На официјалната страница на градот ги има сите важни податоци од претходниот попис.
http://gevgelija.gov.mk/mk/index.php?option=com_content&view=article&id=11&Itemid=15

Edited by GI - 19-Jan-2011 at 11:42

Купувањето дом невозможна мисија

Луѓето се затечени од разните црни сценарија, што секако се одразува на нашето работење, тврдат градежниците и агенциите, објаснувајќи го намалениот интерес на граѓаните за недвижнини
И по една година од намалувањето на ДДВ за станбена изградба од 18 на 5 проценти нема раздвижување на пазарот на недвижности. Становите не поевтинија, како што се очекуваше, а купувањето дом за повеќето граѓани остана невозможна мисија. Во меѓувреме нискиот стандард, малите плати, високите камати и тешкодостапните банкарски кредити сé повеќе ги одвраќаат граѓаните од сонот за сопствен покрив над главата. Политичките услови дополнително ги усложнуваат состојбите. Градежниците тврдат дека нема шанса да паднат цените на становите, со оглед на зголемените трошоци за потрошен материјал. Она што опаѓа е само интересот на граѓаните. - Покрај намалениот интерес, сменет е и односот за купување станови, на што влијаат и актуелните состојби. Луѓето се затечени од разни црни сценарија, што се одразува и на нашето работење. Многу тешко оди продажбата на станови во градба. Повеќе се оди на опцијата видено-купено. Од друга страна, банките не ги следат купувачите - велат од „Колбико инженеринг“. Агенциите што се занимаваат со продажба на недвижности потврдуваат дека интересот за купување стан е незначителен и речиси го нема. - За ова најмногу придонесе рецесијата. Поради намалениот интерес очекуваме пад на цената на недвижности за околу 10 проценти - велат од „Елегант трејд“. Тие нудат новоизградени станови на Водно, кои се движат од 1.250 до 1.500 евра за квадрат, додека новите станови во Ново Лисиче се од 800 до 1.100 евра, за плаќање во готово. Од градежната фирма „Мива градба“, пак, сметаат дека намалувањето на данокот од 18 на 5 проценти придонело за заживување на пазарот и становите се продавале. - Во моментов градиме во Лисиче и можам да ви кажам дека 30 проценти од становите се веќе продадени. Цената е 900 евра по квадрат, плус 5 проценти ДДВ - ни изјавија од оваа компанија. Во државното јавно станбено претпријатие, како најголем градител на станови во државата, нагласуваат дека кај нив цените на становите се формираат со 5 проценти ДДВ, што не може да се тврди за приватниот сектор. - Има случаи кога се вади одобрение за градба како за физичко лице, кое не подлежи на ДДВ, и тука се прават манипулациите со кои се оштетуваат државата и граѓаните. Единствено фирмите се даночни обврзници, но се гради на име на физичко лице, за што не се плаќа данок и потоа се препродаваат становите. Во Европа физичко лице не може да биде градител и продавач истовремено и не може да продаде повеќе од еден стан годишно - вели Зоран Мисовски од ЈПССДП. Тој вели дека за оваа година јавното станбено претпријатие планира изградба на седум објекти со вкупно 400 нови стана. Во меѓувреме во завршна фаза е станбената изградба во Кичево, Охрид, Кавадарци, Крива Паланка, Битола и други градови во земјава. Приватните компании имаат поинакво мислење. Токму јавното станбено претпријатие нé става нас во нерамноправна положба. Како државна компанија тие добиваат градежно земјиштето за 1 евро, не плаќаат комуналии, брзо ја добиваат целата документација, додека ние за сето ова плаќаме и чекаме со месеци. За нас тие се нелојална конкуренција, а згора на сé немаат ниту своја градежна оператива, реагираат приватните компании. Нивното објаснување зошто не дошло до паѓање на цената на станбениот квадрат, и покрај намаленото ДДВ, е поскапувањето на железото и другите репроматеријали за кои, како што велат, плаќаат 18 проценти ДДВ. Според последните податоци на Државниот завод за статистика, во ноември 2010 се издадени 241 одобрение за градба, што е за 22,5 проценти помалку во однос на истиот месец од претходната година. Од вкупниот број издадени одобренија за градење, 73 проценти се наменети за објекти од високоградба, 10 проценти за нискоградба и 17 проценти за реконструкција. Дека физичките лица почесто се јавуваат како инвеститори потврдуваат и од Државниот завод за статистика, од каде што велат дека од вкупно 241 објект за кои има издадено одобрение за градба, на 178 објекти инвеститори се физички лица, а на 63 објекти инвеститори се деловни субјекти. Станбеното прашање е горлив проблем и во високоразвиените земји на ЕУ. Фондацијата „Абе Пјер“ вчера објави „црна книга“ на станбените услови во Франција, во која се вели дека над 3,6 милиони лица во Франција живеат во лоши станбени услови или се без покрив над главата. - Во ноември 2010 година се издадени 241 одобрение за градба - за 22,5 отсто помалку во однос на истиот месец од претходната година. - 73 проценти се наменети за објекти од високоградба - 10 проценти за нискоградба - 17 проценти за реконструкција - Од вкупно 241 објект со издадено одобрение за градба, на 178 објекти инвеститори се физички лица, а на 63 објекти инвеститори се деловни субјекти.

http://www.novamakedonija.com.mk/NewsDetal.asp?vest=2111186594&id=9&prilog=0&setIzdanie=22204

Еднаш порано колку што се сеќавам со урбан дискутиравме дека во Македонија агенциите за недвижнини намерно креираат атмосфера на зголемена побарувачка со фантом огласи кајшто се вртат исти неколку телефони за да се создаде впечаток дека понудата е мала и да се крене цената. Јас знам и за еден личен пример каде што се пордаваше стан за 47000 и му се јавиле од агенција му рекле станот ти вреди 50000. И се ова заради тоа што агенциите добиваат процент од цената на станот што го продаваат. Зашто на пример не се ограничи тоа што го добиваат агенциите на фиксна цена, па да немаат потреба од вештачко кревање цени туку да се насочат во продавање што повеќе станови. еве на пример тоа може да биде 10% од просечна исплатена плата по квадрат. Ако просечна исплатена плата е 250Е, 10% се 25Е по просечен стан од 60 квадрати се добива 1500Е. еве ако треба и нека не зависи од квадратура. Вака може многу да се ослободи пазарот од ова заложништво во кое што е од разни финти. еве нели и владата донесе голем број закони во таа насока што повеќе луќе да дојдат до легален дом, со евро/квадрат шемите, еве ако прочита некој нека се подзамисли за предлогов.

СКОПЈЕ Просечна цена на стан во Скопје 1.050 евра за м2

Во Скопје, просечната цена на 1м2 станбена површина изнесува 64.127 денари (1.042 евра) што е за 12,9 отсто повеќе во споредба со 2009 година, покажуваат податоците на Државниот завод за статистика.

Просечната цена во Македонија за 1м2 станбена површина во 2010 изнесува 52.125 денари и е за 0,9 отсто повисока во однос на 2009 година. Во останатите населени места во државата покрај Скопје просечната цена на станбената површина изнесува 44.163 денари што е за 6,5 отсто повеќе во споредба со 2009 година. Просечната цена на 1м2 во второто полугодие од 2010, е зголемена за 9,5 во однос на првото полугодие, а во Скопје зголемувањето е за 6,7 отсто. Просечните цени за 1м2 станбена површина се без данок на додадена вредност.

http://daily.mk/cluster3/201fc04f11ba706a2da0056a079debed/666859

Балонче.
Кога и да е ќе пукне. Верувам дека имаме многу до пукнување на балонче, но кога и да е ќе има.
Вака како што се тргнати работите, ако денес купам стан од 110,000 евра, за 1-2 години ќе го продадам за 130.000 евра. ЛоЛ

ЕЛИТНИТЕ НАСЕЛБИ ПРЕТЕСНИ

Луксузните станови одат како алва

Шпански веце-плочки и ексклузивни шолји и лавабоа, странски чешми и туш-батерии со гаранција, паркет од егзотично дрво, џакузи, кабини за туширање. Покрај тоа и сопствен систем за греење и ладење, обезбедено паркинг-место, но само ако се плати станот однапред, чуварска служба 24 часа, заедничко одржување кое се плаќа за квадратен метар, градинар и топла вода во секое време со заеднички соларен систем.

Ова се само дел од привилегиите што можат да ги уживаат граѓаните со подлабок џеб, а им ги нудат елитните станови што на големо се градат посебно низ главниот град. Некои од нив нудат заеднички базени и терени за спортување, а има и такви каде што поединци може да уживаат во сопствен базен сместен во апартманот.

Ваквите населби како печурки никнаа низ земјава, но со причина. С` повеќе се бараат. Инвеститорите велат дека многу повеќе се продаваат во споредба со обичните станови бидејќи за луксузните станови има клиентела и побарувачка. Квадратурата не е проблем, но се практикува поголемиот број од становите да бидат над 100 квадрати.



Станови распродадени, а недоградени

Посебно се продавани апартманите што се на атрактивни локации како Водно, Злокуќани, Тафталиџе и Карпош. Клучот за успех, тврдат градежните фирми, е големата квадратура на еден стан, бидејќи заработувачката била таму. Сите станови, без разлика дали се продаваат како луксузни или обична градба, се продаваат уште во фаза на градба. Фирмите велат дека тоа го прават за идните газди да поминат поевтино, но не негираат дека и за нив е олеснителна околност да се собере некој денар повеќе при почетокот на изградбата на становите. Иако во моментов Скопје е градилиште, велат дека купци има за сите станови, но не ветуваат дека цените за квадратен метар ќе одат надолу.

Инвеститорите велат дека и покрај тоа што сите градат два типа станови, едни поевтини - наменети за широка потрошувачка и други за колективно луксузно домување, поинтересни за пазарот се луксузните.

- Ние градиме две категории станови, станови што може да си ги дозволи секој граѓанин и поголеми по површина и полуксузни. Сепак, мора да се напомене дека луксузните многу повеќе се продаваат. Има кој да ги купи. Меѓутоа, клучот за успешна продажба е ако 30 отсто од становите се над 120 квадрати, 30 проценти да бидат со површина од 75 до 100 квадратни метри и останатите да бидат со квадратура од 55 до 61 квадратен метар - велат во „Адора инженеринг“.

Тие градат низ Македонија и покрај Скопје имаат станови во Охрид - Билјанини Извори и во Струмица.

- Во Скопје резиденцијален станбено-деловен комплекс „Под Водно“ е дизајниран за сите што се заинтересирани да живеат на мирна локација во центарот на Скопје. Станбените комплекси што моментално ги градиме во скопските населби Аеродром и Ново Лисиче се продаваат уште во фаза на изградба, продажбата оди добро. Веќе 80 отсто се продадени. Мислам дека има влијание и тоа што ние гарантираме за квалитетот и нудиме сигурност - велат во „Адора“.

Во „Зипинг“ велат дека кај нив постојат 39 причини, по што се разликуваат од другите.

- Првпат во луксузното домување се добива бесплатно паркинг-место со секој стан, сопствено греење многу поевтино од централното, најдобра звучна и термичка изолација... Статиката на нашите згради е доведена до највисок степен на безбедност од земјотреси. Санитариите се од врвни европски производители.

Оние што сакаат да одберат кат, страна на светот, поглед, како и да направат промени во архитектурата на станот, уплаќаат учество уште во текот на градбата.



Одржувањето поскапо од сметките

Некои од станарите со кои контактиравме, а живеат во комплекси за луксузно домување, велат дека цените на становите во стартот не биле многу различни. Проблемот е потоа, во одржувањето за кое треба навистина дебел домашен буџет.

- Давачките се по вселувањето. Месечно н` чини околу 100 до 150 евра. Од тие пари се плаќаат обезбедувањето, чистењето, градинарот и поправките - велат станари од Водно.

Во „Зипинг“ велат дека нивните елитни станови не се поскапи од обичните.

- Кај нас е поскапо само месечното одржување. Можеби ќе звучи смешно, но разликата меѓу елитните и обичните станови во моментов е 50 до 100 евра за квадратен метар - велат во „Зипинг“.

Во „Соравија“ објаснуваат дека секогаш се водат по златното правило дека локацијата е најбитна.

- Во Скопје строгиот центар беше локацијата за нашиот деловен објект „Соравија центар“, а на Водно ќе се гради на локацијата позната како „Олимписко село“.

Во рамките на нашиот комплекс нудиме комплетен систем за одржување на заедничкиот простор, со што ќе се избегнат непријатните соседски односи кога се работи за плаќање на заедничките трошоци и користењето на заедничкиот простор. За уживање во слободното време на нашите клиенти им нудиме и спа-центар во кој ќе има базен, сауна и простор за фитнес - велат во „Соравија“.

Оттаму објаснуваат дека апартманите што ги продаваат се наплаќаат во фаза на градба. Задоволни се од побарувачката на луксузните станови.

- Може да кажеме дека во Скопје живеат доста луѓе што знаат да го ценат концептот кој го нудиме и се свесни за разликите во квалитет на живеење кои тој концепт ги дава. Во моментов се градат 7 објекти во резиденцијалниот комплекс на Водно - велат во оваа фирма.

Валентина Ангеловска
Александра Филиповска

 

Што нуди луксузното домување на Водно

Фотоволтажен систем за производство на струја за заедничкото осветлување, надворешна столарија со оков „рото“ и четирисезонско стакло, што придонесува самиот стан да е енергетски ефикасен. Термофасада, видеонадзор и електричен пристап. Во секој влез има по два електрични лифта и комфорни широки влезови со природно осветлување и обложени со керамички плочки, што придонесува за полесна и комфорна комуникација. Оптички интернет, ТВ и кабелска инсталација во секој стан, сопствен паркинг на две нивоа, кој е 24 часа под видеонадзор, блиндирани врати, прва класа паркет, прва класа модерна дизајнирана шпанска плочка.

 

Нема поевтинување на становите

Цените на становите во Македонија зависат од локацијата и секако од квалитетот, велат градежните фирми. Реални се ако ги земеме предвид цените на градежното земјиште. Најевтиниот плац што се нуди е 200 евра за квадратен метар, а најскапиот 400 евра.

- Значи, кога ќе купите толку скапо земјиште, не може да очекувате дека становите ќе се продаваат евтино. Во крајната цена на станот учествуваат градежната парцела, комуналиите и квалитетот на станбената градба - велат инвеститорите.

http://www.dnevnik.com.mk/?ItemID=A390A442F3CF5E42906E4E9FCFF67203

Dali ima nekade info za transkacii so gradezno zemjiste vo skopje so namena za izgradba na hoteli?
Mi trebaat podatoci za lokacija, povrsina na parcelata i cena za prodazba po m2.

Во некои весници пред некој ден читам информација за прометот со недвижности во Македонија дека оди бавно и драстично е намален.

Тоа го покажуваат сите истражувања кој се направени до сега и тоа е навистина разочарувачки од една страна,но и безобразлук од друга страна.

Но од друга страна цените на становите во Скопје се навистина прескапи кога збориме за нашиот  стандард на секој граѓанин.

Според мене не треба новинариве да не споредуваат со земјите во регионот како Србија и Словенија кога знаеме таму колкав е стандардот на секој граѓанин.

Во Скопје според мене е невозможно(ако навистина некој стан гори и е презадолжен) да се најде под 1,000 еур за м2.Тоа е навистина страшно и невозможно некој граѓанин да си купи пристоен стан во пристојна населба (Аеродром,Карпош,Ново Лисиче,Капиштец и др.).

После следуваат и останатите давачки како данок на имот и Агенција.

Во врска со Агенциите за недвижности според мене они се една голема измама и вртат големи суми на пари на грбот на нас граѓаните.Они како агенции се должни да ти понудат поголем избор на станови за продавање,(а не 1 или 2 па "насилно" да те врбуваат да ги купиш истите),после они прават пред договор за купување на стан кој може да го напраи и секој граѓанин (со мало познавање во правната струка) и го спроведуваат до градско собрание и агенција за катастар(што може и секој граѓанин тоа да го стори) и  толку.И на крајот на агенцијата и се плаќаат ни помалку ни повеќе 2% од вкупната цена или зависно од квадратурата на станот просечно за еден стан земаат 1,000-2,000 евра ШТО Е ОГРОМНА СУМА НА ПАРИ ЗА НИШТО.Луѓе со месеци работат па таа сума на пари неможат да ја заработат.

Според мене јас сум или да се затворат Агенциите за недвижности или да се намали и регулира со закон процентот кој го зимаат агенциите да не биде повеќе од 200 евра што и тоа е ПРЕВИСОКО.

И друго ме иритира што читам во веснициве дека ако сме влезеле во НАТО и ЕУ драстично ќе се зголеми квадратот за становите,што е една голема ГЛУПОСТ.Што ако влеземе во ЕУ и НАТО факт е дека ќе си останеме исти како сега,дури и посиромашни,со оглед на ситуациите со нашите соседи,а како што тргнало времето дур влеземе во ЕУ истото ќе се распадне.

Неможе брат да се продава стар стан за 1100 евра за м2,поточно ти зборам за населбите Аеродром и Ново Лисиче,а да не збориме за Капиштец и Центар каде што во кулите кај градски sид се продава стан за 1400 евра (стар стан ,зградата е пред ''распаѓање"",и уште да дадеме 10,000 евра за темелно реновирање-купатило,кујна,прозорци,под и така натака.).Ова веќе доаѓа загрижувачки.

Па цел живот да црнчиш да работиш неможеш еден пристоен стан да си купиш,освен на кредит кој треба да го отплаќаш 20 години со огромни каматни стапки.

И со овие елитни населби што во последно време доста се зборува,едно а реалноста и фактичката состојба го говорат спротивното.

Неможеме и далеку сме ние од елита,елитни згради и населби кога сите знаеме каков народ сме.

Сите сме иделе накај Водно и сме ја виделе зелената зграда кај поранешна Панорама дури ни 90% од становите не се продадени тоа се гледа и од надвор иста е ситуацијата кај зградите жолти на Водно градени од Настел од 20 дуќани само еден е продаден и тоа на Афродита а становите зјаат празни.Веќе и фасадата на зелената зграда оцрнува а околината е неуредена.И после сме збореле Водно елита.-Глупости.

Треба со закон да се смали процентот кој го зимаат Агенциите со недвижности да не биде цената  поголема од 200 евра од стан-па и тоа е многу.Срамота и навистина треба државата да ја среди оваа ситуација.

И повеќе треба да се ангажира кон продажба на станови кој ги гради државата(комерцијални станови)наменети за сите граѓани без разлика дали сме вработени или не ,па дури нека ги гради и во нивни стил само повеќе да гради станбени обејкти.

Становите на пример во Аеродром,Капиштец,Ново Лисиче,Центар,Карпош се изгор скапи стан под 1,100 евра м2 неможеш да најдеш (НЕРЕНОВИРАН А ДА НЕ ЗБОРИМЕ ЗА НОВОГРАДБИТЕ кој се движат и до 1400 м2)  и тоа последниве две години од кога беше еуфоријата дали ке сме влезеле во НАТО-па што ако влеземе нема утре рози да ни цветаат (така е зборот).

Навистина државата треба да реагира брзо и навремено да го среди хаосот со продажбата на недвижности.

Скопје доживува градежен бум

Соња Јованова

Повеќе од 4.000 живеалишта ќе се изградат за две години

Градежен бум се случува во Скопје, кој не е само резултат на владиниот проект “Скопје 2014“. На многу локации во главниот град се градат станбени комплекси (стандардни и луксузни) и деловни објекти, така што се очекува за две години да има 4.000 нови живеалишта. Тоа е речиси еден мал македонски град. Во секторот на недвижности се истакнаа неколку главни инвеститори. “Капитал“ истражуваше кој сe гради низ Скопје и во која насока се движи градежниот бум, односно дали може да премине во криза на пазарот на недвижности?

Засега економската криза и слабата ликвидност на стопанството не ги натераа градежните компании да забават со активностите. Не ги плаши ни колапсот во градежништвото во некои земји од регионот и во развиените, каде што бизнисот со недвижности стагнира или забразано паѓа. Напротив, поради нивните инвестиции главниот град во последните неколку години рапидно се шири и речиси нема слободна локација на која не се гради.

Ванчо Чифлиганец, сопственик на градежната компанија Адора инженеринг, вели дека изградбата на нови станбени комплекси е работа на која треба сите да се радуваат, бидејќи ќе повлече развој во сите сфери. Адора инженеринг, во моментот освен во Скопје гради и во Охрид и Струмица. Во Скопје гради резиденцијален станбено–деловен комплекс под Водно и само станбени комплекси во Аеродром и Ново Лисиче. Станува збор за вкупно 500 нови станови.

“Сите станови се во различна фаза, дел во завршна, дел во карабина. Но, сите 500 ќе бидат готови најдоцна до мај 2012 година. Финансиската конструкција се уште не можеме да ја дефинираме бидејќи зависи од големината на самиот објект, а и од локацијата. Само 50.000 евра чинат плочките што ги ставаме по ходниците на секоја зграда. Фотоволтажниот систем за производство на струја за заедничкото осветлување е нешто што Адора прва го вооведе во колективно станбено домување. Во секој влез има електрични лифтови, а становите се опремени со оптички Интернет, ТВ и кабелска инсталација, имаат сопствен современ паркинг со 24-часовен видеонадзор“, објаснува Чифлиганец.

Кога станува збор за станбен компекс кој нуди колективно домување во затворен простор, неизбежно е да се спомене инвестицијата на бизнисменот Фијат Цановски, кој најави изградба на 1.000 нови и луксузни станови во населбата Ќерамидница, на околу 500 метри зад Универзитетот ФОН. Комплексот, познат како Космос, треба да има сопствен базен, фитнес-центри и ротирачки ресторан од 600 метри квадратни на горниот спрат. Ардијан Амзовски, управител на Космос инженеринг, фирмата која ги проектираше, градеше и ќе ги продава становите, вели дека првата зграда со 580 стана ќе биде готова до крајот на идната година.

“Во план е изградба на уште една зграда со приближно толкав број станови. Значи вкупно ќе изградиме 1.000 станови со вградени кујни, италијански плочки и санитарија. За првата зграда веќе е изградена карабината и треба да биде готова до крајот на идната година, иако 40% од становите ни се веќе продадени во изградба“, вели Амзовски.

Тој тврди дека заинтересираноста кај граѓаните се должи на поволните услови кои ги нудат за купување стан во Космос, како и можноста становите уште во изградба да се стават под хипотека. Инвестицијата само за првата зграда чинела близу 30 милиони евра, а цените по метар квадратен се движат од 950 до 1.190 евра.

До каде ќе оди градежниот бум?

Зоран Азманов, директор на градежната компанија Настел, иако е активен со градење станбени згради, сепак смета дека на Скопје моментално му се случува градежна експанзија која личи на балон што набрзо ќе издише. Според него, начинот на “шиткање“ маркици и градежни локации, кој е прилично лесен и евтин, може да доведе до колапс, кој ќе ги урне цените на недвижностите, со што Македонија ќе го доживее американското сценарио.

“Ако тргнат цените надолу, нема запирање. Ако пуштите во оптек премногу локации, вие го обезвреднувате имотот на другите, кои поскапо го платиле. Може да се случи сите да чекаат да паднат цените затоа што премногу станбени згради се изградија во последниот период. Кризата во САД почна токму од хиперпродукцијата на недвижности, а кај нас е неизбежно таквото сценарио, кое предвидувам дека ќе се случи за две години. Дури тогаш ќе видиме каде ќе оди нашата економија“, објаснува Азманов.

Настел во моментот гради четири нови згради на површина од 1.800 метри квадратни, кои треба да бидат готови до 2012 година. Лоцирани се во населбата Ново Лисиче, а нивната изградба чини осум милиони евра, заедно со земјиштето и комуналиите. Азманов вели дека заработката од оваа инвестиција е околу 1,5 милиони евра.

“Но, мора да напоменам дека имаме заработка затоа што не земаме кредити од домашните банки, туку од швајцарските, со 2% камата на годишно ниво“, истакнува тој.

Повеќето од познавачите на градежниот бизнис, градежната експанзија ја оценуваат како потребна, а за понудата на станови во Скопје коментираат дека е помала во однос на побарувачката. Според нив, во земјава веќе ја нема средната класа, што придонело да се продаваат само два типа станови. Помали, до 50 метри квадратни, и луксузни од 120 метри квадратни па нагоре. Агенциите за недвижности оценуваат дека во Македонија расте побарувачката за луксузни станови.

Токму ваков тип гради и Соравија, која во моментот е ангажирана на Водно, на местото познато како Олимписко село. Таму се гради резиденцијален комплекс од затворен тип, а во тек е изведба на седум објекти во кои има 80 стана. Во комплексот Соравија ресорт е предвиден независен и индивидуален систем за греење и ладење, комплетна грижа за заедничкиот простор и спа-центар. Цените се движќат од 1.450 до 1.600 евра по метар квадратен, а околу 60% од становите кои се во изградба се веќе продадени.

“Проектираниот буџет за изградба на комплексот е околу 30 милиони евра, во што се вклучени набавката на земјиштето, сите такси, градежни дозволи и изградбата. Со падот на светските берзи, токму во периодот кога берзанските транскации станаа хит и кај нас, луѓето се свртеја кон недвижностите како единствен сигурен пласман за слободниот капитал. Се донесе и Закон за намалување на ДДВ од 18% на 5%, со што нормално овој пазар доби посебна стимулација и на страната на понудата и на страната на побарувачката“, смета Васко Давитковски, менаџер за маркетинг и продажба во Соравија.

Изградба на луксузен станбен комплекс планира и градежната компанија Бортас, која има купено локации на 18 парцели покрај Вардар, во близина на хотелот Александар Палас. Сопственикот Љупчо Бораниев објаснува дека тоа ќе биде прв луксузен комплекс со многу содржини кој ќе почне да се гради од септември. Становите нема да се продаваат по цена пониска од 1.800 евра за метар квадратен.

“Чекаме за две згради, вкупно 150 станови, плус локалите на приземје. Едната е во Расадник, во Кисела Вода, а другата е во Аеродром кај поликлиниката Јане Сандански. Но, тоа што е различно и ново ќе биде просторот на 5.000 метри кавдратни наменет за ексклузивни станови со тениски игралишта и базени од затворен тип. Само за двете згради во Кисела Вода инвестицијата н$ чинеше 4,6 милиони евра“, вели Бораниев.

Нема застој во продажбата

Агенциите за недвижности потенцираат дека во Скопје нема непродаден стан и дека 50% се продавале уште во изградба. Инвеститорите во градежниот бизнис уште на почетокот од годината коментираа дека во втората половина ќе следува градежна експанзија, која ќе биде придружена со раст на цената на становите, која, пак, ќе биде резултат на инфлаторниот притисок, односно на поскапените суровини, како што се градежните материјали.

Кои се потенцијални нови локации?

Центар, Водно, Дебар Маало, Карпош и Капиштец се уште се најатрактивни локации за изградба на станбени згради. Но, овде поради малкуте слободни локации инвеститорите градат на места каде што веќе постојат куќи. Како инвеститори најчесто се јавуваат мали градежни фирми или човек-фирма, која со здружени средства со купувачите ја гради зградата.

Дебар Маало, Ново Маало (населбата кај Олимписки базен) и Маџир Маало, каде што има стари згради, се интересни за инвеститорите за да се трансформираат во модерни станбени населби, со надградба на зградите.

Зајчев рид, Сончев Град, Соње, Волково, Радишани и Ќерамидница треба да прераснат во град, односно луксузни живеалишта, каде што се очекува да никнат големи станбени комплекси со придружни објекти и целосна инфраструктура.

http://www.kapital.mk/MK/dneven_vesnik.aspx/70764/skopje_dozhivuva_gradezhen_bum.aspx?iId=2263