Лумикс

КОЈ КОГО И ШТО ЧЕКА

Лумикс ќе се отвори на пролет?!

Додека од фирмата велат дека очекуваат од Министерството за транспорт и врски и Општината Центар да им дадат зелено светло за партерно уредување околу објектот, надлежните од Општината велат дека до нив не пристигнало никакво барање

Трговско деловниот објект "Лумикс", лоциран на плоштадот пред Градскиот трговски центар, иако поминаа повеќе од три години од кога започна неговата изградба, се уште не е целосно завршен. Од фирма најавуваат дека веќе на пролет може да се очекува објектот да профункционира, но оградата кон плоштадот се уште не е тргната, а како што дознаваме, останува да се заврши и ентериерот. Додека од фирмата велат дека очекуваат од Министерството за транспорт и врски и Општината Центар да им дадат зелено светло за партерно уредување околу објектот, надлежните од Општината велат дека до нив не пристигнало никакво барање?!

- Објектот е надворешно целосно завршен, а оградата може да ја тргнеме во секој момент, но чекаме од Општината да ни кажат како да го уредиме околниот простор и како да извршиме поврзување на градежната парцела со плоштадот, согласно Деталниот урбанистички план. Ние имаме договор за донација со Министерството за транспорт и врски и планираме да донираме во уредувањето на овој дел и евентуално во изградба на фонтана. Сепак, засега се уште немаме инструкции. Во однос на објектот скелињата не се тргнати, бидејќи се уште се користат за чистење на објектот, вели Крста Марковиќ, директор на фирмата "Лумикс", која е сопственик на земјиштето и инвеститор на овој деловно-трговски центар.

Од Општина Центар, пак, велат дека до нив досега не пристигнало никакво барање за уредување на просторот околу "Лумикс", ниту пак, информација за средства кои би биле искористени за оваа намена.

- Не знам што чекаат од Лумикс, но договор за донација за уредување на просторот произлегува од договорот што инвеститорот го има со Министерството за транспорт и врски. Деталниот план за Мал ринг е донесен и доколку од Министерството го добиеме проектот за уредување на околниот простор ние ќе го одобриме. Засега од инвеститорот не добивме некакво барање, така што Општина Центар воопшто не е пречка овој простор да се уреди, бидејќи тоа е и во интерес на граѓаните, вели Виолета Аларова, градоначалничката на Општина Центар.