Панорами од Водно, Милениумскиот крст, улицата Македонија, Транспортниот центар, мостот „Гоце Делчев“ и од голем број урбани пејзажи можат да се погледнат на изложбата „Скопје навечер“ на младиот фотограф Ѕвонко Плавевски во Музеј на град Скопје

- На ноќната фотографија и е посветено многу малку внимание на овие простори. Мојата љубов кон овој вид на фотографија ми беше предизвик да создадам колекција што ќе ја освежи културната публика. Тежината на самата тема ми даде дополнителен мотив да го искористам сето мое знаење и искуство, овековечувајќи ги овие несекојдневни и посебни моменти. По речиси две години подготовки, со гордост ја споделувам колекцијата „Скопје навечер“ со сите љубители на уметничката фотографија - вели авторот.

Дваесет и петте урбани фотографии, кои го прикажуваат вечерното лице на Скопје, посетителите ќе можат да ги погледнат до први октомври.

Дваесет и седумгодишниот уметник е добитник на наградата „Најдобра илустрација“ од Здружението на фоторепортери во 2004 година и има учествувано на повеќе групни изложби.