Владата планира да вложи 225 милиони евра во проектот „Вардарска долина“

Потпишан Меморандум за разбирање за проектот Вардарска долина со кинеските КВЕ и КРБ

Скопје, 11 април

Владата денеска потпиша Мемеорандум за разбирање за проектот Вардарска долина со Кинеската меѓунаордона корпорација за води и електрична енергија (КВЕ) и Кинеската банка за развој (КРБ) со кој се предвидува во наредните 12 до 18 месеци да се изготви физибилити студија по која ќе следи проектот на изведување што ќе се спроведува во четири фази.

Проектот предвидува изградба на 12 хидроелектрични централи, од кои две поголеми, скалесто распоредени по текот на реката Вардар до границата со Грција. Неговата вредност се проценува на 1,5 милијарди евра, а се очекува да се спроведе за 12 до 15 години.

- Инвеститор на проектот за кој преговорите почнаа пред повеќе од шест месеци ќе биде Владата на Република Македонија со учество од 15 проценти од сопствени извори и кредит од КРБ во износ од 85 отсто од вредноста. Се работи за најголем проект досега во Република Македонија што ќе биде значаен за градежниот сектор, но и за водоснабдувањето, транспортот и туризмот, како и за економијата во целост, рече вицепремиерот за економски прашања Владимир Пешевски кој заедно со министерот за економија Фатмир Бесими го потпиша документот од македонска страна.

Вицепремиерот Пешевски нагласи дека со Меморандумот се прецизира како ќе се одвива процесот во иднина и додаде дека соглсно проценките КРБ ќе обезбеди заем од 1,275 милиони евра, а Владата ќе учествува со 225 милиони евра од буџетски средства или, пак, преку други извори.

- За секоја фаза од реализацијата на проектот се предвидува посебен кредит во износ од 85 отсто од вкупната инвестиција на фазата. За секоја фаза посебно ќе се дефинира точниот износ и рочноста и каматата за кредитот, рече Пешевски и додаде дека станува збор за исклучително поволни услови под кои се нуди кенескиот заем, но нагласи дека во моментов на се прецизно дефинирани.

Министерот Бесими нагласи дека станува збор за стратешки интегрален проект значаен за енергетиката, но и за земјоделството, транспортот и туризмот во Македонија и додаде дека и досега се изработени неколку студии за Вардарска долина.

- Проектот предвидува изградба на 12 хидроелектрични централи по течението на Вардар на потегот од Скопје до границата со Грција во вкупна должина од 200 километри. Две од нив Велес и Градец се поголеми со висина на браната од 59 и 30 метри, а останатите 10 се помали со висина на брана од 8 до 10 метри, рече министерот Бесими.

Тој прецизира дека е предвидено вкупниот инсталиран капацитет на 12-те централи да изнесува од 300 до 350 мегавати со просечно годишно производство од 1.000 до 1.400 гигават часови електрична енергија.

- Тоа е 20 отсто од досегашното годишно прпизводство на електрична енергија во Македонија или 15 отсто од вкупната електрична енергија што се троши заедно со увозот, а инвестицијата ќе биде 20 до 25 отсто од БДП, рече Бесими.

Вршителот на должност кинескиот амбасадор во Македонија Цуи Жимин рече дека реализацијата на проектот Вардарска долина ќе значи по 100 милиони евра кинеска инвестиција во Македонија во наредните 12 до 15 години.

- Тоа ќе овозможи секоја година по 3.000 директни и 20.000 индиректни вработувања , а убеден сум дека ќе даде придонес и за економскиот развој на Македонија, како и за продлабочување на одличните односи со НР Кина, истакна Жимин.

Ванг Ју од КВЕ нагласи дека реализацијата на проектот значително ќе го подобри снабдувањето со електрична енергија во Македонија, но и оти ќе придонесе за намалување на емисијата на стакленичките гасови во атмосферата.

- КВЕ во последните 50 години е присутна на светскиот пазар и е една од најголемите корпорации во областа на водните ресурси и хидроенергијата. Заклучно со крајот на минатата година има реализирано повеќе од 700 договори во над 60 земји од светот во вредност поголема од осум милијарди долари, рече Ју.

Тој посочи дека во 2004 година КВЕ ја изгради ХЕЦ Козјак, како и двете најголеми хидроцентрали во соседна Албанија во 70- тите години од минатиот век. Во моментов, нагласи, КВЕ преговара со поголем дел од соседните земји на Македонија за изградба на хидро и ветерни електрани.

Фан Лиџин од КБР истакна дека банката има кредитен рејтинг „А+“ и оти е присутна во над 90 земји и региони во светот со реализирани проекти за кредитирање. 

- КБР е целосно државна банка со активност главно за долгорочно кредитирање и е најголемтата кинеска банка за кредитирање во странство. До крајот на 2010 година вкупниот баланс на кредити на КБР достигна над 760 милијарди долари меѓу кои балансот на девизни кредити изнесува 141,3 милијарди долари, рече Лиџин.

http://vlada.mk/?q=node/6620