Во манастирот Трескавец кај Прилеп пред 10-тина денови започнаа археолошките истражувања во црквата, кои конечно после долги години треба да дадат одговор на прашањето што крие ова место во своето милениумско постоење. Во наредните 60-тина денови истражувањата ќе бидат насочени во црквата, старата трпезарија и магерницата. Според експертите овие истражувања треба да помогнат и во реализација на проектот за конзервација и заштита на овие три објекти, кој пак треба да биде изработен оваа година, за што пак средства веќе беа одобрени од страна на Министерството за Култура.

„Не станува збор за обични археолошки истражувања туку за заштитни археолошки истражувања, кои се неопходни да се направат за да се добијат податоци при изработката на проектот за конзервација и реставрација на црквата и старата трпезарија. Овој простор е целосно неистражен, неопходно е да се направат овие археолошки истражувања за да конечно се дефинира што се имало на Трескавец, под црквата, старата трпезарија и магерницата. Досега не се направени вакви истражувања, конечно ќе се добијат податоци за сето тоа кои градби ги имало тука, со оглед на градбите и функцијата која ја имал Трескавец во минатото. Значи податоци кои досега никој не ги истражувал“, рече Гордана Данилоска – Спироска, директор на Завод и Музеј Прилеп.

Со својата мистика ова место, низ вековите и денес привлекувало илјадници посетители. Научно и стручно никој досега не ги образложил тајните кои ги крие ова древно светилиште. Експертите не ги кријат своите очекувања дека можеби ќе се дојде и до некое епохално откритите. Низ годините за Трескавец се плетат голем број мистерии и приказни. Се претпоставува дека тука на овој простор се наоѓала античката населба Колобаиса како и тоа дека ранохристијанската базилика на Трескавец, односно денешната црква е изградена врз темелите на античкиот храм посветен на боговите Аполон и Артемида. Токму овие археолошки истражувања треба да дадат одговор на сите овие мистерии. Според досегашните претпоставки и наоди кои се најдени кај локалитот Гумно, кој се наоѓа веднаш под манастирот, Колобаиса постоела некаде од 4 век п.н.е. до 4 од од н.е. Првата ранохристијанска базилика, врз која се претпоставува дека се наоѓа денешната црква, според наодите била изградена тука кон крајот на 5 и почетокот на 6 век. Со сите овие проекти конечно ќе се врати стариот сјај на Трескавец.

„Не радува фактот дека конечно се започна со реализација на овој проект и дека за брзо време ќе започне целосна реконструкција на црквата, архитектонска консолидација, чистење на фреските и се што значи внатрешно уредување на црквата. Исто така со овие истражувања можеби ќе се даде одговор на приказната за Трескавец која се уште не е раскажана. Ние за Трескавец знаеме само од скромните истражувања кои се случиле во 50-тите години и од тогаш никој посериозно не се позанимавал со ова место. Би рекол дека ќе се открие како функционирал манастирот низ векоите, а археолозите ќе си најдат и свои откритија за оној пагански или антички период од функционирањето на ова место“, вели монахот Калист.

Проектот пак за обнова на конаците деновиве треба да се прати на повторно разгледување во Националниот конзерваторски центар и според очекувањата на Заводот и Музеј од Прилеп, оваа година да биде распишан и и тендерот за нивна обнова. Тие според најавите треба да бидат обновувани фаза по фаза, а како ќе тече целиот процес ќе кажат експертите. Инаку со изградбата на патот манастирот станува вистинска туристичка мека во прилепско за верниците и за сите оние кои сакаат да уживаат во неповторливата природа. За само 9 месеци, откако се изгради новиот пат манастирот го имаат посетено над 50.000 гости. Со новите откритија и реновирањето на конаците се очекува тој број да се зголеми за неколку пати.

http://www.patokazmagazin.com.mk/patokaz-br-27/item/dali-ke-se-otkrie-prikaznata-za-treskavec-star-nad-dva-mileniumi