Патна мрежа (општо)

За сообраќајната инфраструктура ќе се трошат 144 милиони евра

И Министерството за транспорт и Агенцијата за патишта в година ќе имаат помал буџет

Билјана Ангеловска

Над 8,5 милијарди денари е сумата со која ќе располага сегментот од државната управа задолжен за изградба и одржување на сообраќајната инфраструктура. Според предложениот буџет за наредната година, Агенцијата за државни патишта и Министерството за транспорт и врски ќе можат да трошат вкупно 144 милиони евра.

Агенцијата за државни патишта ќе има три пати поголем буџет од тој на Министерството, па во 2010 година ќе располага со 108 милиони евра, додека Министерството само со 36 милиони.

Овие првични буџетски проекции прилично се разликуваат од минатогодишните, кога во почетокот кога се кроеше буџетот за 2009 година, Министерството за транспорт имаше на располагање 4 милијарди денари, односно над 66 милиони евра, а Агенцијата дури 130 милиони. Но, и вака намалените буџети, исто како и лани ќе се трошат за изградба и одржување на патната сообраќајна мрежа, за железничка инфраструктура, за набавка на двокатни автобуси за јавниот превоз во Скопје, за изградба на водоводи, за изработка на детални урбанистички планови... „Предложениот буџет за наредната година не е помал, туку е дури и малку поголем од буџетот што го добивме по вториот ребаланс, а кој изнесуваше околу 104 милиони евра. Важно е што во текот на оваа година не стопиравме ниеден проект, напротив, моментално се во тек над 20 проекти. Меѓутоа, многу време одземаат подготвителните работи, како што е изработката на проектната документација и експропријацијата, на што често се трошат и по две-две и пол години“, вели директорката на Агенцијата за државни патишта, Наташа Волкановска.

Во наредната година Агенцијата ќе се фокусира на продолжување на започнатите градежни работи на патните правци Табановце - Куманово, Штип - Струмица, Градско - Прилеп, Коњско - Кожуф, обиколница на Охрид и Коломот - мост село Близанско. Истовремено, дел од средствата ќе се искористат и за започнување изградба на нови делници како што се Тетово -Јажинце, Кичево (Извор) - Дебар, Св. Николе - Пробиштип, Дебар - Бошков Мост - граница со Албанија и ќе се реконструира Катланово - Велес.

Агенцијата има обезбедено заем од Светска банка во висина од 68 милиони евра за изградба и рехабилитација на 11 регионални и локални патни правци. Овие пари иако се кредит, сепак, влегуваат како извор што се слева во касата на Агенцијата. Исто така, обезбедени се средства и од ЕБОР и тоа по 50 милиони евра за локалните и за регионалните патишта. Волкановска појаснува дека и во минатогодишниот буџет биле предвидени овие средства и оти локалните патишта веќе требало да бидат во тек на изградба, но поради неквалитетните проекти што ги доставиле општините, изгубена е градежната сезона и работата е пролонгирана, па затоа се префрла за наредната година.

За разлика од Агенцијата, Министерството за транспорт и врски своите 36 милиони евра во наредната година планира да ги потроши за набавка на автобуси за Скопје, за изградба на каскади во Вардар, на жичарница од Средно Водно до Милениумскиот крст, за продлабочување и реконструкција на пристаништата во Охрид, за санација на активните лизгања на земјиштето, модернизација на железничката инфраструктура, за изработка на проект за гасификациска мрежа во Македонија и друго. Речиси истите проекти беа предвидени и со буџетот планиран за оваа година, а кој во почетокот беше проектиран двојно поголем, дури над 4 милијарди денари. Сепак, како што се покажа, најголем дел од проектите останаа само на хартија, па сега се планираат за в година. Како ќе се направи тоа со преполовен буџет, останува да се види.

Обновата на патот Превалец - Смојмирово е дел од владиниот проект за реконструкција и рехабилитација на 11 регионални патни правци низ целата држава.

Според Груевски, во рамки на тој проект, но и претходно, преку Агенцијата за државни патишта, е почната реконструкцијата на неколку клучни патишта во источниот дел на Македонија.

- Сите овие патишта, но и голем број други регионални и локални патни правци чија реконструкција е дел од владината стратегија за долгорочен развој на земјата, говорат за нашата решеност да го надоместиме она што било пропуштено во минатото и да ставиме крај на долгогодишниот период во кој не беше инвестирано ниту еден денар за изградба и реконструкција на патните правци, рече Груевски.

Крајната цел на Владата, истакна Груевски, освен да обезбеди подобар живот на граѓаните, е на долгорочен план да изгради современа патна мрежа што ќе ја направи Македонија препознатлива кај инвеститорите. Подобрата транспортна инфраструктура за нивните бизниси е од особена важност, а за нас ќе значи нови инвестиции, нови фабрики, нови работни места и работа за многу домашни фирми што е од осебна важност во услови на голема светска економска криза, укажа премиерот Груевски.

Агенцијата за државни патишта потпиша договор со скопската градежна компанија Гранит за реконструкција на локални патишта во западниот (полошки) и центалниот регион од државата. Наташа Валкановска, директор на Агенцијата за државни патишта, вели дека станува збор за договор вреден 2,6 милиони евра што треба да се реализира за 12 месеци.
- Овој договор е во рамките на проектот финансиран од Светската банка за реконструкција на локалната и регионалната патна мрежа. Целиот тендер опфаќа 28 патни правци, а Гранит ќе реализира 17 од нив, вели Валкановска.

http://vecer.com.mk/?ItemID=ED2518DBE821E342A067A005D0C32871

Стартува изградбата на патот Струмица - Дојран