Плоштад Филип Втори - Автокоманда

Започна изградбата на плоштадот во општина Гази Баба

Новиот плоштад ќе чини меѓу 25 и 27 милиони денари, со површина од 5.768 квадрати од гранитни плочи

Во паркот помеѓу улицата „Трифун Хаџи Јанев“ и булеварот „Александар Македонски“ во Автокоманда вчера почна изградбата на новиот плоштад во Гази Баба. Градоначалникот Коце Трајановски свечено го означи стартот на изградбата. Плоштадот ќе има површина од 5.768 квадратни метри и ќе биде изработен од гранитни плочи. Ќе биде збогатен со фонтана, бина и плато за споменик.

„Овој плоштад ќе биде од големо значење за општината, тука ќе се одржуваат културни манифестации, ќе има простор за одмор и рекреација и фонтана“, рече Трајановски, потенцирајќи дека просторот е на многу атрактивна локација.

Проектот за новиот плоштад, кој чини помеѓу 25 и 27 милиони денари, го изработи јавно претпријатие од Прилеп. Досега се собрани 90 отсто од потребните средства и во зависност од набавката на гранитот, се планира плоштадот да биде готов на Денот на општината 3 Ноември.

„АДГ ’Илинден‘ е една од најстарите фирми на територијата на оваа општина и ние со задоволство донираме во оваа и во сите други градби во општината“, рече Андреја Ошавков, директорот на „Илинден“, кој ќе учествува во изградбата.

Новиот плоштад, како што најави градоначалникот Трајановски, во почетокот ќе се вика плоштад „Општина Гази Баба“, а се разгледува предлогот на граѓаните за името „Филип Втори“. (В.Д.)

Гази Баба чека идејни решенија за коњаник и за фонтана на плоштадот

Изградбата на плоштадот во населбата Автокоманда доцни поради набавката на црвениот гранит. Плоштадот се наоѓа меѓу булеварот Александар Македонски и улицата Трифун Хаџијанев. Неговата изградба почна на 18 јули, но работите, како што истакнуваат од Општината Гази Баба, ги забавило и дождливото време во септември, поради што беше прекинато бетонирањето. Оттаму се надеваат дека плоштадот ќе биде поплочен до средината или најдоцна до крајот на ноември. Засега комплетно е завршена целата подземна инфраструктура, поточно водоводната и хидрантната мрежа, атмосферските одводи, како и електричната инсталација и бетонирањето. По завршување на оваа фаза, ќе следи изградбата на фонтаната и споменикот Коњаник. На постаментот ќе биде изведена ѕвездата од Кутлеш. Општината објави конкурс за изработка на идеен проект за ова спомен-обележје. Изведбата на споменикот ќе трае околу две години.

Платото на плоштадот е со површина од 5.768 квадратни метри. Проектиран е како плато поплочено со гранитни плочки, пристапни патеки, зеленило со цветни алеи и високо и ниско зеленило, а ќе содржи и две забавни детски катчиња. Планирано е да биде поставена и урбана опрема, мини-бина на која ќе се одвиваат разни манифестации, како и плато за споменикот. На двете граници од плоштадот ќе бидат засадени 14 јасени.Иако беше најавено дека плоштадот ќе го носи името на Филип Втори Македонски, засега, тој сепак ќе биде само плоштад на општината Гази Баба.

http://dnevnik.com.mk/?ItemID=F3E69623452283489FE4FCEA07D081CF