Разно

Непроверени клими ни висат врз глава

Кој ќе ја сноси одговорноста ако врз нечија глава падне клима-уред? Евентуално монтерот, но само ако уредот паднал во рок од една до две години, колку што трае гаранцијата за монтажата. А потоа, со среќа. Законска рамка за поставувањето на овие апарати на надворешниот дел од зградите воопшто нема, па нема ниту каде да се бара виновникот ако од временските влијанија шрафовите се разлабават или попуштат и поради тоа биде предизвикана несреќа.

- Кога шетам со моето мало дете во количка, го избегнувам центарот бидејќи на секој чекор висат клима-уреди. Пешачките патеки секогаш се зафатени со автомобили, па луѓето се принудени да одат веднаш покрај зградите. Таму над главите ни висат клима-уреди, саксии, разни реклами и што ли уште не. Мојот сопруг понекогаш смета дека сум премногу параноична, но јас навистина се плашам за својата и за безбедноста на моето дете, оти се' и сешто паѓа од фасадите - вели Ана Стојанова, жител на Карпош.

Во Скопје, инвазијата на поставување еркондишни започна пред 15-ина години. Од фирмите што се занимаваат со нивното монтирање велат дека одржувањето на клима-уредот не е во нивна надлежност по истекот на гаранцијата од една до две години, која зависи од типот на уредот.

Освен климите, несреќи може да предизвикаат и многу други објекти како билборди, шипки, ламарини и разни делови од стари истрошени фасади. Се' уште се памети случајот од 80-тите години од минатиот век, кога саксија што паѓа усмрти човек што се движел покрај Градски ѕид.

- Со пријателката си правевме муабет и одеднаш од зградата кај семкарницата „Зуко“ ни падна ламарина пред нозе. Целосно бевме извадени од памет! Можевме да загинеме доколку направевме еден чекор повеќе. Беше голема 1,5 метар, со остри рабови. Страшно! - вели скопјанката Катерина П.

Во последно време на покривите од скопските згради може да се забележи и зголемено присуство на масивни билборди. Од Градот велат дека ги изработуваат елаборатите само за билбордите на јавните површини, додека за оние на зградите целата одговорност за безбедноста е на грбот на општините.

- За конструкциите и билбордите на зградите се надлежни општините и тие треба, согласно законот и детаљните урбанистички планови, да издаваат согласности. Значи, кога е во прашање безбедноста на граѓаните и естетиката на просторот, ставот е доследно почитување на законите и на подзаконските акти - изјавија од Одделението за односи со јавноста во Градот.

Голем дел од големите билборди и рекламни паноа по фасадите и над зградите се поставени без дозвола, иако таа е потребна за сите објекти што имаат поголема површина од 12 квадрати. Од општините неколкупати досега потенцирале дека од нив никој не побарал дозвола. Сепак и покрај свесноста за вакво нешто, општинските инспектори го толерираат самоволието на рекламните фирми и не излегуваат на терен да ги отстранат дивоградбите.

За се' друго што паѓа од старите фасади на зградите, поради тоа што никој не ги одржува со децении, може да се зборува со денови. Со новиот Закон за домувањето, одржувањето на фасадите е строго поставено во рацете на куќните совети, но колку тоа ќе заживее допрва ќе се види.

За среќа, досега не е забележан случај со трагични последици, но, како што коментираат самите граѓани, сето тоа може да се припише на невидена среќа.

Староста на фасадата и нередовното одржување си го прави своето, па изминативе години на неколку згради беа залепени и предупредувања до минувачите да внимаваат на одроните од фасадите. Такво нешто можеше да се види на зградата на Уставниот суд, од која паѓаа плочки, но и од кулите на Градски ѕид.

http://dnevnik.com.mk/?ItemID=1E38BF53AF2E014F962989DC842ADAB3

Јакимовски ќе забрани прекопи на улиците во Карпош

Подземните инсталации ќе можат да се инсталираат
единствено со подземно дупчење

Деспина Трајковска

Во Општина Карпош во наредните пет години ќе биде забрането прекопување на улиците, тротоарите и парковите за потребите на разни инсталации. Ова е конечната одлука на градоначалникот Стевчо Јакимовски, со цел да се стави крај на, како што вели, несовесниот пристап на субјектите кои имаат потреба од инсталирање разни подземни инсталации на подрачјето на Карпош. На сите нив Општината ќе им дозволува монтирањето на подземните системи да го вршат поинаку од досега. Имено, според Јакимовски, постои метод за подземно дупчење со кое би се извршило монтирањето разни кабли, доводи, инсталации...

Водњанци бараат да се покрие каналот кај „Кочо Рацин“

Каналот за одлив на атмосферски води спроти основното училиште „Кочо Рацин“ на улицата Салвадор Алјенде е отворен со години. Жителите од оваа улица сметаат дека отворениот канал не само што претставува неубава глетка за овој дел од градот, туку е и сериозна опасност за нивните деца, како и за автомобилите. Тие се жалат дека освен што каналот е исчистен пред еден месец, досега никој од надлежните не се заангажирал да го покрие.

Од друга страна, Градот Скопје и Општина Центар најавуваат дека ќе го покријат каналот во следната година и врз него ќе изградат паркинг.

- Досега не се случило некое од децата или возрасните да настрада во каналот, бидејќи родителите стравуваат и ги носат до училиштето, особено помалите. Но, затоа три-четири пати се случило во каналот да пропаднат возила - вели жител на улицата Салвадоре Алјенде.

Родители чии деца учат во ова училиште стравуваат за нивната безбедност.

- Имам седумгодишен син, кој оди на училиште во „Кочо Рацин“. Каналот е опасен, а тротоарот до него е многу тесен, па затоа постојано го опоменувам моето дете да се движи од страната на улицата, каде што има тротоари. Ако се покрие каналот, ќе биде и безбедно и поубаво за пешаците - вели Благица Поп Томова.

Каналот претставува опасност и за возрасните, бидејќи од неговата страна просторот за движење е многу тесен и мало невнимание може да доведе до несреќен случај.

- Мене ми е страв да поминувам покрај каналот иако сум возрасна, бидејќи имам вртоглавица. Надлежните треба да преземат нешто тој да се затвори - вели скопјанката Мирка Велкова.

Проблемот со отворениот канал беше изнесен и на последната седница на Советот на Град Скопје. Советничката Дафинка Саздова од ВМРО-ДПМНЕ предложи неговото покривање да се вметне во буџетот на Градот за 2010 година.

- Поради отворениот канал, се случувале повеќе немили случки. Се случувало деца да паднат во каналот, а досега никој не се заангажирал тој да се затвори. Сепак, се работи за елитната населба Водно, а приоритет е безбедноста на децата што оттука секојдневно минуваат - рече Саздова.

Градоначалникот на Општина Центар, Владимир Тодоровиќ, потврди дека каналот ќе се затвори и со тоа ќе се создаде и простор за паркирање. Иако за каналот е надлежен Градот, Тодоровиќ ветува дека и Општината Центар ќе помогне за реализацијата на проектот.

- Разговарав со скопскиот градоначалникот Коце Трајановски, од кого имам сознанија дека Градот е подготвен во наредната 2010 година да го затвори каналот. Се' зависи од подготвеноста на Градот, а двајцата се согласивме да ги поделиме трошоците - истакна Тодоровиќ.

Тој додаде дека Општина Центар веќе нарачала проект, кој е подготвен.

- Според проектот е предвидено каналот да биде покриен со покривни монтажни плочки на кои ќе можат да се паркираат возила. На тој начин сме завршиле две работи - и каналот ќе биде покриен и ќе се создадат одреден мал број места за паркирање - вели Тодоровиќ.

Според него, покривањето во должина од 400 метри ќе чини околу 100.000 евра.

Од Градот Скопје потврдија дека се во комуникација со Општината Центар за решавање на проблемот, но не сакаа да кажат детали.

- Штом ќе се договорат детали, јавноста ќе биде информирана за проектот - одговорија од Градот.

http://dnevnik.com.mk/?ItemID=CE8D649A92D3DE42836B9C161FF192DB