Такси превоз

Нелиценцираните таксисти преку огласи прават пазар со патници

Од Групацијата за автотакси-превоз велат дека такси-превоз на диво вршат дури и хотели, автосалони и рентакар-служби

Снежана Калабакова



По унифицираното обележување на таксистите, ги снема автомобилите од такси-стојалиштата во населбите на сите оние што вршеа такси-услуги на диво. Исплашени од најавата на градоначалникот на Скопје, Коце Трајановски, дека градските и сообраќајните инспектори ќе вршат зачестени контроли, а казните за нелиценцираните за извршување такси-превоз ќе бидат ригорозни, дивите таксисти побегнаа од локациите на кои претходно собираа патници. Сега тие бараат нови начини како да дојдат до нив и најчесто такси-турите ги договараат преку огласи на разни веб-страници. Инволвираните во такси-дејноста тврдат дека ова е единствениот начин на кој можат да заработат, а да побегнат од инспекциските контроли. Во некои од огласите, освен цените за одредени дестинации, има информации каков комфор нуди возилото со кое се патува. Така, на пример, такси-тура од Скопје до аеродромот „Александар Велики“ чини 800 денари, додека за патувањето до Велес се плаќа 1.500 денари, а релацијата до Куманово чини 1.000 денари. Турите до главните градови на нашите соседни земји Србија и Бугарија имаат цена од 170 и 90 евра. Од Скопје до Солун во соседна Грција треба да се издвојат од 90 до 100 евра. Согласно со новата одлука за автотакси-превоз на подрачјето на Скопје, досега се лиценцирани повеќе од 1.000 такси-возила.

Од Одделението за односи со јавноста во Градот велат со сигурност не може да посочат точна бројка на нелегални таксисти што оперирале претходно, но велат сосема сигурно е дека, по воведувањето на унифицираното обележување, бројот на нелиценцирани е сосема незначителен во однос на периодот пред да стапи одлуката во сила. Постојаното присуство на градските инспектори на теренот во координација со сообраќајната полиција со ефикасна контрола во текот на целиот ден и на сите локалитети придонело видно да се намали бројот на нелиценцирани такси-превозници. Досега велат се поднесени 350 прекршочни пријави од кои 130 платиле казна.

„Навистина драстично е намален бројот на таксисти во сите три смени откако Градот почна да ги лиценцира и обележува такси-возилата, а инспекцијата се забележува и ноќе. Уште мал дел од таксистите што решија да се занимаваат со оваа дејност останаа да ја комплетираат документацијата. Во Скопје би требало да има околу 3.000 легални таксисти. Но, како и во секоја друга држава, така и кај нас нелегалните си бараат начини како да дојдат до патници и тоа најчесто го прават преку огласи на неколку веб-портали. Отворете само на „Пазар 3“ и ќе најдете такви, па има дури и хотели, автосалони, рентакар-служби и физички лица што имаат по неколку возила, кои нелиценцирани вршат такси-услуги“, вели Сашо Рајчановски, претседател на Групацијата за автотакси-превоз при Стопанската комора на Македонија.

Од Градот објаснуваат дека согласно со Законот, казната за нелиценцираните изнесува 500 евра во денарска противвредност, но доколку се плати по налогот во рок од осум дена, казната се преполовува.

http://www.utrinski.com.mk/?ItemID=41EA00B5CDB3A940A7D7CD090B7E4001

Екипите на ЈП „Улици и патишта“, по налог на Град Скопје, изминативе денови работеа на изградба на десеттина нови такси стојалишта.

Такси стојалиштата се наоѓаат на улиците „Ѓорче Петров“, „Љубљанска“, „Мирче Ацев“,„Горѓи Капчев“, „Трета Македонска Бригада“,„12 Македонска Бригада“,„Водњанска“, неколку улици во населба „Пинтија“, како и на булеварот „Кочо Рацин“.

Изградбата на такси стојалиштата се одвиваше во неколку фази: ископ на земјена површина, поставување рабници, тампонирање и асфалтирање.

Сите стојалишта што се изградени досега се со слични димензии од 30 до 40 метри должина, а со широчина од 3 метри.

Такси станицата што е изградена во Ѓорче Петров е со поголеми димензии, долга е 30м, а широка 15 метри.

На улицата „Мирче Ацев„ во близина на Тинекс кај Градскиот трговски центар за потребите на лиценцираните такси компании направени се две такси стојалишта во двата коловозни правци.

Град за проектот потрши околу 4 милиони денари, но во Скопје, се бараат и нови алтернативни локации каде што би се изградиле уште вакви такси стојалишта.