Авиокомпании и линии

Се зголемува бројот на летови од аеродромите

четврток, 03 март 2011, 17:31

АЦВ во моментов го чешла финансиското работење на компанијата

Сања Наумовска


Авиокомпанијата „Ерлифт“ веќе десетина дена нема дозвола за летање. Патниците што имаат купено билети патуваат со авиони на други компании, бидејќи единствениот „боинг“ на „Ерлифт“ е приземјен. Продолжувањето на дозволата, која истече на крајот од февруари, засега е неизвесно, бидејќи документацијата на авиокомпанијата се' уште се чешла во Агенцијата за цивилно воздухопловство. Одговорот за продолжување на оперативната дозвола АОЦ, информираат од АЦВ, компанијата треба да го добие деновиве. Во моментов се врши увид во финансиското работење на „Ерлифт“, како и инспекциски надзор на организацијата на компанијата и воздухопловот.

Вината за настаната состојба од АЦВ ја лоцираат во доцнењето на „Ерлифт“ при доставувањето на барањето за продолжување на работната дозвола, што до Агенцијата пристигнало десетина дена по истекот на крајниот рок.

„Во тек е разгледувањето на барањето на авиокомпанијата ’Ерлифт’ за продолжување на работната дозвола. Ќе им биде одговорено во законскиот рок од 30 дена. Поради пропуштањето на терминот за доставување на документацијата, процедурата е подолга од вообичаено. Во периодот до добивањето на одговорот компанијата нема право да работи“, одговорија вчера од АЦВ.

Во меѓувреме, патниците на „Ерлифт“, за да не им пропаднат купените авионски билети, летаат со авиони закупени како чартери од туристички агенции, како и со други авиокомпании. На таков начин минатиот викенд бил реализиран лет кон редовната дестинација Дизелдорф. Одговорните од „Ерлифт“ вчера не беа достапни да ја искоментираат ситуацијата во која се наоѓа компанијата ниту, пак, дали очекуваат проблеми во нудењето на услугите кон своите клиенти. Пред околу еден месец, кога до АЦВ го доставија барањето за продолжување на дозволата АОЦ, директорот Аднан Џаферовски потенцираше дека документацијата е уредна и оти не очекува проблеми од АЦВ. Задоцнувањето го оправда со комплетирањето на менаџерскиот тим, откако неколкумина, кои беа на клучни позиции, неодамна ја напуштија компанијата. Пред истекувањето на дозволата компанијата леташе само со еден авион, „боинг 737“, додека, пак, а вториот што беше набавен на лизинг е вратен и испишан од домашните регистри.

„Ерлифт“ деновиве се соочува и со нова опомена од Македонска навигација поради неплатени долгови. Не е платена последната рата од репрограмата за февруари, информираат од М-НАВ, поради што е можно за случајот да се бара судска разрешница. Засега, велат од Навигација, тече рокот од опомената во кој „Ерлифт“ има можност да ја исплати заостанатата сума.