Авиокомпании и линии

ГАИТ АЛ ГАИТ, ГЕНЕРАЛЕН ИЗВРШЕН ДИРЕКТОР НА АВИОКОМПАНИЈАТА ФЛАЈ ДУБАИ

На летовите кон Скопје очекувам полни авиони

Очекувам секаков вид луѓе да продефилираат на оваа дестинација. Голем број луѓе од Македонија веќе живеат во Дубаи. Знаеме дека Дубаи е добра транзит-локација за вашата дијаспора која ја има ширум светот. Исто така, ќе охрабруваме да се развие деловната соработка помеѓу Скопје и Дубаи и ќе го искористиме овој момент за ја прикажеме вашата прекрасна земја на нашите потенцијални туристи кои би дошле и би сакале да ја посетат, вели главниот извршен директор на Флај Дубаи, Гаит Ал Гаит

Авиокомпанијата Флај Дубаи ја стартуваше првата директна авионска линија меѓу Обединетите Арапски Емирати и Република Македонија. Летот со ознака ФЗ791, завчера сабајле го напушти Терминалот 2 на аеродромот во Дубаи во 9.15 часот и слета на скопскиот "Александар Велики" во 12.40 по локално време. Извршниот директор на Флај Дубаи, Гаит Ал Гаит, беше пречекан од министерот за транспорт и врски Миле Јанакиески и од главниот оперативен директор на ТАВ холдингс, Мурат Орнекол. По поздравот со водени топови на слетувањето, Ал Гаит имаше традиционален пречек со леб и сол. Во терминалот на аеродромот поразговаравме со него за причините што ги мотивирале да го стават Скопје на долгата листа од 50 директни дестинации до кои летаат нивните модерни воздухоплови.

Флај Дубаи почна со работа од пред три години и веќе воспостави оперативна мрежа од авиолинии со над 50 одредишта ширум светот, а од пред некој ден и со Скопје. На што се должи ваквата експанзија?
На почетокот започнавме со географска одредница за се што би било во радиус од пет и пол часови од Дубаи, со тоа што сега покриваме 2,5 милијарди потенцијални корисници на нашите услуги во тој географски регион. Дубаи е познат трговски и бизнис-центар кој веќе е развиен и познат ширум светот. Кога почнавме со работа во јуни 2009 година нарачавме 50 авиони "Боинг 737" нови летала, досега имаме добиено 26, до крајот на годината очекуваме да имаме 28 и полека, но сигурно растеме кон нашите потенцијали и гледаме да го исполниме таргетот што ни е зацртан.

Се одлучивте да летате и кон Македонија која е мал пазар за Флај Дубаи. Очекувате ли полни авиони на дестинацијата кон Македонија?
Секако. Немаше да започнеме ако сметавме дека нема да биде успешно. Дури очекуваме и повеќе од нашите проекции. Започнуваме со два лета неделно, но очекуваме дека ќе имаме и повеќе. Ако ни се исполнат очекувањата, секако дека тоа ќе го оствариме.

Од која категорија очекувате да бидат патниците - бизнисмени, туристи...?
Од сите категории. Очекувам секаков вид луѓе да продефилираат на оваа дестинација. Голем број луѓе од Македонија веќе живеат во Дубаи. Знаеме дека Дубаи е добра транзит-локација за вашата дијаспора која ја има ширум светот. Исто така, ќе охрабруваме да се развие деловната соработка помеѓу Скопје и Дубаи и секако, ќе го искористиме овој момент да ја прикажеме вашата прекрасна земја на нашите потенцијални туристи кои би дошле и би сакале да ја посетат.

Дали одлуката на македонската Влада да ги субвенционира странските авиокомпании да ја стават Македонија на листата на дестинации што ќе понудат летови по пониски цени, Ве мотивираше да летате кон Скопје?
Нема субвенции од македонската Влада за реализирањето на овој лет. Ние и онака бевме заинтересирани за Балканот. Правевме истражување, ги проучивме локациите и сфативме дека до Скопје летот е релативно краток, што нам ни одговара. А, исто така, морам да напоменам, дека до Скопје многу брзо се стигнува од другите градови во Македонија за да се искористи овој лет. Луѓето што работат на скопскиот аеродром беа желни да не исконтактираат и да го овозможат овој вид соработка.

Што може да очекуваат македонските патници во поглед на луксузноста и нивото на услуги во авионите на Флај Дубаи?
Флај Дубаи има сосема нови летала со удобни седишта рекаро" кои се најдобри во овој бизнис. Имаме системи на забава што ги нема ниту една друга авиокомпанија во светот. Имаме екипаж што го сочинуваат луѓе од 82 националности, на тој начин се овозможува многу добра услуга. Ние сме многу млада и многу желна за работа авиокомпанија.

Флај Дубаи е нискотарифна авиокомпанија со невидено темпо на раст која има огромно влијание на регионалната и меѓународната сцена на нискобуџетното воздухопловство. Можете ли да ни откриете каде лежи клучот на успехот? 
Клучот на нашиот успех лежи во нашето име - ние го опслужуваме Дубаи кој е навистина атрактивно место за бизнис и туризам. Дубаи е голем центар во регионот и секој пат кога летате за Дубаи ви се отвораат многу различни можности. Секаде каде што одите во светот секогаш има некаква конекција или поврзаност со Дубаи. Нашата сила лежи во тоа што сме млада авиокомпанија, немаме никакви пречки кон нашиот натамошен развој и сето ова придонесува да се развиваме со достојно темпо.

Што го прави Флај Дубаи уникатен во споредба со другите авиопревозници?
Истото тоа што претходно го кажав. Доаѓаме на убави места, како овде на пример. Ние сме многу уникатни по тоа што овозможуваме ваков вид мрежа каде, дури и патници од вашата земја, сега можат со еден лет да стигнат до Дубаи и понатаму да имаат простор да патуваат каде што сакаат. По тие иновации, всушност ние сме познати и тоа не прави единствени.

Што прави Флај Дубаи да се задржи уп-то-дате со најновите технолошки достигнувања во оваа индустрија?
Она што не разликува од другите е тоа што кога ја започнавме нашата авиокомпанија која е релативно млада, гледавме да воведеме еден систем за забава кој ќе биде уникатен и различен од другите авиокомпании и секогаш бараме нови можности да го истражиме овој пазар за да бидеме во тек со сите технолошки достигнувања.

Кој е тој систем на забава?
Во авионите на Флај Дубаи има телевизор на секое седиште. На патниците им се достапни над 190 филмови, 160 телевизиски програми, над 300 музички албуми, над 36 игри, и ние сме првата и единствената авиокомпанија која овозможува да се читаат весници во рамки на системот. 
Тој систем користи нова технологија. Сите телевизиски канали што се прикажуваат се со ХД (висока резолуција). Тоа се прави преку унексес, висока оптика, лесни се во споредба со други системи, значи две третини се полесни од другите. Ако некој патник го купи основниот пакет за забава при летот и доплати 30 дерхами (локална парична единица во Дубаи) или 6 евра, добива можност од неограничено гледање на филмови, а за плус 12 дерхами (2 евра) може да игра игри и гледа телевизија. Во глобала, на летот од Скопје до Дубаи можете да погледнете два-три филма.

И за крај би Ве прашала. Во Македонија не знаеме кој е господинот Гаит Ал Гаит, што значи тој во авиосообраќајот?
Не сум некој посебен човек. Во авиоиндустријата сум 26 години, од кои 22 години работев за авиокомпанијата Емирати и по оформувањето на Флај Дубаи сега сум во рамките на оваа авиокомпанија. 

Регионите во кои оперираат нискотарифните превозници често доживуваат брз економски развој
-Нискотарифните авиопревозници како Флај Дубаи нудат превоз по значително пониски цени во споредба со регуларните авиопревозници. Регионите во кои тие оперираат мошне често доживуваат брз економски развој. Вклучувањето на Скопје како дестинација во понудата на компанијата Флај Дубаи е значајно од причина што на овој начин Скопје, освен со Дубаи, индиректно се поврзува и со повеќе од 50 дестинации ширум светот на кои оваа компанија оперира, рече министерот за транспорт и врски, Миле Јанакиески.

Детали за летот
Авионот на Флај Дубаи ќе оперира двапати неделно, во понеделник и во четврток. Летот со ознака ФЗ791 ќе полетува од вториот терминал на меѓународниот аеродром во Дубаи во 9.15 часот и ќе слетува на "Александар Велики" во Скопје во 12.40 часот по локално време. Повратниот лет, со ознака ФЗ792 ќе го напушта главниот град на Македонија во 13.25, а ќе пристигнува во Дубаи во 20.35 по локално време.

Билетите за повратните летови од Дубаи до Скопје ќе можат да се купат по почетна цена од 380 евра. Тие ги вклучуваат сите такси плус пријавен багаж до 20 килограми, едно парче рачен багаж до седум килограми и еден мала рачна или лаптоп-торба. За седиште со дополнителен простор за нозете се доплаќа 21 евро. Во леталото, патниците можат да изберат од долгата листа понуди, што вклучува пакети за забава во текот на летот со цена од 2 евра, разновидно мени со освежувачки пијалоци и производи што не подлежат на царина.

Авиокомпанијата ќе посредува и меѓу македонските граѓани и институциите во Емиратите за издавање на визите за влез. Ал Гаит најави дека апликациите ќе се препраќаат по електронски пат и ќе бидат готови за 24 часа.