15 October 2011

По барање на монашкото братство од манастирот “Успение на Пресвета Богородица - Трескавец” советниците на општина Прилеп на последната седница ја одобрија идејата за донација на 100 економични светилки. Покрај тоа наскоро ќе се отпочне со реконструкција и изградба на пристапните патишта кои водат до двата најатрактивни манастири препознатливи за Прилеп и регионот: “Успение на Пресвета Богородица  - Трескавец” и “Свето Преображение” кај селото Зрзе.

Решението за доделувањето на светилките е донесено со цел овој религиозно - културен центар да биде попристапен за посетителите, но и за поголема безбедност на манастирскиот комплекс “Трескавец” кој е прогласен за споменик на културата на Македонија. Локалната самоуправа изготви  проект за изградба на патот до манастирот. Финансиската конструкција со оглед на оддалеченоста и висинската разлика изнесува околу еден милион евра.

- Станува збор за покомплициран градежен зафат заради висинската разлика од 800-900 метри. Првата кота од каде треба да тргне патот е 600 метри, а манастирот се наоѓа на 1300 метри надморска височина. Треба да се направи квалитетен пат со испусти за водата. Патот до манастирот е влезен во програмата на Владата на РМ. Изградбата е планирана да се реализира во 2012 та или на почетокот на 2013 година, вели Марјан Ристески градоначалник на Прилеп.

Во програмата е предвидена и изградба на патот за манастирот Зрзе што со децении претставуваше проблем при посетата за големиот број туристи и почитувачи на културното наследство.