Аеродроми

 Скопје, 9 септември 2011 (МИА) -  На аеродромот „Александар Велики“ денеска напладне официјално профункционира новиот терминал со пристигнување на летовите на авиокомпаниите на „Аустриан“ и на „Еделваис“.  Со македонско вино и бели рози на патниците што летаа на релацијата Виена - Скопје добредојде им посакаа вицепремиерот за економски прашања Владимир Пешевски, министерот за транспорт и врски Миле Јанакиески и претставници на менаџментот на концесионерот на аеродромот „ТАВ“. 

Изненадени од пречекот бидејќи не им било најавено упатија пофални зборови за  новиот изглед на аеродромт, кој, според нив, е европски и може да се спореди со  модерните авиопристаништа во останатите држави. Дел од патниците, македонски исленици во Австралија и Нов Зеланд, истакнаа дека конечно со гордост ќе можат да се пофалат дека и во нивната татковина има современ аеородорм. Посакаа да следат уште инвестиции во македонската инфраструктура.

Според вицепремиерот Пешевски, инфраструктурата на „Александар Велики“ е од највисок тип.  - Ја искористивме  оваа можност првиот лет на еден симболичен начин да го одбележиме со пригоден пречек за патниците кои беа изненадени бидејќи не им беше најавено, изјави Пешевски.

Отворањето на новиот аеродром, оцени, означува нова фаза во развојот на авиосообраќајот на Македонија. - Ќе се залагаме  што побргу да се достигне бројката од милион патници годишно низ државава, за пет до десет  години до два милиони, што ќе значи поттик и за туризмот, како една од гранките кои се стратешки во идниот период за развој  на Македонија,  но и за бизнисот, рече Пешевски и додаде дека големиот број патници ќе значи стимул и за помошните индустрии и за странските инвеститори и за се што Македонија ја става на повисоко ниво во европски рамки, рече Пешевски.

Со такви очекувања е и министерот Јанакиески.  - Очекувам во следниот период  драстично да се зголемува бројот на патниците на скопскиот аеродром. Навистина изгледа прекрасно,  а од она што го кажаа патниците се воодушевени од новиот изглед и комфорт на аеродромот, изјави Јанакиески.

Наскоро, најави тој, ќе профункционира редовна линија од центарот на Скопје до аеродромот. Моментно има две алтерантиви, редовната линија да ја воспостави Јавното сообраќајно претпријатие (ЈСП) или приватен превозник кој веќе преговарал со ТАВ и е поднесено барање до Градот Скопје. 

Услугите на новата аеродромска зграда, покрај со продавници, кафетерии,... од денеска се збогатени и со  фаст-фуд ресторан Бургер кинг, прва инвестиција во Македонија на тој бренд.

Новиот аеродром е десетпати поголем од поранешниот со капацитет да опслужува четири милиони патници годишно. Концесионерот на аеродромот турски ТАВ во изградбата и модернизацијата на аеродромскиот комплекс вложи 100 милиони евра.

Во текот на 18-месечната реконструкција и модернизација беше изградена нова терминална двокатна зграда на површина од 40 илјади квадратни метри со шест патнички пристапни мостови, 23 места за чекирање, паркинг за 1.300 возила... Изграден е и карго хангар со капацитет од 40.000 тони годишно, нова противпожарна станица, службена зграда од 5.000 метри квадратни. Постојната писта е проширена за 500 метри на југ.

„ТАВ Аеродроми“ го зеде под концесија „Александар Велики“ во март минатата година и со него ќе управува 20 години. Минатата година  го реновираа и аеродромот „Св. Апостол Павле“ во Охрид.