ЕДЕН ОД НАЈУБАВИТЕ СКОПСКИ СПОМЕНИЦИ НА ПРИРОДАТА ДОБИВА ЗАСЛУЖЕНО ВНИМАНИЕ

Кањонот Матка, конечно, топ-туристичка дестинација

Градот планира идната година да набави и еколошки туристички чамец, да го реализира проектот за изградба на мост преку кој ќе може пеш да се стигне до трите прекрасни пештери, Врело, Крштална и Убава. Од државата, пак, ќе се бара изградба на заобиколен пат до кањонот кој нема да поминува низ селата

Реновирани патеки, амбиентално осветлување, нова урбана опрема, туристичко биро и неверојатна природна убавина. Вака накратко може во моментот да се опише кањонот Матка, каде идната година се планира и изградба на мост преку кој ќе може пеш да се стигне до трите прекрасни пештери, Врело, Крштална и Убава, набавка на еколошки туристички чамци, како и изградба на заобиколен пат, со кој побрзо ќе стасате до кањонот.
- На патот за Тетово кон кањонот Матка се поставени 22 информативни табли. Реконструирана е и обезбедена постоечката патека од левата страна на езерото Матка, со почеток од црквата Св. Андреа во должина од 4 километри. Постоечката просторија, лоцирана од левата страна на влезот во кањонот е реконструирана во културно-информативно биро, каде ќе можете да ги добиете сите потребни информации и каде ќе се продаваат билети за туристичко разгледување со чамец. Тука има и маси, дрвени клупи во форма на триаголник, информативна табла и 70 метри железна ограда околу новото плато пред планинарскиот дом. Просторот околу домот и црквата Св. Андреа е осветлен со канделабри, а во план е да се постават и рефлектори кои ќе го осветлуваат целиот кањон, како и пештерите Врело и Убава, објаснува Димче Смилев од одделението за туризам на Град Скопје.

До пред неколку месеци запуштен и оставен на забот на времето, овој споменик на природата, кој се наоѓа на само 15 километри од Скопје, конечно добива заслужено внимание. Првата фаза од разубавувањето привршува, а во втората, која ќе почне од јануари 2009, е предвидена и реализација на нови проекти кои Матка ќе ја стават на картата на европски и светски туристички дестинации.
- Планинарски дом, кој е под концесија, е речиси целосно реновиран и ќе го добие својот автентичен изглед на македонска куќа, со простории за подолг престој. Во план е и проширување на веќепостоечкиот паркинг простор и изградба на два нови. Од државата, пак, ќе се бара изградба на заобиколен пат до кањонот во должина од околу 4 километри, додава Смилев.

Уникатна природа
Кањонот Матка, кој Градското собрание во 1994 година го прогласи за заштитено подрачје во категорија Споменик на природата, зафаќа површина од околу 5.000 хектари и се наоѓа 15 км југозападно од Скопје. Претставува природен резерват на голем број реликтни и ендемични растенија и животни, а од вкупно 1000 растенија, 20 отсто се ендемити или реликти. Кањонот е во надлежност на Градот, а грижата за спроведување на режимот на заштита на ова подрачје ги врши Спелеолошкото друштво "Пеони".

Ќе се гради патека и висечки мост до пештерите на Матка

Градот Скопје ќе инвестира 10 милиони денари за изградба на пешачка патека и висечки мост до пештерите на Матка, одлучија членовите на Советот на Скопје. Парите се пренаменети со последниот ребаланс на градскиот буџет, кој беше изгласан на вчерашната седница, а со кој се обезбедија услови да отпочнат неколку капитални проекти на градската администрација.

На Матка ќе се гради патека од 4 километри и висечки пешачки мост кој директно ќе ја поврзува патеката со пештерите. Со оваа инвестиција, нагласи градоначалникот Трифун Костовски, убавините на Матка ќе им станат подостапни на сите посетители. Истовремено, ќе се инвестира во уредување и чистење на пештерите.

Костовски истакна дека ова е голем проект кој Градот не може да го реализира сам, но се надева дека ќе има партнери, бидејќи целта е промоција на убавините и привлекување туристи. Тој потенцираше дека на овој потег лежат основи на многу манастири од минатото кои, ако бидат обновени, само ќе ја зголемат убавината и атрактивноста на локалитетот. (С.Н.)

http://utrinski.com.mk/?ItemID=03FB0D9DE057AB4586374D34BBAA924A

Деновиве, ентузијасти од истражувачкото друштво „Урсус спелеос“ откриле нов извор кај пештерата Врело, кој заедно со изворот Коритиште може да стане алтернатива на Рашче