Такси превоз

Нова компанија „Ин такси“ со фантом-газда!

Инвеститор во компанијата е Будимир Новаковиќ, печалбар од Канада, а негов содружник и управител кичевецот од Холандија Пецо Ристоски

Снежана Калабакова


Пет дена по скопските улици крстосуваат нови „рено флуенс“ автомобили на новата такси-компанија „Ин такси“. Скопјани веќе ги опслужуваат 50 нејзини возила, а исто толку се опремуваат. Од компанијата ветуваат дека од 1 мај низ градот ќе вртат вкупно 200 возила, додека во план е конечната бројка да биде 500 автомобили.

Компанијата засега има фантом-газда, бидејќи официјално никој не кажува кој е нејзиниот вистински сопственик. А, меѓу граѓаните, но и помеѓу самите таксисти веќе извесно време гласно се шпекулира дека станува збор за висок владин функционер. Во опција се вртат две-три имиња на луѓе од власта и на бизнисмени блиски до владејачката гарнитура

Во „Ин такси“ чуле за многубројните шпекулации, но објаснуваат дека во компанијата има странска инвестиција. Инвеститор е Будимир Новаковиќ, средовечен човек, кој дваесетина години работел и живее во Торонто, Канада, а негов содружник и сега управител на фирмата е помладиот кичевец Пецо Ристоски, кој работел во Холандија. Нивното запознавање во Белград било пресудно за инвестирање во „Ин такси“. Возилата „рено флуенс“ ги набавиле преку овдешни дистрибутери.

Во Сојузот на стопански комори велат дека новата такси-компанија не е нивна членка. „Утрински весник“ го праша Градот Скопје дали е регистрирана нова такси-компанија, со колку и со какви возила располага, дали има лиценца и кој е нејзиниот газда. Го добивме следниот одговор.

„Градот издава лиценци за вршење на дејноста такси-превоз на патници. Лиценците се издаваат на возила кои треба да исполнат соодветни услови за вршење на дејноста, а тие се предвидени во одлуката за такси-превоз. Оваа одлука е донесена во октомври минатата година и со неа се предвидени 3.000 лиценци. Околу регистрацијата на фирмите и сопственоста е надлежен Централниот регистар“, е објаснувањето од Одделението за односи со јавноста во Градот.

„Утрински“ се информираше и кај овластениот увозник „Аутомотив груп“. Оттаму ни беше кажано дека овие возила чинат помеѓу 13.500 и 16.800 евра. „Рено флуенс“ се нов тип комфорни и еколошки дизел-возила со еко 5 мотори, возила од највисока класа.

„Такси-возилата се климатизирани, фискализирани и лиценцирани. Ќе се издвојуваме од останатите такси-компании, ќе ги опслужуваме сите возрасни групи, а во специјални кошници ќе превезуваме и домашни миленичиња. Ќе воспоставиме соработка и со многу фирми за колективен превоз, потоа бизнис-соработка за превоз на клиенти до други градови, а ќе имаме и организиран превоз до градинки и училишта“, вели Оливер Никушев, меркетинг-консултант во „Ин такси“.

Компанијата ќе располага и со клуб-картички за редовните патници, а вози по актуалната нова цена. „Нашите возачи се осигурени на полно работно време и на цел износ од плата, а работат во две смени. Имаат редовни систематски прегледи во ’Медика плус‘. Возат униформирани, задолжително со црни панталони, бели кошули со логото на ’Ин-такси‘ и црна вратоврска. Компанијата има и сопствен сервис за миење, така што возилата најнапред одат на миење, а потоа се вклучуваат во сообраќај“, објаснува управителот Пецо Ристовски.