Тинекс маркети

Најголемиот трговски синџир Тинекс планира да влезе во бизнисот со веледрогерии. Од следната година ќе почнат со нов концепт на работа кој ќе вклучува продавници, односно супермаркети во кои ќе се продава исклучиво детска храна, козметика, средства за хигена, здрава храна и храна за миленици. Од компанијата најавуваат амбициозни инвестициски проекти за следната година, а до крајот на годината ќе се отворат два нови Супер- Тинекс маркети и еден голем супермаркет. Од менаџментот на компанијата велат дека и покрај тоа што е криза, успеале да го одржат работењето, а во тоа со голема мера им помогнале мерките кои ги презеле за да се справат со кризата.
Кристина Тодоровиќ, генерална директорка на Тинекс вели дека од почетокот на годината силно се чувствува економската криза, но со пренасочување на средствата и со инвестирање во нови објекти, компанијата и оваа година ќе ја заврши со раст.

“До крајот на годината ќе ги отвориме двата нови Супер -Тинекс маркети кои се градат. Едниот е на локацијата во Кисела Вода на улицата Првомајска другиот во старата зграда на фабриката Раде Кончар, простор кој го користевме како дистрибутивен центар. И во населбата Капиштец при крај е изградбата на катната гаража во која ќе има голем супермаркет со дополнителни содржини како што се кафетерија, банка, дрогерија”, вели Тодоровиќ.
Таа најавува дека Тинекс ќе воведе нов концепт во работењето и ќе го шири  бизнисот и во други сегменти, освен трговијата со храна.
“Планираме следната година да отвориме супермаркети во кои ќе се продава козметика, храна за деца, здрава храна, храна за миленичиња, тоа ќе биде еден вид на дрогерија каде на едно место ќе се најдат сите овие производи. Тргнуваме амбициозно и планираме да отвориме неколку вакви продажни места”, најавува Тодоровиќ.

Според неа, бизнис-програмата на Тинекс за следната година е многу амбициозна, односно ќе вклучи големи инвестиции.
“Во моментов, ако ги пресметаме овие три објекти кои ќе бидат пуштени во употреба, годинава ќе имаме 40 маркети. За следната година планираме да отвориме уште десет и да достигнеме бројка од вкупно 50 продавници во рамки на синџирот. Малку е амбициозно од наша страна, но подготвени сме да се соочиме со предизвикот, бидејќи тоа ќе придонесе за раст на нашата компанија”, објаснува Тодоровиќ.

Очекуваме 2009 да ја завршиме со раст од 10%

Иако трговските синџири најмалку беа погодени од кризата, сепак од почетокот на годината, поради падот на потрошувачката и тие забележаа негативни резултатати. Од Тинекс велат дека добро се справуваат со кризата, па така и покрај песимистичките прогнози годинава очекуаат да ја завршат со раст на приходите и на добивката.

“Во првите шест месеци како резултат на мерките кои ги презедовме и поради новите објекти кои ги отворивме во 2008 година, приходите се за 5% поголеми споредено со првите шест месеци лани, додека добивката е за 30% поголема” вели Тодоровиќ. Нејзината проекција е дека годината ќе ја завршат со раст на приходите до 10% и раст на добивката до 30%. 
“Со отворањето на новите супермаркети очекуваме да се зголеми и потрошувачката, а и очекувањата дека економската криза е при крај дава оптимизам кај граѓаните, што ќе влијае на зголемување на потрошувачката. Сето ова треба да резултира со зголемување на приходите до крајот на годината”  објаснува Тодоровиќ. 

Минатата година “Тинекс” ја заврши со раст на приходите од 30% и мал раст на добивката од 0,7%. 
“Оваа година поради кризата компанијата нема да забележи голем раст, но и со овој минимален раст кој го очекуваме сме презадоволни. Следната година очекуваме многу повеќе да пораснеме. Очекувам дека ќе имаме раст од 30% споредено со годинава, а добивката би требало да остане на нивото кое го очекуваме годинава, односно околу 30%” прогнозира Тодоровиќ.
Трговскиот синџир Тинекс е присутен на македонскиот пазар 15 години. Во моментов во рамки на компанијата работат 37 супермаркети, каде се вработени 1.000 луѓе. Тинекс е најголемиот трговски синџир во Македонија со најголем број на објекти, а освен во Скопје присутен е во уште осум градови во државата.