Трговски објекти (општо)

Железница и по втор пат не успеа да најде инвеститор што ќе го гради бизнис трговскиот центар на локацијата под новата железничка станица. На вториот меѓународен тендер не се јавила ниту една странска компанија, што ќе го закупи земјиштето. Според раководството на железница, бизнис планот предвидувал инвеститорот да го изнајми целиот простор, а не само атрактивните делови од него.

Просторот е со површина од 7000 илјади метри квадратни се издава за само 1,5 евро по квадрат. Ниската цена е предвидена заради недоизградената инфраструктура на таа локација.

Со оглед на тоа дека компанијата што ќе го гради деловниот центар, ќе треба да плаќа 15 години кирија, пресметките се дека ова за јавното претпријатие ќе биде значителен бенефит особено во време кога железницата се соочува со милионски долгови.

Според тендерската документација локацијата за доизградба на трговскиот центар, ќе се даде на компанија која ќе понуди најдобар проект но ќе се оценува и брендот на компанијата.

ГРЧКИ ИНВЕСТИТОР ЌЕ ЈА ТУЖИ ДРЖАВАТА ОТИ МУ ПРОДАЛА СПОРЕН ПЛАЦ

Контоминас купил мачка во вреќа

Кипарска фирма на Гркот Контоминас во 1999 година станала сопственик на 22.000 квадратни метри земјиште, но дел од парцелата од околу 16.000 квадрати, за кратко време со денационализација му била вратена на физичко лице

Грчкиот инвеститор Димитрис Контоминас, кој неодамна ја доби националната WiMax лиценца и преку неговата фирма Космотелко беше еден од акционерите во Телеком, ќе ја тужи државата и ќе бара да му се вратат парите што пред осум години ги платил за земјиштето што го купил во близина на скопскиот хотел "Александар палас", за кое не биле расчистени имотноправни односи, дознава ВЕЧЕР. Тој е лут што тогашните македонски власти во непосредна спогодба му продале спорно земјиште, за кое се водела постапка за денационализација. Договорот со кој фирма на Контоминас со седиште во Кипар станала сопственик на 22.000 квадратни метри, го потпишал Душко Кадиевски, тогашниот министер за градежништво, но дел од парцелата од околу 16.000 квадратни метри за кратко време со денационализација му била вратена на физичко лице.

Сега, после осум години Контоминас останал и без поголемиот дел од земјиштето, на кое планирал да гради голем деловен објект, аква парк, приватна болница и претставништво на банката Интер американ, и без парите што ги уплатил за проект, што според информации на ВЕЧЕР станува збор за вкупна сума од околу два милиони евра (тогашни четири милиони германски марки).

Откако Контоминас увидел дека му е продадено спорно земјиште, барал обесштетување од следната Влада на чело со премиерот Владо Бучковски, која му понудила како замена да добие земјиште во центарот на градот, на местото каде што сега се наоѓа Цветниот пазар.
Поранешниот премиер и сегашен пратеник Владо Бучковски во изјава за ВЕЧЕР вели дека овој нерешен случај го наследил како премиер и веднаш се пристапило да му се помогне на инвеститорот. Тој тврди дека и тогашната Влада се сочила со иницијативата да биде тужена пред меѓународен суд за отштета на инвеститор.

- Контоминас уште во времето на владеење на СДСМ најавуваше дека ќе покрене иницијатива за надомест на штета и колку што се сеќавам планираше да тужи пред меѓународен суд бидејќи претходната влада му продала спорно земјиште. Затоа и почнавме преговори и му понудивме да ги разгледа слободните локации во сопственост на државата, за да може со некоја од нив да биде обесштетен. Тој ја избра локацијата каде што сега се наоѓа Цветниот пазар и бараше веднаш да страртува со изградба на деловниот објект бидејќи за тоа веќе платил пари. Но, поради неможноста пазарот веднаш да се дислоцира и поради почетокот на изборната кампања, овие преговори пропаднаа и случајот остана како правна заврзлама - раскажува Бучковски.

Спорното земјиште на Контоминас е топ-тема и кај сегашната Влада на премиерот Никола Груевски. За решавање на проблемот претставници на Контоминас веќе биле на неколку средби во Министерството за транспорт и врски, но од таму им било посочено дека нема никаква можност во непосредна спогодба да добие земјиште, бидејќи тоа не било начин на работа на оваа власт. Инвеститорот бил преупатен, и покрај тоа што веќе еднаш купил земјиште, повторно да го стори тоа но на лицитација.

Кој е Димитрис Контоминас?
Гркот Димитрис Кондоминас е еден од петте најбогати луѓе во Грција. Тој е претседател на Управниот одбор на компанијата Космотелко која неодамна ја доби националната WiMax лиценца. Гркот неодамна најави дека неговата компанија има намера да остане во Македонија и во оваа технологија на иднината да вложи 500 милиони евра.

Неговата компанијата Космотелко пред речиси три години ги продаде своите 7,44 проценти од акциите во Телеком на Маѓар телеком и тоа се протолкува како сигнал дека се повлекува од Македонија.

Сепак, со влегувањето на неговата компанија како WiMax оператор на македонскиот пазар се поизвесно станува дека плановите на Космотелко биле други - од партнер на Телеком да стане негов конкурент, користејќи го драгоценото искуство од четиригодишното работење во македонската најпрофитабилна компанија.

Тој, според наши информации, стои и зад скопската компанија Нетфон, која се подготвуваше да го урне монополот на Македонски телекомуникации во фиксната телефонија.

„Mall of Macedonia“ во Скопје

Неџип Наци Догру е оптимист

Дали Скопје ќе добие капитален мегамултифункционален трговски центар во центарот на градот на површина од пет фудбалски терени и со речиси 60 илјади квадратни метри деловен простор? На минатонеделното свечено отворање на првата фаза на „Mall of Montenegro“ во Подгорица, кој како што се очекува ќе отвори пет илјади нови работни места, Неџип Наци Догру, претседател на бордот директори на мултинационалната градежно-инвестициона компанија „Гинташ“ од Анкара, Турција, ни потврди дека веќе имале разговори за изградба на „Mall of Macedonia“ во Скопје.

„Сакаме да инвестираме во мегатрговски центри по пат на партнерство со градските власти на сите главни градови на регионот, вклучувајќи го и Скопје, се разбира. Има расположение и од ваша страна, но постојат одредени административни пречки кои, се надевам, ќе ги надминеме“, ни рече турскиот инвеститор. (Ек.Р.)