Катна гаража Илинден - кај Бисер

Ограден простор и ископана дупка е единственото нешто што е направено во изминатава година на просторот меѓу ТЦ „ Бисер“ и „Мекдоналдс“, каде што беше најавено дека ќе се гради катна гаража. Градежната фирма „Илинден“, која е задолжена за изградбата, само ја загради локацијата и почна со ископувањето и оттогаш работите стојат во место, иако за девет месеци изминува рокот кога објектот треба да биде во функција. Предвидено беше пред да почнат градежните активности, „Илинден“ да изврши дислокација на подземната инфраструктура, но дали воопшто почнале да работат на тоа не успеавме да добиеме одговор од надлежните во фирмата. Граѓаните што живеат во околните згради каде што треба да се гради објектот се сомневаат дека воопшто ќе се подигне катната гаража на која се противеа во почетокот. - Кога се најави изградбата се противевме оти се плашевме како ќе живееме покрај бучавата што би ја создавале возилата. Сега, откако помина повеќе од една година, а работите околу нејзината изградба не се помрднуваат, скептици сме кога и дали ќе биде завршена изградбата на објектот “ вели Лилјана, која живее во една од зградите во близина на ТЦ „ Бисер“. Таа смета дека и покрај тоа што од Општина Аеродром ја уредувале околината и зеленилото околу нивните згради, сепак поставената ограда и огромната дупка што се гледа од терасите на трговскиот центар и од нивните домови, го нагрдува просторот. Од Општина Аеродром велат дека и покрај тоа што сето ова се случува на нивна територија, сепак немаат никакви ингеренции да издејствуваат кај градежната фирма „ Илинден“ да се забрза целиот процес на изградба. - И покрај доцнењето се надеваме дека катната гаража наскоро ќе биде изградена со што ќе се реши проблемот со паркирањето на возилата околу трговскиот центар “ велат од одделението за односи со јавноста на Аеродром. Парцелата каде што треба да се наоѓа гаражата, „Илинден“ ја зема под закуп на 40 години од Министерството за транспорт и врски на јавно наддавање. Годишниот закуп чини 71.411 евра, а беше планирано објектот целосно да биде изграден во рок од две години, а во него ќе има простор за паркирање на 208 возила. Градежна парцела зафаќа површина од 2.240 квадратни метри, а површината на која ќе се гради објектот изнесува 1.050 квадратни метри. Гаражата ќе има три нивоа и ќе биде висока 10 метри. Со катната гаража се очекува да се ублажи проблемот со недостигот од простор за паркирање околу ТЦ „Бисер“. - Инвеститорот има рок од две години за изградба на предвидениот објект. Сепак, поради тоа што значително доцнат со изградбата немаме информации дали ќе завршат со реализацијата на проектот во предвидениот рок “ велат од Министерството за транспорт и врски.