорот, и општински урбанистички инспектор, па да биде заведено во архива. Измените не се даваат на увид на јавноста ниту, пак, ги разгледува советот на општината. А.Антевска

Јакимовски: Ако попуштам, Козле и тафталиџе ќе станат дебар Маало

И градоначалникот на Општина Карпош Стевче Јакимовски вели дека ваквите измени на Законот и овозможија на урбаната мафија да прави 'ршум низ оп­шти­ни­те. Тој тврди де­ка откако се донесени овие бесмислени измени, секојдневни се притисоците од ин­вес­ти­то­ри­те за зголемување на катноста која е пропишана со ДУП-вите.
"Ка­ко е можно со помал правосилен акт да се интервенира во повисок. Тоа е исто ка­ко со закон да интервенираме во Устав. Во ред е да има можност да се ин­тер­ве­ни­ра само десетина проценти во однос на целиот објект, а не сто отсто, па објект од 100 квадрати, да прерасне во 350 квадрати. Поради ваквите измени, јас и ос­та­на­ти­те градоначалници секојдневно имаме огромни притисоци. Досега во мојата оп­шти­на стигнале околу 300 барања за зголемување на катноста. Па ако ги одобрам, то­гаш Козле, Тафталиџе и Нерези ќе станат она што денеска е Дебар маало", вели гра­до­на­чал­ни­кот Јакимовски.

МИНИСТЕРСТВО ЗА ТРАНСПОРТ И ВРСКИ: Општината мора да спроведе јавна расправа како за ДУП

Во­ве­ду­ва­ње­то на Локална урбанистичка планска документација (ЛУПД) прет­ста­ву­ва поволност за граѓаните побрзо и поедноставно да ги остварат сво­и­те права. Процедурата за изработка на оваа документација е јасно де­фи­ни­ра­на во Законот за просторно и урбанистичко планирање и се спро­ве­ду­ва од општината. Имено, ЛУПД, во рамки на веќе фор­ми­ра­на градежна парцела со ДУП може да се донесе само заради усог­ла­су­ва­ње на површината за градење и максималната висина на градбата со стан­дар­ди­те и нормативите за урбанистичко планирање.
Се­ко­ја парцела притоа мора да го задоволува потребниот број паркинг - мес­та, да има адекватно сообраќајно решение, целосната постапка се во­ди во рамките на локалната самоуправа. Овие законски решенија се во на­со­ка на максимално искористување на земјиштето.
ЛУПД се изработува од овластено правно лице и на истата се вр­ши задолжителна стручна ревизија, исто така, од овластено прав­но лице. Предлог за одобрување или за одбивање на барањето за одоб­ру­ва­ње доставува стручна комисија, формирана во општината.
Со последните измени и дополнувања на Законот за просторно и ур­ба­нис­тич­ко планирање се предвидува општината да спроведе јавна пре­зен­та­ци­ја и јавна анкета, на ист начин и во иста постапка како што се спроведува за деталните урбанистички планови.

УРБАН ХАОС: ЗГРАДИТЕ ЧУДОВИШТА ВО ЦЕНТАРОТ НА СКОПЈЕ СТАНАА ОПАСНИ ПО ЖИВОТ

Седумкатницата кај МВР ќе го урне ридот

Од Општина Центар издале наредба до инвеститорот да ја стопира градбата и во рок од дваесет дена да ги изгради потпорните ѕидови, а доколку тоа не го стори, зградата што преку ноќ стана седумкатница, ќе биде урната

Зградата на улица Димитар Мирчев бб во Скопје, веднаш спроти Министерството за внатрешни работи, која пред неколку месеци, со само еден потпис од тричлена комисија во Општина Центар стана седумкатница, деновиве ја загрози стабилноста на околното земјиште и сигурноста на соседниот објект. Двојното зголемување на висината на зградата, од три на седум ката доведе до лизгање на земјиштето и одронување на ридот, па малку фали да ги затрупа околните згради.
Ваквите нуспојави, според стручњаците воопшто не се изненадување и се очекувани уште од лани летото кога се направија измени во Законот за просторно и урбанистичко планирање, согласно кои со државна и локална урбанистичка планска документација може да се менуваат урбанистичките планови. Тоа практично значи дека инвеститорите можат во текот на градбата да си побараат промена на првичните дадени локациски услови, па од дозвола за објект од 10 метри, да добие дозвола за двојно повеќе, како во овој случај.
Од Општина Центар ги потврдија пропустите на инвеститорот ДГ "ТИМ" од Скопје, притоа објаснувајќи дека веќе му издале наредба да ја стопира градбата додека не ги изгради неопходните потпорни ѕидови. Рокот за подигање на заштитните столбови е дваесет дена, кој доколку не се испочитува, велат општинарите, следува уривање.
"Овластениот градежен инспектор во Општина Центар изврши инспекциски надзор на самото место и со записник констатира дека при градбата на објектот е загрозена стабилноста на околното земјиште. Во рок кој е предвиден со Законот за градење, инвеститорот се задолжува да изгради потпорни ѕидови и да ја усогласи градбата со законските одредби. Ако не се прекине изградбата и не се испочитува наредбата, согласно член 134 од Законот ќе се донесе решение за отстранување на објектот", вели Јовица Ацковски, портпарол на Општина Центар.
Ваквиот начин за интервенција во деталните планови, според стручњаците, е неуставен и остава отворени врати на урбаната мафија да гради згради чудовишта, кои воопшто не биле предвидени со првичниот ДУП. Токму поради тоа, пред осум месеци беше поведена постапка пред Уставниот суд за укинување на ваквите измени на Законот за просторно и урбанистичко планирање, но досега Судот не одлучувал по оваа иницијатива.
Неофицијално, во Македонија бројот на новоградби чии локациски услови се промениле преку овој оспорен член од Законотм се движи околу 2.000. Зградите чудовишта најмногубројни се во Скопје, и тоа на територијата на Општина Центар.
(М.Ѓ.)
В.Тануровски