Доградба на НУБ

Свечено отворање на дигиталната библиотека на Македонија

Bиблиотека е сместена во доградбата на НУБ „Св. Климент Охридски“, на простор од 3.300 квадратни метри

Невена Поповска

В недела, на 24 мај и официјално ќе биде отворена Дигиталната библиотека на Македонија. Според предвидената програма на свеченоста поздравни беседи ќе одржат: директорот на НУБ „Св. Климент Охридски“, Миле Бошески, министерката за култура, Елизабета Канческа Милевска и премиерот на Република Македонија, Никола Груевски. На свеченоста исто така ќе бидат соопштени и добитниците на признанија и благодарници, како и свечено доделување на плакети и Светиклиментовата статуетка.

Дигиталната библиотека ќе биде сместена во доградбата на националната и универзитетска библиотека „Св. Климент Охридски“. „Поради експанзија во издавачката дејност предвидениот простор за сместување на библиотечните фондови набрзо стана недоволен и се наметна како сериозен проблем за заштита. Чување и користење на библиотечните материјали со кои располага Библиотеката“-подвлече на вчерашната средба со новинарите директорот на НУБ „Св. Климент Охридски“, Миле Бошески. Од друга страна, на глобално ниво се промовира процесот на дигитализацијата, така што како алтернативно решение во процесот на заштита, достапност и афирмација на националните културни добра, се јави идејата за дигитална библиотека. Во меѓувреме на Европско и на светско ниво се промовираше идејата за дигитална библиотека, а националните библиотеки се задолжија да го организираат овој процес на национално ниво.

„Овој процес отвори можности за афирмација на националното книжно наследство, продолжи Бошески, и за таа цел Владата на Република Македонија издвои средства во висина од 2.000.000 евра во денарска противвредност за изградба на Доградбата на НУБ „Св. Климент Охридски“ во која ќе биде сместена дигиталната библиотека на Македонија. Во овој простор ќе бидат сместени: Центар за дигитализација, Центар и сервис за систем COBISS: МК Национална библиографска база, археографска, ориентална и музичка збирка, редок библиотечен материјал, тренинг центар за обука на библиотекари и корисници, простор за користење дигитални форми, изложбен простор, депоа за сместување на општиот фонд на Библиотеката и депоа за сместување на фондовите на збирките.“

Во однос на климатските услови за сместување и чување на книжните фондови и дигиталните форми, од Библиотеката информираат дека објектот е изведен според врвни стандарди, а воедно и за прв пат истиот е снабден со сопствен генератор за напојување со електрична енергија на серверите и другата електронска опрема во случај на слаб напон или прекин на напојувањето од градската мрежа. Предвидено е и Интернет-пристап за секој корисник и самостојно биро со компјутерска опрема, а исто така корисниците ќе можат да побараат помош од стручни лица кои ќе ги одржуваат посебните збирки и ќе ги информираат корисниците за можностите за користење на дигиталните форми.

Новата дигитална библиотека претставува врв во презентацијата, заштитата и користењето на богатото национално книжевно наследство во европски рамки. Македонија има обврска да ги отвори своите ризници и да му ги претстави на светот културните богатства, вели министерката за култура, Елизабета Канческа-Милевска

Проектот "Дигитална библиотека на Македонија" - доградба на Националната и универзитетска библиотека "Св. Климент Охридски" - Скопје, ќе биде промовиран в недела, на празникот "Свети Кирил и Методиј".

Како промотори се најавени премиерот Никола Груевски и министерот за култура Елизабета Канческа-Милевска.
- НУБ е храм на колективната меморија на македонскиот народ. Новата дигитална библиотека претставува врв во презентацијата, заштитата и користењето на богатото национално книжевно наследство во европски рамки. Македонија има обврска да ги отвори своите ризници и да му ги претстави на светот културните богатства, потенцира Канческа-Милевска.

Таа додава дека реализацијата на овој објект е од извонредно значење, бидејќи ќе се реши проблемот со сместување на библиотечниот фонд од илјадници книги и книжевни дела со непроценлива вредност.
- Со овој проект, покрај верификацијата на вредноста на националното културно богатство, на пошироката јавност ќе и се отвори можноста да ги опсервира и вреднува светските научни дострели, додава Канческа-Милевска.

Во новиот објект "Дигитална библиотека на Македонија" ќе бидат сместени: Центарот за дигитализација на книжно наследство, виртуелната библиотека на Македонија и автоматизираната национална библиографска база во рамките на ЦОБИСС системот на Македонија, сите специјализирани збирки. Со проектот се предвидува секој корисник да има свој компјутер.

Важно е што со почнувањето на дигитализацијата според меѓународните стандарди ќе се овозможи постапно да се реализира дигитализацијата на целокупното богатство што се чува во НУБ и тоа да стане дел од Европската и Светската дигитална библиотека.

Поставувањето на камен-темелникот за доградбата се случи на 11 април 2008 г. Од Министерството објаснуваат и дека заради нестабилното тло, биле потребни дополнителни геомеханички испитувања. "Тоа, пак, придонесе да се изгради уште едно депо, со што се зголеми сместувачкиот/магацински простор за доплнителни 700 м2. Просторот на располагање е 3300 м2", објаснуваат од Министеството.

Објектот го проектираше проф. арх. Петар Муличковски, кој е автор и на постоечката зграда.