Со зелен бран до крајот на октомври ќе се поврзат 36 сообраќајници во градот, најави градоначалникот Коце Трајановски, како дел од тековните градски проекти. Семафорите на овие улици ќе се спојат со оптички кабел и на тој начин ќе се овозможи зеленото светло да се вклучува истовремено кај сите. Трајановски вели дека така ќе се избегнат проблемите што се јавуваат кога сообраќајните полицајци при секое исклучување и вклучување на семафорите ги изместуваат тајмерите за светлата.

Покрај овој проект, скопскиот градоначалник најави и проекти за проширување на неколку булевари и улици.
- Булевар Србија ќе продолжи да се прави од Трета македонска бригада до Првомајска. Има мали имотни проблеми, кои ќе се решат, а финансиите се обезбедени и работите ќе завршат во определениот рок. Исто така, тука се прави и фекалната канализација и“вели Трајановски.
Градот ќе ја проширува и Првомајска на потегот од Рампа до Драчево, со четири ленти. На трасата од Расадник до општината Кисела Вода за властите се спорни два објекта. Документацијата би требало да биде готова в година и тогаш да почнат градежните работи. Во план е да се доврши и булеварот Македонска војска во Ѓорче Петров, а во општина Гази Баба ќе се прави улицата Маџари, од семафорите во Ченто до мостот кај населбата Маџари. Според Трајановски, инвестицијата ќе биде по половина со општината, со тоа што е предвидено да се направат и тротоари, како и улично осветлување. Булеварските жардиниери на Партизанска и на 8 Септември треба да бидат завршени до крајот на октомври. Поради проблеми со снабдувачите на земја, градските власти ги продолжиле роковите.

Р.П.

Градот ќе им донира дел од скопските стари семафори на општините Кавадарци, Кочани и Прилеп. Одлуката за донација ја изгласаа градските советници на последната седница. Станува збор за 39 семафори за возачи и 34 за пешаци. - Досега се заменети 900 семафорски светилки, од кои половината може да бидат употребени и донирани. Испративме допис до сите општини, а како заинтересирани се јавија само овие три - објасни на седницата Јован Христоски, раководител на Секторот за сообраќај во Градот. Како што стои во образложението на одлуката, властите ја почнале акцијата за замена на старите со семафори од најновата генерација поради тоа што досегашните потешко се одржувале и сервисирале.