ТРИГОДИШНА ДРЖАВНА ПОМОШ ЗА АВИОKОМПАНИИТЕ

Пет милиони евра за поевтини авиобилети

Изборот на авиокомпании кои ќе добијат финансиска поддршка ќе зависи од неколку критериуми, од кои најважни се зголемувањето на фреквенција на летови до одредена дестинација, воведување нови дестинации и зголемување на бројот на патници

Домашни и странски авиокомпании кои оперираат од скопскиот и охридскиот аеродром в година ќе поделат 1,4 милион евра субвенции од државата. Проекциите се дека оваа сума во 2013 година ќе се зголеми на 1,5 милион, додека во 2014 ќе достигне 2,2 милиона евра. 

Владата одлучи да ги субвенционира авиокомпаниите кои ќе понудат летови од Скопје и Охрид до нови дестинации во Европа по ниски цени. За да ја овозможи финансиската поддршка, Министерството за транспорт и врски предложи дополнување на Законот за воздухопловството, кое веќе е во собраниска процедура. Целта, според надлежните, е да се воведе поголема конкуренција во авиосообраќајот, што ќе предизвика намалување на цените на авиобилетите.

- Авиопревозниците не се секогаш подготвени без соодветна поддршка да оперираат од некој аеродром за првпат. Затоа Kомисијата може да прифати да биде доделена поддршка на авиопревозниците за одреден временски период под одредени услови и тоа за нова дестинација од регионален аеродром и привлекување на поголем број на патници - пишува во образложението на Законот. 

Изборот на авиокомпании кои ќе добијат финансиска поддршка ќе зависи од неколку критериуми, од кои најважни се зголемувањето на фреквенција на летови до одредена дестинација, воведување нови дестинации и зголемување на бројот на патници. 

Министерот за транспорт и врски Миле Јанакиески смета дека субвенционирањето ќе привлече нови нискобуџетни компании во земјава, кои ќе им се придружат на постојните. 

- Повеќето земји од регионот имаат сопствени авиокомпании кои ги финансираат од буџетот. И тие што немаат свои авиокомпании издвојуваат пари за таа намена. Со оглед на тоа дека веќе имаме зголемен интерес, Македонија не смее да го пропушти овој воз бидејќи соседните аеродроми може да ги земат нашите патници - рече Јанакиески кога го најавуваше субвенционирањето. 

Од земјава во моментов редовно летаат две нискобуџетни компании. „Виз ер“ има летови до Лондон и Венеција, додека „Пегасус“ лета за Истанбул и Измир. Во Македонија годинава влегоа уште неколку нискобуџетни превозници, но тие летаат само во летниот период. 

Земјите од регионот најчесто ги субвенционираат националните авиокомпании, но честопати издвојуваат и пари за странски нискобуџетни компании со цел да ги привлечат. Така на пример, Србија го субвенционира националниот авиопревозник „ЈАТ ервејс“. Црна Гора, пак, освен што финансиски ја поддржува „Монтенегро ерлајнс“, на нискобуџетниот превозник „Германвингс“ му прости долгови во висина од 3,2 милиони евра. (Д.Т.)