Владата на Србија, во предизборен период, одлучи да прифати заем од Обединетите Арапски Емирати вреден една милијарда долари, по поволни услови. Србија ќе го враќа кредитот во следните десет години со каматна стапка од 2 отсто. Според процената од првиот потпретседател на Владата, Александар Вучиќ, со тоа ќе се заштедат околу 300 милиони евра.

Kако што пишуваат арапските медиуми, најголем дел од кредитот ќе се искористи за изградба на проектот „Белград на вода“, а според порталот „24 часа“, арапските инвеститори меѓу другите услови за да се додели кредитот побарале да се вметнат обврски во Белград да се изгради најголемата џамија во Европа, како и да се забрани точењето алкохол.

Министерот за финансии Лазар Kрстиќ, кој се очекува да го потпише договорот за кредит, рече дека Србија на годишно ниво ќе заштеди по 40 милиони долари, односно околу 400 милиони долари за десет години.

- Тоа е добар сигнал од меѓународната заедница и инвеститорите дека Србија има кредибилитет - истакнал Kрстиќ на седница на владата.

Kредитот е со камата од два отсто, рок на враќање од 10 години и со отплата на кредитот се почнува по шест месеци од датумот на повлекување на парите.

- Главниот дел од кредитот не се отплаќа до крајот на периодот, што значи дека постои грејс-период од десет години за враќање на главнината од долгот - нагласил министерот.

Според Вучиќ, кредитот ќе се искористи за пополнување на дупките во буџетот и за репрограмирање неповолните кредити со камата од 7,5 отсто, кои биле земени пред четири-пет години, но и очекува дел од парите да се вложат во производство.

http://dnevnik.mk/default.asp?ItemID=A2855E6F66525746BD2AD57C3CAE8206