Јавен велосипедски превоз - Македонија и странство

Профункционираа велосипедските пунктови во Скопје

На граѓаните на Скопје од денес за изнајмување по цена од 10 денари за еден час им се достапни 70 велосипеди на три локации во градот. Првите три велосипедски пункта се јавното паркиралиште „Треска“, јавното паркиралиште „Плоштад Македонија“ и кај трговскиот центар „Бисер“ во населбата Аеродром, а велосипедот којшто е изнајмен од една локација може да биде вратен на друга. Ова е прва фаза од имплементацијата на проектот за изнајмување на велосипеди под мотото „Остави го автомобилот, вози велосипед“. Бројот на пунктови во иднина е планирано да се зголеми во зависност од расположението и заинтересираноста на граѓаните за користење на оваа услуга. Градоначалникот Коце Трајановски ја искористи можноста да истакне дека Скопје се вбројува во градовите кои имаат одлични услови за изградба на велосипедска инфраструктура и дека во изминатиов период активно работи на воведување на велосипедот како алтернативно транспортно средство.

Објавено на 28.07.2010     во категорија Вести.

Извор: http://www.build.mk/?p=4619

Град Скопје го подготвува проектот за воведување на систем за изнајмување велосипеди

Градските власти во моментов работат на подготовка на проектната документација за воведување на најавуваниот јавен систем за самоизнајмување на велосипеди во Скопје. Станува збор за поставување на пунктови на 30 локации низ главниот град, кои би биле опремени со терминал за самоизнајмување на велосипеди и 20 држачи за велосипеди.

– Проектирањето на овој проект сѐ уште не е завршено и токму тоа треба да даде прецизни одговори за тоа на кои локации да се постават пунктовите, каков вид на велосипеди, нивниот број, распространетоста и слично – велат за „Мета.мк“ од Град Скопје.

Градските власти минатото лето се одлучија идниот автоматизиран систем за изнајмување велосипеди да го префрлат на ЈСП-Скопје, со што тој полесно би се вклучил како алтернативно превозно средство во скопскиот јавен превоз. Идејата е граѓаните да можат со кредитна картичка или СМС порака да подигнат велосипед на некој од 30-те пунктови, да го користат како превозно средство и да го вратат по неколку часа на било кој од поставените пунктови низ Скопје. Рокот за реализација на овој проект засега не е прецизиран.

Целта на проектот е да се овозможи непречено функционирање на системот за изнајмување велосипеди во текот на целата година во Скопје, но и да се унапреди и модернизира претходниот проект „Изнајми велосипед“, со којшто управуваше ЈП „Градски паркинг“.

Од Град Скопје информираат дека новиот систем за самоизнајмување велосипеди ќе се разликува од претходниот бидејќи ќе се користи понапредна технологија за изнајмување велосипеди, која ќе биде поедноставна за користење од граѓаните, но и ќе обезбеди поголема безбедност за самите велосипеди. Овие превозни средства во иднина ќе имаат ГПС локатор, така што тие нема да можат да се крадат, а оштетувањата ќе мора да се надоместат од несовесните граѓани.

„Мета.мк“ веќе пишуваше дека во Скопје веќе неколку години наназад со потешкотии функционираше претходниот проект „Изнајми велосипед“, којшто со малиот број пунктови и недоволните инвестиции само го намали интересот на граѓаните за изнајмување на јавните велосипеди. Податоците на ЈП „Градски паркинг“ за изминатите две години покажуваат дека не се остварени приходи од изнајмувањето на овие велосипеди, додека во годините пред тоа се регистрирани симболични приходи недоволни за одржување на самиот систем.

https://meta.mk/grad-skopјe-go-podgotvuva-proektot-za-voveduvaњe-na-sistem-za-iznaјmuvaњe-velosipedi/

Не постоеше овој систем едно време???

Се откажав од проектов штом видов кој ќе го раководи.

На Скопје му треба нов систем за изнајмување велосипеди и негово интегрирање со јавниот превоз

Градот Скопје не треба да се откажува, туку треба да го имплементира новиот автоматизиран систем за самоизнајмување велосипеди во главниот град, но и да го интегрира велосипедскиот сообраќај со јавниот превоз. Ова е стручниот став на универзитетскиот професор по јавен градски превоз Никола Крстаноски од Техничкиот факултет од Битола.

Во периодот на глобална пандемија со корона вирусот, за експертите е актуелно прашањето на кој начин да се обезбеди одржливост на јавниот градски превоз, во услови кога тој е неопходно средство за патување на граѓаните, но истовремено е и една од опасните локации каде што би можело да се пренесе корона вирусот.

– По самата природа на работите, јавниот градски превоз е масовен превоз. Од друга страна, пандемиите го бараат токму спротивното – исклучување на било какво масовно собирање – вели професорот Никола Крстаноски.

Тој посочува дека Градот Скопје треба да вложи во воведувањето на најавениот систем за изнајмување велосипеди, а многу градови во Европа и без корона вирусот се одлучија да инвестираат во велосипедскиот сообраќај како дел од нивните градски сообраќајни системи. Професорот Крстаноски додава дека до стојалиштата и станиците за јавен градски превоз треба да се проектираат паркинзи за велосипеди, а би можело да се размисли и за посебен простор во автобусите што ќе биде наменет за сместување на велосипеди.

Покрај во рамките на новиот систем за самоизнајмување велосипеди, ваквите велосипедски паркиралишта би можеле да ги користат и оние граѓани што имаат сопствено превозно средство на две тркала.

– Верувам дека значаен процент на граѓани би откриле најпогодна варијанта за движење, ако со велоспед доаѓаат до стојалиште на ЈСП, таму го паркираат велосипедот и го продолжат патувањето со јавен градски превоз. Ова би било интересно за граѓаните кои живеат во подалечните населби кои немаат добра опслуженост со јавен градски превоз – смета професорот Никола Крстаноски.

Градските власти минатото лето го префрлија системот за изнајмување велосипеди во Скопје од ЈП „Градски паркинг“ на ЈСП-Скопје. Во моментов се работи на проектирањето на новиот систем за изнајмување велосипеди, со кој би се поставиле на 30 пунктови низ Скопје што би се состоеле од терминал за самоизнајмување велосипеди и 20 држачи за велосипеди. Идејата е граѓаните да ги изнајмуваат велосипедите со СМС или кредитна картичка, а велосипедот да го вратат на било кој од 30-те пунктови низ главниот град.

Краен рок за отпочнување со работа на овој проект засега не е определен, иако веќе трета година не функционира досегашниот проект „Скопје изнајми велосипед“, со којшто раководеше ЈП „Градски паркинг“.

https://meta.mk/na-skopje-mu-treba-nov-sistem-za-iznajmuvanje-velosipedi-i-negovo-integriranje-so-javniot-prevoz/

Pop up велосипедска лента во Измир, Турција.
Одземена е цела автомобилска лента и малку повеќе за да се добијат 2 велосипедски ленти и заштитен простор со густо поставени заштитни столпчиња.



https://www.facebook.com/NaTochak

Re: инфо погоре - кај може да се купи ГПС локатор за велосипед?

Во Скопје нема, а помали градови низ Европа имаат успешни системи за изнајмување велосипеди (инфографик)





Во Скопје веќе трета година не функционира системот за изнајмување велосипеди основан од градските власти. Градот Скопје две години ветува воспоставување на нов јавен систем за самоизнајмување велосипеди, но досега активностите се сведени на изработка на проектната документација за идните 30 пунктови за изнајмување што би се поставиле на различни локации низ главниот град.

„Мета.мк“ веќе контактираше дел од експертите, граѓанските иницијативи и еколошките здруженија, при што сите се сложија дека скопските градски власти треба најитно да се посветат на воведување на еден ваков проект, преку кој граѓаните и посетителите на Скопје ќе можат да едноставен, економичен и брз начин да изнајмат велосипед за патување меѓу дестинации во градот. Професорот Никола Крстаноски од Техничкиот факултет во Битола советува и за интегрирање на велосипедскиот сообраќај со скопскиот јавен превоз.

Во многу градови во светот постојат неколку различни модели за основање на систем за изнајмување велосипеди од страна на општинските власти, а во случајов ќе ги разгледаме позитивните примери од градови коишто се помали од Скопје, а веќе успеале уште пред неколку години да воспостават еден ваков автоматизиран систем.

Љубљана, Словенија

Еден од најстарите и најуспешни проекти од ваков вид во Југоисточна Европа е системот „BicikeLJ“ во Љубљана. Словенечкиот главен град минатата година беше рангиран на 14-тото место на листата на 20 градови во светот со најдобри услови за користење на велосипедскиот превоз. Еден од главните причини за ваквиот успех на Љубљана е токму достапноста на јавните велосипеди на речиси секоја пофреквентна локација во градот.
Автоматизираниот систем за изнајмување велосипеди „BicikeLJ“ беше пуштен во работа на 12 мај 2011 година, и тоа како проект вреден 1,8 милиони евра заснован на јавно-приватно партнерство во кое учествуваат општинските власти на Љубљана. Од основањето до денес, забележани се над 7 милиони изнајмувања на велосипеди во градот што е повеќе од двојно помал од Скопје според бројот на жители.

Љубљана има 61 пункт за изнајмување велосипеди на различни локации и вкупно 610 јавни велосипеди што можат да ги користат граѓаните. Првиот час за користење на велосипедот секогаш е бесплатен за граѓаните, а просечното време за изнајмување велосипедите е 16 минути, што значи дека најголем дел од граѓаните воопшто не плаќаат за секое одделно патување со ова превозно средство низ градот, објаснуваат љубљанските општински власти на нивната веб-страница.

Овој систем за изнајмување велосипеди беше автоматизиран уште од самиот негов почеток, а низ годините, единствено се зголемил бројот на велосипедите, локациите од каде истите можат да се изнајмат и интегрираноста со јавниот градски превоз. Љубљана почнала со имплементација на овој систем со 300 велосипеди и 30 станици за изнајмување велосипеди.

Загреб, Хрватска

За разлика од Љубљана, во хрватскиот главен град функционира системот „NextBike“, којшто е во сопственост на специјализирана компанија за изнајмување велосипеди што функционира во над 250 градови низ целиот свет. Во Загреб таа воспоставила 18 станици за изнајмување велосипеди, а граѓаните можат да бираат за каков модел на изнајмување на јавните велосипеди ќе се одлучат. Со пакетот со кој секоја индивидуа плаќа по 1.645 денари годишно, можат да се изнајмуваат велосипеди неограничен број на пати во текот на 12 месеци во времетраење од 30 минути. Покрај во Загреб, „NextBike“ функционира уште во девет други хрватски градови, а досега има 22.000 регистрирани корисници во Хрватска.

Катовице, Полска

Успешен пример за изнајмување велосипеди има и во полскиот град Катовице, којшто е двојно помал град од Скопје. Проектот „CityByBike“ е основан во мај 2015 година и слично на досегашниот систем во Скопје, функционира единствено сезонски од април до ноември во текот на една година. Станува збор за воспоставен систем на јавно-приватно партнерство меѓу општинските власти и компанијата „NextBike“.

Во Катовице само во текот на 2019 година имало 261.800 изнајмувања на јавните велосипеди, а над 64.000 луѓе се регистрирани за користење на овие велосипеди во градот што брои околу 300.000 жители. Катовице денеска има 83 станици за самоизнајмување велосипеди и вкупно 666 јавни велосипеди. Меѓу нив, има 20 карго велосипеди со кои граѓаните можат да превезат товар до 100 килограми или да патуваат со максимум четири деца со едно вакво превозно средство.

Интересно е тоа што во Катовице дури една третина од станиците за изнајмување велосипеди се донирани од спонзори, општествено одговорни компании, кои во соработка со општинските власти се одлучиле да помогнат во воведувањето на еколошки и здрав превоз за граѓаните преку донирање на ваквите терминали.

Овие три града се само многу мал дел од позитивните примери во кои системот за изнајмување велосипеди помогнал во ублажувањето на сообраќајниот хаос, во потпомагањето на јавниот превоз во вршењето на неговата функција, како и во стекнувањето здрави навики на жителите од овие градови. Скопските градски власти можат да применат дел од ваквите позитивни практики, особено поради фактот што Загреб и Љубљана се збратимени градови со Скопје и општинските власти имаат континуирана меѓусебна комуникација низ годините наназад.

https://meta.mk/vo-skopje-nema-a-pomali-gradovi-niz-evropa-imaat-uspeshni-sistemi-za-iznajmuvanje-velosipedi-infografik/