Реконструкција на А1 / Е75

Градежната компанија „Гранит“ досега целосно реконструираше 4,5 километри од автопатската делница Катланово – Велес, а работите на терен е планирано да се комплетираат до крајот на 2012 година. Во моментов се врши обемна санација на дотраената патна инфраструктура. „Со проектната документација предвидено е да се изведат следниве градежни активности: гребење на постојниот асфалт и поставување на нови асфалтни слоеви во должина од 27,6 километри, изработка на комплет нови банкини по должина на делницата, изработка на риголи, промена на поголем дел од старите со нови ивичњаци, санацијата на три насипи кои се слегнати, санација на десет усеци кои се нестабилни и предизвикуваат одрони на патот, промена на системот за осветлување на тунелот и поставување на хоризонтална и вертикална сигнализација“, објаснуваат за „Билд“ од Агенцијата за државни патишта.

Во август минатата година започна реконструкцијата на делницата од Катланово до Велес на автопатот М-1, инвестиција вредна 7,2 милиони евра. Во претстојните месеци ќе продолжи привремениот сообраќаен режим, така што во одредени денови ќе има целосен застој на сообраќајот од 2-3 часа поради потреба од минирање. На постоечката обнова на автопатот и претходеше санација и затегнување на мостовите долж целиот правец, проект финансиран од страна на НАТО. Државните институции засега немаат информации кога би започнала реконструкцијата на делницата од Велес до Скопје, која треба да се комплетира со инвестиција од НАТО алијансата. Овој дел од автопатот М-1 е еден од најпрометните патишта во Македонија, на кој просечно минуваат по 9.000 возила дневно.

#
Објавено на 17.04.2012 во категорија Вести.

Министерот за транспорт и врски Миле Јанакиески и началникот на штабот на КФОР бригадир – генерал Рекс Спитлер, денеска го потпишаа Меморандумот за разбирање за реализација на проектот за реконструкција на мостови долж Коридорот 10, со кој е предвидено НАТО алијансата да донира 8,6 милиони евра за санирање на 13 мостови на потегот од Катланово до Велес. Точниот обем на работите што ќе следат ќе биде дефиниран со изработка на основниот проект што треба да го подготви Градежниот факултет во наредните три месеци. Министерот Јанакиески најави дека до септември годинава ќе биде распишан јавен повик на кој треба да се пријават потенцијалните изведувачи, а компанијата што ќе ги реконструира мостовите ќе се знае во декември годинава. Според министерот, градежните активности би започнале следната пролет и би завршиле до крајот на 2014 година.

Реконструкцијата на 13-те моста претставува трета фаза од проектот за зајакнување и санација на мостови во државава, кој се изведува со финансии од НАТО. Во претходните две фази со донација од алијансата во вредност од 22,5 милиони евра беа опфатени вкупно 51 мост. Првата фаза се реализираше во 2006 и 2007 година, а со неа беа опфатени мостови на делниците Катланово – Велес и Скопје – Блаце. Со втората фаза од крајот на 2007 и во текот на 2008 беа реконструирани мостови на делницата Демир Капија – Гевгелија. Мостовите што беа опфатени со проектот се со вкупна должина од четири километри.

На резултати од денес потпишаниот документ допрва ќе треба да се чека, но битно е да се напомене дека претходно договорената санација со НАТО сеуште не е завршена. Северноатлантската алијанса пред три години вети дека ќе реконструира 26 километри од автопатот Велес – Петровец и 16 мостови на истата делница во вредност од 14 милиони евра, согласно со претходно потпишаниот меморандум. Градежните работи беше предвидено да завршат на 31 декември 2010 година, но досега истите не се ниту започнати. Во меѓувреме, асфалтот на автопатот од Велес кон Скопје е во исклучително лоша состојба и на него му е потребна итна санација.