Се реконструира патот Струмица - Дојран

Одрони, лизгари, дупки по патиштата и револтирани возачи е секојдневна слика на патиштата, која говори за лошата состојба на патната инфраструктура во земјава. Ваквата состојба ќе потрае бидејќи државата ги скрати парите за таа намена од државната каса и најави, но не обезбеди кредити и инвеститори за нивна изградба и реконструкција. Запрени се работите и на двата коридора, 8 и 10 бидејќи Владата се уште не обезбеди концесионери за нивна изградба. Место да чека странските компаниите да конкурираат за концесија за патиштата, подобро би било Владата да ја финансира нивната изградба од државната каса, предлагаат бизнисмени и стручњаци. За тоа, велат тие, потребно е годишно да се издвојуваат по 300 милиони евра од државната каса или да се обезбедат со кредити. Поволностите што ќе се добијат од тоа е ангажирање на целокупната градежна инфраструктура во државава и работа за околу 30.000 луѓе. Економските ефекти од ваквата инвестиција се прилив на странски инвеститори, поголем проток на стока услуги и луѓе и повисок прилив на средства во државната каса. - Државата е способна и самата да ги гради патиштата за кои веќе долго чека странци. Во подобрите години државава можеше да издвои и до 500 милиони евра за таа намена, но во кризен период со штедење на непродуктивната потрошувачка може да обезбеди до 300 милиони евра. Од тоа, 100 милиони евра се доволно да се издвојат од државната каса, а преостанатото да се обезбеди со кредити од банките, кои многу лесно кредитираат проекти во инфраструктурата - вели Горан Рафајловски, претседателот на скопската регионална комора. Со овие пари, вели Рафајловски, а тоа го потврдуваат и градежниците, со целата потребна инфраструктура би можело да се изградат околу 30 километри пат годишно, би се обезбедила работа за целокупната домашна градежна оператива и би се активирале дејностите што ја следат и би вработиле околу 30.000 луѓе. Техничките планови за реализирање на изградбата, според него, се остварливи за неколку месеци и со наредниот буџет би можело да се почне со градбата. -Тоа е реално остварливо бидејќи државата може да издвои сопствени средства и да земе заеми од странските банки. Но, Владата до овој период воопшто не инвестираше во подготовка на терен за тоа. Се уште не е подготвена техничката документација, не е експроприрано земјиштето и не се завршени низа работи, кои би овозможиле градба без застои - вели Џевад Хајредини, економски аналитичар. За нашето економско функционирање и привлекување странски инвеститори мора да се поврземе со Косово, Албанија и со Бугарија, но и да се заврши Коридорот 10, се согласуваат бизнисмените и стручњаците. - Ако не може да се обезбеди добар концесионер, Владата не треба да се плаши да ја задолжи државата со кредити за изградба на патната инфраструктура, но и на другата бидејќи ваквата инвестиција неколкупати ќе се зголеми и ќе се почувствува во сите сегменти од животот - вели професорот Христо Карталов. Изградбата на инфраструктурата, било да е патна, железничка, воздушна, енергетска, вели тој, треба да се реализира многу брзо за да и се овозможи на државата да се одлепи од епитетот слепо црево на Европа, за на економијата да и се даде можност за развој. - Како синдикат го поддржуваме секое вложување, било да е со домашни пари или кредити, кое би ја поттикнало градежната оператива, а со тоа и другите дејности и би овозможило вработување на што поголем број работници, а поволно би влијаело и на економијата и на државниот буџет - вели Павел Трендафилов од Синдикатот на градежниците. За разлика од Македонија, пак, во соседството се градат автопатишта. Така, во последниве неколку години Албанија изгради 170 километри автопат, во изминатиов период интензивно се гради и во Косово, автопат од Приштина кон Пеќ и кон Албанија, додека Србија ја завршува изградбата на своите делници по Коридорот 10. Овој наш сосед не застанува тука. Владата на Србија планира в година да почне шест нови патни правци, сите од рангот на автопати, за што ќе бидат издвоени 1,5 милијарда евра.

Китка не процвета од лошиот пат

Шумското стопанство „Караџица“ го уништува патот со тешките камиони натоварени со дрва, се жалат жителите од регионот на Китка

Жителите од регионот на Китка се жалат дека патот дотаму е преполн со дупки и дека е крајно време да се поправи. Според нив, главен виновник за тоа е шумското стопанство, чии тешки возила со години го руинираат. Пред нецели четири години, граѓаните дури и го блокираа патот на камионите, кои натоварени со дрва тежеа и повеќе од 30 тони. Сега по него може да сообраќаат само возила тешки до пет тони.

- Шумското стопанство „Караџица“ го уништи патот, а досега ништо не инвестира во него. Никој 30 години не се обиде да направи нешто за негова реконструкција. Автомобилите ни се искршија. Викендичките ги посетуваат само оние што имаат џипови, бидејќи само нив безбедно се стигнува. Поради лошиот пат, дд 100 викендички, посетени се само околу 30 - вели Ленче С., која има викендичка во населбата Мала Река.

Пензионерот Чедо Петровиќ, кој исто така има викенд-куќа во овој крај, вели дека за 25 години колку што доаѓа, никој од надлежните не мрднал со мал прст за да се поправи.

- Јас имам џип, но сум стар 67 години и кога возам до викендичката, од големите дупки главата ми удира во таванот. Тоа е неиздржливо, патот е дупка до дупка. Многу пати сме реагирале до „Караџица“, но од таму не сакаа ништо да помогнат, а и од Општината Студеничани - истакна Петровиќ.

По 30 години, конечно почна да се реконструира дел од патот Драчево - Китка. Првата фаза, која е почната пред 1,5 месец, е од манастирот Пеленица до селото Долно Количани, во должина од околу 4 километри. Градоначалникот на Општина Студеничани, Фати Исени, објасни дека во моментов се вади стариот асфалт, по што ќе се постави комплетно нов. Патот на оваа делница и ќе се проширува во зависност од теренот, во некои делови до околу 3 метри, а во некои делови и до четри метри. Главен носител е Општина Студеничани, а поддржувачи општините Зелениково и Кисела Вода.

- Последен пат асфалт на овој пат е ставен во 1981 година. Ќе им помогнеме на жителите од овие села да си ја олеснат комуникацијата со градот, но и со другите соседни села - објасни Исени.

Градежните работи ги врши фирмата „Гранит“, а ќе чинат 356.000 евра, кои се обезбедени од Светската банка. Се очекува реконструкцијата на оваа траса да заврши до првата половина на ноември.

Жителите од селото Горно Количани, а ги има околу 500, се благодарни што е почната изградбата на патот, но сепак се скептични до каде ќе одат ветувањата на општинската власт.

- Ветија дека ќе се прави патот, нешто почнаа, но кога ќе биде готов, никој не знае - изјави Неџати Рамадани од Горно Количани.

Месното население од Долно Количани вели дека до пред распадот на Југосавија овој пат го одржувала војската, но од 90 години откако Македонија се осамостои, тој е оставен на милост и немилост.

- Од 1990 ниту денар не е потрошен на асфалт за овој пат. Ги кршиме колите, а плаќаме за нивна регистрација. До Драчево поради руинираниот пат се стигнува дури за 40 минути, да не можеш болен човек да однесеш на лекар, а бремена жена би се породила додека да пристигне во болница. Во ова село не' има околу 2.000 жители. Воедно, и оние што сакаат да одат на излет до Кадина Река се откажуваат токму поради лошиот пат - се жали Рамиз Абдиовски, жител на селото Долно Количани.

В година реконструкција на остатокот од делницата

Одобрени се 9,5 милиони денари од Бирото за регионален развој и уште 118.000 евра од Светската банка за реконструкција на уште еден дел од оваа делница. На ред е патот од село Долно Количани до Горно Количани, во должина од 1.300 метри, за што ќе бидат искористени парите од Бирото за развој. Откако ќе биде направен и тој дел, ќе се продолжи се' до комплетна рехабилитација и реконструкција на целиот патен правец Драчево - Китка. Според градоначалникот Исени, втората и третата фаза ќе се реализираат наредната година.

Овој пат е долг 26 километри и ги поврзува селата Долно и Горно Количани, Црвена Вода, кои спаѓаат под Општината Студеничани, Палиград кое припаѓа на Општината Зелениково, Алдинци кое е на територијата на Студеничани, се' до викенд-населбата Мала Река и планинарскиот дом „Караџица“, а понатаму продолжува до врвот Солунска Глава.