По неколкумесечно “копање“ по Интернет и деноноќни калкулации за најисплатлива варијанта, за неполна година во штипската населба Пребег никна уникатната еколошка куќа

Како да изградите куќа, а да не потрошите ниту една цигла или пак вреќа малтер? Како, пак, да помислите да инвестирате во нов дом со почетен буџет од 4.000 евра? Штипјанецот Влатко Зејтиников даде одговори на овие прашања со неодамна изградената прва еко-куќа на Балканот, направена од бродски контејнери.

По неколкумесечно “копање“ по Интернет и деноноќни калкулации за најисплатлива варијанта, за неполна година во штипската населба Пребег никна уникатната еколошка куќа. Иако навидум сличен на останатите, овој дом благодарение на неверојатните перформанси, веќе добива димензии на градежен феномен. Високата енергетска ефикасност, екстра малата тежина, а во исто време огромна носивост и издржливост, го прават овој дом не само пријатно и безбедно, туку и економично место за живеење.

Сопственикот Зејтиников вели дека најобичниот и најевтиниот бродски контејнер го претворил во неверојатно место за живеење.

“Куќата ја направив речиси сам, 90% од вложениот труд е мој. Пред да почнам со реализација не кажав никому, освен на сопругата. Идејата најпрво ми ја дефинираше длабочината на џебот. Ограничениот буџет ме натера два месеци деноноќно да пребарувам по Интернет.

Почнав да ги проучувам монтажните куќи на Хот и Хот, но сфатив дека тоа е прескапа инвестиција. Кога почнав да градам, тук-таму ќе се појавеше некој “аналитичар“ од страна за да фрли една доза скептицизам, ама таквите реакции ми даваа уште поголем стимул да издржам докрај.

На самиот почеток побарав совет од двајца архитекти, но ме одбија велејќи ми дека се работи за луда идеја. Потоа, ниту барав совети, ниту публицитет, а дури откако ја завршив куќата, сфатив дека сум направил голема работа. Накратко, во еден здив си изградив дом“, раскажува Зејтиников.

БЕТОНОТ ИМА ИЗДРЖЛИВОСТ ДО 100 ГОДИНИ, А МЕТАЛОТ ДО 1.000

Сопственикот на куќата од контејнери потенцира дека ваквите градби имаат неверојатно голема издржливост. Бетонската конструкција, вели, има рок на траење 100 години, 50 години до ферментирањето и потоа следува фазата на еродирање. За разлика од бетонот, пак, ако металот соодветно се заштити, има издржливост и до 1.000 години. Зејтиников објаснува дека во случајов, успеал оксидацијата да ја сведе на минимум.

КОЛКУ ЧИНИ “КОНТЕЈНЕР-КУЌАТА“?

Зејтиников за “Капитал“ раскажува дека изградбата на куќата ја почнал со 4.500 евра, колку што го чинеле трите бродски контејнери купени од отпад на старо железо. Вишокот материјал успеал да го препродаде, па карабината на куќата не го чинела ниту 4.000 евра. Кога ја поминал и фазата поставување прозорци, пресметал дека за целата куќа со зафатнина од 180 метри квадратни потрошил помалку од 35.000 евра.

ВИСОКА ЕНЕРГЕТСКА ЕФИКАСНОСТ

За просечна куќа од 100 метри квадратни потребни се околу 18 тони бетон, 35 тони песок, 60 тони цигла и 5 тони железо. Емисијата на јаглерод диоксид при градењето на оваа куќа би била 15 тони од бетонот, околу 8 тони од циглата и 6 тони од железото или вкупно 29 тони емисија на јаглерод диоксид. Во споредба со оваа градба, кога се гради со контејнери воопшто нема емисија на ова соединение, затоа што се употребуваат веќе користени контејнери подготвени за рециклирање.

Здраво,

Ве молам за малку помош и појаснување.

Купивме стара барака во Тафталиџе и сега .... ке почнам сам со себе да си зборам

Покрив-лим, а под него стиропор+камена волна+гипс картон(ќе биде тоа едно поткровје за свирење гитара Ако имате некаков предлог(сугестија) ВЕ МОЛАМ кажете ја веднаш или мудро молчете