Кеј на река Пена - Тетово

За шминка на Пена ќе бидат потрошени еден милион евра

Изградбата на речното корито и на пешачките патеки покрај реката Пена во Тетово се одвива со полна пареа. Проектот започна пред еден месец и до есенва од локалната самоуправа очекуваат да го реализираат. Покрај уредувањето на коритото, се поставува и фекална канализација на две улици што гравитираат покрај реката. За целиот проект се одвоени еден милион евра, пари од општината.

- Еднаш засекогаш да се уреди коритото и да се реши проблемот со фекалната канализација во оваа населба. Проектот започна пред еден месец и се реализира со мал застој, поради тоа што стариот проект предвидувал други решенија, кои денес не се изводливи, па затоа се правеа нови проекти и решенија. Се уредува коритото од Камениот мост кај болницата до населбата Горна Чаршија кај месноста Млин - рече директорот на ЈП „Геоинженеринг“, кое раководи со реализацијата. Со уредувањето на коритото, улицата што минува покрај реката ќе се прошири и ќе биде широка седум метри плус пешачка патека. Со тоа тетовци ќе добијат околу еден километар пешачка патека покрај реката Пена.

Се уредува кејот и коритото на Пена

Локалната власт на Тетово интензивно работи изградба и уредување на речно корито и на кејот на реката Пена, како и на чистење од големата количина разновиден отпад. Ниската еколошка свест на дел од граѓаните најдобро се забележува кога и водостојот на реката е низок. Коритото на Пена е преполно со пластичен отпад, делови од мебел, бела техника и друг смет од домаќинствата.

Според портпаролот на Општината, Флакрон Пустина, работите се очекува да привршат кон крајот на месецов. Инвестицијата вредна 8 милиони денари опфаќа изградба на кејотза да се спречи можноста од излевање на реката, чистење на речното корито и отворање пристапен пат што ќе води до новиот Клинички центар.

- Во тек е втората фаза на уредувањето на кејот на реката Пена, што го опфаќа делот од мостот во Горна чаршија до Мелницата. Потоа ќе се продолжи со работа од Камениот до мостот кај Клиничкиот центар - рече Пустина.

Реката Пена од својот извор до Тетово е со висока чистота на водата. По нејзиното поминување низ градот, поради неконтролираното фрлање на смет од граѓаните, но и од фирмите, загадувањето е многу големо и негативно влијае и на живиот свет во неа. (А.С.)  http://www.dnevnik.com.mk/?ItemID=EE9F0F2B6F275844ADA29DB6A13E4963