Булевар Србија

Роза Петкова

Најмалку уште еден месец ќе се довршува изградбата на булеварот Србија, кој, според сите досегашни најави од градските власти, веќе одамна требаше да биде пуштен во употреба. Последните информации велат дека подземните инсталации ја успориле работата, а дополнително проблематична била соработката со компаниите што се сопственици на таа инфраструктура. Згора на тоа, жители на градот, кои секојдневно ја користеле сообраќајницата, забележале дека веќе е пропаднат асфалтот на некои делови. Прашањето за Србија и за неговото завршување се отвори на минатата седница на Советот на Град Скопје. Советничката од СДСМ, Виолета Симиќ, се интересираше зошто булеварот се уште не е пуштен во употреба.
- Изведувачот доцни со изведбата, а тоа не е по вина на Градот. Можеме да им простиме од 30 до 45 дена, да се одложи рокот поради дислокацијата на подземната инсталација. Ова е комплицирана работа, а особено е тешко со ЕВН да се заврши - рече Мичо Поповски од секторот за уредување и за планирање на просторот.
На неговиот одговор реагираше советничката која тврди дека булеварот е неквалитетно изведен.
- Проблемот не е само што се доцни со изведбата и што сите рокови што беа дадени досега се преминати. На веќе изведениот дел има оштетувања. Се појавија дупки на делот каде што се сечат Првомајска и Србија, а тоа не е мала грешка од изведувачот, туку голема. Тоа се пари од граѓаните - рече Симиќ.
Единствениот одговор што го имаа надлежните од секторот беше дека постои гарантен рок за сите недостатоци и сигурно нема да му се плати на изведувачот додека тие не се отстранат. Проширувањето на булеварот Србија се развлече две години, а посебно проблематична се покажа втората фаза. Градоначалникот Коце Трајановски прво најави дека булеварот ќе биде готов до 13 ноември, кога се планираше свечено да се пушти за роденденот на Скопје. Потоа рокот се одложи до Нова година, а непосредно пред 31 декември градоначалникот објави дека на трасата има нерешени имотно-правни односи. Излезе дека е нерасчистена и сопственоста на земјиштето на потегот од општината Аеродром кон цементарница „Усје“. За ова градските власти вината ја посочија во изведувачот „Маврово инженеринг“ кој навреме не ги известил. Втората фаза предвиде проширување на Србија, од крстосницата со булеварите Јане Сандански и Видое Смилевски-Бато до улицата Првомајска. Станува збор за четири коловозни ленти со широчина од 3,5 метри, тротоари и велосипедски патеки од двете страни како и средиштен зелен појас. Вкупната должина на овој потег е 1.720 метри.

Проширениот Булевар Србија ќе го намали метежот

Сега се асфалтира новопробиената улица, која ќе ги спојува Првомајска со Кисела Вода, а веќе од наредната недела, како што изјавија од Градот, ќе се случи свеченото пуштање на целиот проект

Живеам во Кисела Вода, а работам во Автокоманда. Со години секојдневно кружам и возам по Првомајска, за да можам преку Аеродром да стасам до работа. Во ова време кога бензинот е скап, тоа е вистински луксуз. Очекувам Градот набрзо да ја пушти во употреба новопробиената улица кај „Усје“ со која од Сава Ковачевиќ директно ќе излегувам на Првомајска - вели Томислав М. од населбата Кисела Вода.

И од Градот така најавија, дека со пуштањето на оваа улица очекуваат значително намалување на метежот и помалку превозни трошоци за граѓаните. Но, во меѓувреме, градежните работи се одолжија поради, како што изјавија од Градот, проблеми со изведувачот околу преместување на подземната инфраструктура. Но, и имотно-правни проблеми.

- Булеварот Србија веќе неколку месеци е готов, односно изградени се уште неколку ленти во делот на населба Ново Лисиче, а и се вози по нив. Но, сепак, с` уште не е официјално пуштен во употреба. Можеби затоа што с` уште не е завршено со пробивањето на улицата кај „Усје“, како продолжение на булеварот, каде што секојдневно гледаме работници и машини - коментира Трајче Божиновски од Лисиче.

Од Градот, пак, објаснуваат дека сега работите привршуваат и парчето што ќе ги спојува Лисиче и Кисела Вода се асфалтира.

- Свеченото пуштање на целиот проект околу булеварот Србија ќе се случи нареднава недела, во зависност од временските услови - изјави портпаролот Неделчо Крстевски.

Според досегашните објаснувања, проширувањето на улицата Србија за уште една лента и средиштен дел, како и негово пробивање, изминативе две години се одвиваше во две фази. Првата беше од булеварот Видое Смилевски-Бато до булеварот 12 македонска бригада, а втората од раскрсницата кај Средното хемиско училиште па с` до Првомајска. Новата улица, сообраќајна врска на Првомајска со Сава Ковачевиќ, велат надлежните, овозможува поврзаност меѓу општините Аеродром, Кисела Вода и Гази Баба. Истовремено е и врска со излезот на Скопје.

Кај фабриката „Усје“, пак, ќе биде изграден кружен тек.

Со овој проект е решен и долгогодишниот проблем на граѓаните од населеното место Усје. Градската власт со самото пробивањето на делницата од Србија, изгради и атмосферска канализација, со што го реши проблемот со поплавување на куќите зад цементарницата.

Градежните работи почнаа во 2009 година на 26 јули, кога беа одбележани 46 години од земјотресот во Скопје.

Фросина ЗДРАВЕСКА

Податоци за проектот

• Цена: 2 милиона евра
• Прва фаза од булеварот Видео Смилевски-Бато до Првомајска(вкупно 5 коловозни ленти, ширина 3,5 метри, средишно зеленило)
• Втора фаза, пробивање на булеварот Србија, од Првомајска кон Кисела Вода (вкупно 4 коловозни ленти, ширина 3,5 метри, без средишно зеленило и тротоари со велосипедска патека. Кружен тек пред Цементарница, дијаметар 40 метри)
• Реконструкција на тротоарите со нови бекатон-плочки, ново осветление, пешачки и велосипедски патеки
• Очекувања: Помал метеж и издувни гасови