Пешаците на премините во центарот на градот речиси и не можат да преминат од една на друга страна на улицата, а на пола пат да не ги пресече црвеното светло на семафорот. На поплаките на скопјани за краткиот зелен интервал на зеленото светло, сообраќајните експерти велат дека тоа е неизбежливо бидејќи со тоа се смалува сообраќајниот метеж, тврдејќи дека тешко ќе биде променет досегашниот режим

Расте бројот на жалби на скопјани дека во еден налет не можат да ја преминат улицата, па се принудени да трчаат преку раскрсниците, бараат пешачки остров и ги чекаат неколкуте наредни минути, па потоа успеваат да ја минат улицата безбедно. Дел од нив не ни работат, а тие што работат се програмирани на десетина секунди, па скопјани џогираат по булеварите и улиците.
- Јас сум возрасна жена и живеам во непосредна близина, овде, токму во зградите на градскиот ѕид. Имам оперирано колк и тешко се движам. Семафорите овде дневно ги минувам најмалку 3 до 4 пати и секогаш во страв некој да не ме прегази, вели револтирана скопјанка, која се пожали на краткиот интервал на зеленото светло на семафорите во центарот на градот.
- Погрешно е верувањето дека пешакот за цело време на минувањето на коловозот мора да има зелено светло. Времето за заштита на пешаците секогаш е проектирано, така што пешакот кој го минува коловозот на самиот истек на траењето на зеленото светло може безбедно да стигне до островот, односно до другата страна на улицата, така што зелените интервали на раскрсницата кај Мц Доналдс и преминот Рекорд траат 11 секунди, а заштитеното време 18 до 19 секунди. Времето за заштита на пешаците се проектира од ширината на коловозот кој пешакот мора да го пројде и тоа најчесто трае подолго од зеленото светло, вели Александар Јовановски, сообраќаен инженер.

Тој објаснува дека ако се продолжи зеленото светло за пашаците, автоматски се скратува зеленото за автомобилите и обратно.
- Секој пешак кој ќе стапне на пешачки кога ќе се изгаси зеленото светло е стопроцентно заштитен да прејде на другата страна. Важна улога имаат и возачите кои треба да ги испочитуваат и сообраќајните прописи и да ги пропуштат минувачите, вели Јовановски.
Експертот вели дека во заштитеното време е пресметана просечната брзина на пешакот од 1 до 1,2 метри во секунда и според тоа се мести времето на преминот, но секогаш, две секунди повеќе од должината.

Од ЈП Градски паркинг, претпријатие надлежно за дневна обиколка и поправка на семафорите и нивно целосно сервисирање, велат дека сите светлосни уреди за регулирање на сообраќајот во главниот град се редовно сервисирани и точно подесени, подеднакво како и за автомобилите така и за пешаците. Објаснувааат дека имаат неколку раскрсници во градот кои се кратко програмирани, бидејќи сообраќајните услови така наложуваат.


Трепкањето на светлотото, опомена за возачите
Иако возачите имаат законска обврска да ги пропуштат пешаците кои веќе се на коловозот, таа често пати се крши. Сообраќајната култура во Скопје се уште е на ниско ниво, велат жителите на главниот град.

Семафор истовремено што свети црвено и зелено
Меѓу еден од сомнителните семафори кои ја поткрепуваат приказната за расипаните, добро неконсолидираните семафори во градот е и семафорот кај бензинската пумпа во Карпош 2, каде истовремено покажува и зелени и црвено светло за минување на пешаците.

http://www.vecer.com.mk/default.asp?ItemID=22003965CC267F4EB46CF1002EC37510