Ски центар Кожуф

Голема карпа, висока повеќе од 10 метри, е причината зошто повеќе денови е целосно блокиран патот од Гевгелија кон Ски-центарот „Кожув“. Карпата е падната на асфалтниот пат на околу половина километар од туристичката населба Смрдлива Вода, која има околу шестотини викендички. За среќа, нема повредени при уривањето на карпата.

- На Кожув се' уште има снег, а ние мораме да откажуваме аранжмани оти туристите не можат да поминат поради карпата - велат од Ски-центарот. Револтирани се и сопствениците на викендички во Смрдлива Вода, како и гостите што решиле да одмораат таму и да наполнат од тамошната вода, за која многумина веруваат дека е лековита.

- Сме слушале за лековитите својства на оваа вода и тргнавме, но еве не можеме да поминеме. Планиравме да одмораме таму за викендот - ни изјавија гости од Скопје, кои ги сретнавме попат. Од Ски-центарот велат дека карпата е падната во понеделникот ноќта. Надлежна за оваа делница била „Македонијапат“, од каде што реагирале.

- Направија интервенција со стопански експлозив од „Македонски шуми“, но без успех- велат од Ски-центарот. На терен излегле и од Центарот за справување со кризи и Дирекцијата за заштита и спасување, кои најавија дека ќе бараат помош од АРМ за отстранување на карпата. Може да се мине само пеш, па на раце се пренесуваат артиклите за потребите на Ски-центарот од каде што нагласуваат дека нема друг пристап до таму. Од едната страна кај одронатата карпа е рид, а од другата има амбис и река.

Вчера кога одевме по патот кон местото на одронот, забележавме и други помали одрони, а од Гевгелија натаму нема ниту едно предупредување со кое се укажува дека патот е непрооден. Меѓу блокираните вчера беше и една екипа што се упатила да го поправа дефектот на базната станица за мобилна телефонија предизвикан од невремето.

http://www.dnevnik.com.mk/?ItemID=EC7977C5CEAEF54284A2EECF03911E91