Сообраќајна сигнализација и информативни табли

Огледала, соларни семафори и знаци на раскрсницата кај Машински во иднина ќе ги штитат учесниците во сообраќајот меѓу улиците "Орце Николов" и Никола Тесла во населбата Карпош 1

Семафори но и светлосни сообраќајни знаци, напојувани од соларни колектори, во блиска иднина ќе ги штитат учесниците во сообраќајот на раскрсницата на улиците "Орце Николов и Никола Тесла", покрај дворот на Машинскиот факултет во населбата Карпош 1.

Жителите на оваа скопска населба, буквално водат битка со локалните власти за поставување на светлосни уреди на според нив, најкобната раскрсница во градот.
- Само во текот на изминатата година својот живот го загубија три лица во сообраќајка на оваа раскрсница. Детето со страв го испраќам до училиште, но со поголема неизвесност го чекам да ми се врати живо и здраво. Недостигот од сообраќајна култура, но и непознавањето на сообраќајните знаци е причината која на оваа клучка во просек месечно се случуваат 5-6 тешки сообраќајни несреќи, ни рече жител од локалните станбени згради.

Саша Димиќ, в.д градоначалникот на Општина Карпош, тврди дека е запознает со проблемот, но вели дека постојат технички проблеми со надлежните од сообраќајната полиција за поставување на семафори на раскрсницата за кои општината веќе има поставено соларни колектори за напојување.
- Ова е веќе трет пат каде по претходно барање на станарите од улиците Никола Тесла и Орце Николов да доставиме барање до СВР Скопје за поставување на светлосна сигнализација. Од полицијата велат дека општината не ги доставува сите параметри за френквентноста на спорните улици. Деновиве повторно поднесовме барање, кое се надевам нема да биде одбиено, рече Димиќ, и додаде дека општината ќе постави огледала на лошите свиоци, кои особено ги има во Карпош 1 и 2.

Од СВР Скопје велат дека проблемот е детерминиран во несразмерниот урбанистички развој и изградба на несоодветна сообраќајна мрежа пред дворот на Машинскиот факултет.
- Надлежните од Општина Карпош во барањето потребно е да достават показатели за интензитетот и густината на сообраќајот на раскрсницата за која е поднесено барање за семафори. Откако сообраќајната полиција ќе го измери интензитетот, бројот и движењето на возилата, барањето ќе биде одобрено, информираат од СВР Скопје, секторот за сообраќај.