Симулација на земјотрес на две згради

Целта е да се обезбедат показатели за издржливоста и за стабилноста на објектите, што ќе биде основа за планирање на надградбите и на доградбите

Прво во базата на податоци ќе се внесат јавните, а потоа и станбените објекти

Карпош ќе испитува колку им се издржливи објектите

База во која ќе бидат напишани податоците за сите објекти во општината Карпош ќе одлучува дали на еден објект во нивната општина ќе може да се прават надградби и доградби. Базата на податоци ќе се изработи по неколку критериуми што ќе ги одреди Институтот за земјотресно инженерство и инженерска сеизмологија (ИЗИС), а сите ќе мораат да ги почитуваат. 

Идејата за овој проект за кој општината Карпош потпиша договор со ИЗИС доаѓа од градоначалникот на општината Стевчо Јакимовски. Тој побарал да се утврди методологија за давање одобренија за доградување и за надградување на некој објект. 

Старите згради, најопасни

Од општината Карпош велат дека на нивна територија има многу згради што се изградени уште пред катастрофалниот земјотрес во 1963 година и се несеизмички изградени, па затоа би било убаво да има ваква програма според која точно ќе се знае каде смее да се прават интервенции. Најчесто вакви згради имало во Карпош 1 и 2.

- Треба да се направи компјутерска програма за аналитичка и експериментална верификација на асеизмичката стабилност и сигурност на постојните објекти на нашата територија. Целта е да се обезбедат показатели за издржливоста и за стабилноста на објектите, што ќе биде основа за планирање на надградбите и на доградбите. Прво во базата на податоци ќе се внесат јавните објекти, училишта, болници, градинки и слично, а потоа и станбените објекти - објаснува Марјан Ивановски, раководител на секторот за поддршка на градоначалникот. 

Процедурата ќе остане иста

Од општината велат дека планираат наскоро да организираат и обука за некои од вработените во секторот урбанизам во општината, за да знаат како да работат со системот. Сето ова ќе придонесе веднаш штом ќе стигне барање за надградба или доградба да се знае дали смее да има надградба и доградба на некој објект. Од општината најавуваат дека за оваа година планираат експериментално да проверат две згради на кои веќе се врши надградба, односно на овие објекти ќе се симулира земјотрес. Тоа се зградата на улицата Гиго Михајловски и зградата до „Симпо“, на булеварот Партизански одреди. 

- Со самото тоа што даваме дозволи за градење, имаме право и да проверуваме дали објектите се исправни. За оваа процедура нема да бидат потребни ниту повеќе документи, ниту пак повеќе пари, а нема да се зголеми ниту времето за добивање градежна дозвола, туку само објектите ќе бидат побезбедни и со поголем квалитетот - додава Ивановски.