- СДСМ денеска побара од Агенцијата за електронски комуникации и Владата да објаснат каква намена ќе има кулата што АЕК ја гради на Водно и колку ќе чини нејзината изградба.

Потпретседателот Дамјан Манчевски на прес-конференција рече дека има многу нејасностии поврзани со кулата и праша дали таа ќе биде за мониторинг или предавателен пункт за радиодифузија и други комуникациски уреди.

- Експертските стандарди укажуваат дека не постои случај каде што на иста локација има и предавателни и мониторинг уреди. Мониторинг уредите ќе бидат превозбудени и не ќе можат релевантно да мерат. Минимално дефинираното растојание од предаватели до мониторинг станица е од 600 метри до 2 км, во зависност од фреквенцијата и моќноста. Владата и АЕК ја планираат Кулата на Водно помеѓу столбовите на ВИП и ОНЕ, меѓу кои нема ниту 50 метри растојание.

Дури и да ги срушат, до столбот на МРТ нема ниту 100 метри, рече Манчевски.

Тој посочи дека искуствата во Србија и Словенија покажуваат оти ваквите кули се во сопственост на јавните радиодифузни сервиси и затоа е нејасно зошто во Македонија кулатат е во сопственост на АЗЕК. Според СДСМ, нејасно е и тоа зошто АЕК како непрофитална органзиација ќе остварува профит од кулата која е најавена и како туристичка атракција.

Антенскиот столб за контрола и мониторинг на радиофреквенции кој ќе се гради на врвот на Водно ќе чини 1.084.706.000 денари и целосно ќе биде финансиран од Агенцијата за електронски комуникации во наредните пет години, соопшти АЕК одговарајќи на прес-конференцијата на СДСМ.

Агенцијата посочува дека антенскиот систем првенствено е наменет за нејзини потреби и дека со опремата ќе се врши контрола и мониторинг на радиофреквентниот простор за што таа е надлежна, и од тие  потреби е одредена и локацијата и висината на столбот.

-  На антенскиот систем за контрола и мониторинг на радиофреквенции ќе се поставува софистицирана мерна опрема која ќе биде заштитена од секакви несакани влијанија. Дополнително може да се направи заштита од несакани зрачења доколку некој корисник на радиофреквенции постави сопствена опрема во слободниот деловен простор под закуп. АЕК има доволно искуство во оваа област во досегашната работа. Во изминатите години сличен случај имаше и на Контролно-мерниот центар на Зајчев Рид, каде мерната опрема на Агенцијата беше поставена на ист столб со опремата на еден мобилен оператор, информира АЕК.