Рано е да се надеваме за редовни авиолинии до САД

Македонија и САД вчера потпишаа Спогодба за воздушен сообраќај

Сања Наумовска



Рано е да се размислува за интерконтинентално поврзување на Скопје со САД, коментираат експерти откако вчера Македонија и САД потпишаа Спогодба за воздушен сообраќај со која се заокружи правната рамка за воспоставување директни редовни и чартер-авиолинии меѓу двете земји. Нискобуџетните компании, веројатно, нема да најдат комерцијален интерес за овие линии, велат експертите, бидејќи финансиската моќ на населението не дозволува почесто патување на подолги релации. 

„Која било авиокомпанија, за да почне да размислува да оперира од Македонија треба да постои интерес барем еднаш неделно да наполни еден авион од Скопје со 200 или 300 луѓе, кои ќе летаат, на пример, до Вашингтон. И таа бројка треба да се одржува во континуитет во текот на целата година. Но, реално во Македонија во моментов таква побарувачка нема, барем што се однесува до одржување редовна линија“, коментираат експерти и нагласуваат дека, сепак, сега кога постојат сите предуслови за авиоповрзување со САД, треба да се направи темелна анализа за потребите на пазарот. Веројатно, велат, ќе има услови за организирање чартер-летови во одредени периоди од годината, на пример кога иселениците доаѓаат на одмор. Во текот на реконструкцијата на аеродромот „Александар Велики“ во Скопје беше продолжена пистата за 500 метри со што се овозможи опслужување на авиони кои сообраќаат на интерконтинентални летови.

Во моментов патниците од Македонија можат да стасаат до дестинации на северноамериканскиот континент со најмалку едно преместување во Виена, Истанбул или во Цирих. Цените на билетите варираат во зависност од сезоната. До Вашингтон, на пример, може да се лета за 369 евра, плус аеродромски такси, значи цената на билетот најчесто се движи околу 700-800 евра. До Чикаго, на пример, е нешто поевтино, па цената на авиокартата е 500-600 евра. 

Спогодбата за воздушен сообраќај меѓу двете држави вчера ја потпишаа министерот за транспорт и врски Миле Јанакиески и американскиот заменик-помошник државен секретар Филип Рикер. Според Јанакиески, сега се создаваат услови да се почне со лобирање кај авиокомпаниите. 

„Веднаш ќе почнеме со лобирање и анимирање на авиокомпаниите за да им укажеме на сите поволности што ги нудат македонските аеродроми. Очекувам дека ќе се пројави интерес, но сепак тоа зависи од бизнис-логиката и комерцијалниот аспект за воспоставување на летовите“, рече Јанакиески. Тој нагласи дека со документот се отвораат можности за проширување на македонскиот воздухопловен пазар што е поволно од економска гледна точка, а ќе се унапредат билатералните односи меѓу двете земји и ќе се создадат поголеми можности за подобри услуги за патниците. 

Заменик-помошникот државен секретар Рикер, пак, истакна дека американската меѓународна воздухопловна политика се базира на пазарна конкуренција, а кога компаниите ќе решат да воспостават директни летови со Македонија ќе можат тоа да го направат многу полесно. 

„Со потпишувањето на договорот ќе ја зајакнеме економската соработка и билатералните врски, особено овој пат кога фокусот го ставаме на економијата, економскиот раст и реформите кои се многу важни“, нагласи Рикер и додаде дека ефикасен авиотранспорт е предуслов за развој на индустрискиот, финансискиот, трговскиот и туристичкиот сектор. „Меѓународните авиоврски се клучни за транспорт и на патници и на стоки. Се проценува дека по воздушен пат се одвива 40 проценти од светската трговија. Поради тоа секоја земја мора да создава авиоврски за да може да тргува“, истакна Рикер, наведувајќи дека Македонија станува еден од над 90 партнери на САД во отвореното небо.