Верски објекти (општо)

Ана Анастасовска

Исламската верска заедница викендов порача дека во моментот кога Македонската православна црква - Охридска архиепископија ќе ги удрела темелите на црквата на плоштадот во Скопје, ќе почне и изградбата на Бурмали-џамија. Реис-ул-улема-ефенди Реџепи од светската верска конференција во Охрид порача дека ИВЗ нема намера да прави отстапки од првичниот став за ова прашање. Како што пишуваше „Време“, МПЦ-ОА планира на 3 јуни да ги удри темелите на црквата „Св. Константин и Елена“ на плоштадот, што би се совпаднало со денот на истоимениот верски празник. Според наши извори, со неодамнешната исплата на 10 милиони денари од постапките за денационализација на контото на МПЦ, премиерот Никола Груевски индиректно помогнал да се обезбедат средства за изградба на овој храм, со што нема никаква повреда на законот во поглед на секуларноста на државата. Изградбата на црквата на плоштадот се проценува дека ќе чини околу осум милиони денари. Владиката Петар викендов во Охрид ги негираше информациите за почетокот на изградбата на црквата посочувајќи дека тоа би го зголемил јазот меѓу двете верски заедници.
- Во никој случај нема да се почне со изградбата на почетокот на јуни. За такво нешто не знае никој од црковните луѓе, а ни јас не знам за тоа. Мислам дека нема да има никакво поставување Тоа е тенденциозна дезинформација со цел да се создадат уште поголеми тензии &“8211; рече Владиката Петар. И од општина Центар велат дека немаат информација кога МПЦ ќе почне да гради, но за да го направи тоа, треба да ја обнови дозволата за градење затоа што таа што ја има, веќе е истечена. Односите меѓу ИВЗ и МПЦ и понатаму се затегнати. Двете верски заедници имале неколку средби за да ги испеглаат ставовите за изградбата на некои цркви и џамии во државава. Поглаварот на ИВЗ негираше дека своето доаѓање на конференцијата во Охрид го условил со договор за реставрација на Чарши-џамија во Прилеп и рече дека не поставиле никаков ултиматум.
Непосредно пред почетокот на конференцијата, беше договорено да се обноват двете џамии во битолско-прилепскиот регион. Чарши-џамија во центарот на Прилеп е споменик на култура од прва категорија и поважно од с* е таа да биде обновена. Тоа што останува дилема е дали обновената џамија во Прилеп ќе биде музеј или, пак, ќе се користи и за верски ритуали. Директорот на Управата за заштита на културно наследство, Паско Кузман, посочува дека засега е донесена само одлука за реставрација на џамијата во Прилеп, но не и за тоа со каква намена ќе биде.
- Мене ми е мило што ќе се обновува оваа џамија, која е културно-историско наследство на Македонија од 1968 година, па наваму. Јас се надевам дека таа ќе биде музеј на исламската уметност &“8211; изјави Кузман. Спротивно на неговата идеја, реис-ул-улем-ефенди Реџепи јасно посочи дека џамијата во Прилеп освен што ќе се реставрира, ќе се користи и за молитва, а не како културно наследство. Претставници на ИВЗ, МПЦ и на Владата денеска требаше да одат во Прилеп и да утврдат под кои услови и како ќе се реставрира Чарши-џамија. Но, посетата е одложена, а место тоа, тие ќе одат во Битола, во Лажец, за да ја утврдат локацијата за изградба на тамошната џамија. Чарши-џамија во Прилеп беше опожарена за време на вооружениот конфликт, на 8 август 2008 година. Таа е еден од најстарите споменици на културата и била изградена во 1475 година. Околу 10.000 муслимани во Прилеп веќе девет години немаат свој храм во кој ќе ги одржуваат верските обреди. За време на своите празници, муслиманите своите молитви ги одржуваат под отворено небо.

Жителите од Кисела Вода ќе добијат нов црковен објект на празниот простор кај спортската сала Расадник. Црквата ќе се вика “Света Недела”, а нејзината изградба, во најголем дел ќе ја финансира бизнис секторот од подрачјето на Кисела Вода, делумно со финансии ќе учествува Општината, а најави за парични прилози има и од верниците.
Општинарите, кои заедно со граѓаните се иницијатори на изградбата на храмот, се уште го одбираат најсоодветниот проект за објектот. Одлуката ќе ја донесе иницијативниот одбор за изградба на новата црква, што надлежните го формираа неодамна. Претседател на одборот е градоначалникот, а во него покрај заинтересираните донатори за изградба на храмот, членуваат и 15 граѓани од Општината.
-Црквата ќе биде еден вид соборен храм за сите жители на Општината, така што планираме и нејзината големина да биде соодветна за таа намена. Се надевам дека целата процедура, а потоа и изградбата на храмот ќе се заврши во најскоро време, за жителите на Кисела Вода конечно да добијат голем верски објект, вели градоначалникот на Кисела Вода, Џорџе Арсов.
 Тој е убеден дека “Света Недела” ќе биде изградена најмногу за две години, односно дека нема да се појави застој на градежните активности, бидејќи начелно била заокружена потребната финансиска конструкција за храмот. Црквата е предвидена и во Деталниот урбанистички план, односно за неа е вцртана маркичка.